Ngilh mawhding U Khan Do (Layseih Store)

Ngilh mawhding U Khan Do (Layseih Store)

U Khan Do in leitung hong nawtsiat san na thu ka zak ciang a man’ a zak theih nawnkei hang amaa tung ka lungdam na leh kaki thuah khak na ka hamphat lawh na kong pulaak khia nuam hi. U Khan Do pen leitung pilna lam ah Degree ngah masa pawl a madawk pawl a hih na kei genmaa in hong kigen khin a hih manin gennawn kei ni.

Kei pen hunkhat lai-in sumbawl paiibawl kana kipan aa, ko sumbawl ki patlai in khauthoh, setlu, puanten, meipi mysaa cih te India pan ka pua suk uh hi. Kaki thuah theih cil nading uh Topa hong gel sakna dan: India lam panin khatvei setlu leh khauthoh ka puasuk uh aa, tua hun laitak van a kici khempeuh pen vankhamm hi cileng ki khial lo ding hi.

Ka van puaksuk uh pen lampi hamsa lua a hih manin Lailo khua ah nawsia in ka ki thuahpih te kiangah no van te tawh hun a lem ciang Kawl ah hong puaksuk sak un ci-in vaikhak in khualam ah ka ciah hi. Ka lawm ten’ tavuan hong laksak aa, a hi zongin ka van alaang tangg kamsiat na tawh Kawlpi lutsuk na tai giat gate ah custom ten ong matsak khin hi.

A cianlai “ka neihlai” teng puaktheih na lampi zongin ka pua uh aa Pasian huhna tawh Kawlpi cidam in ka tun hi. Ka tunsuk khit teh lungnuam phalo kawmkal teng tawh, sazian kician tak bawlin ka lawm te tawh ka sazian ka siangsak hi. Tua ni mahin aki sumpian a hih manin lungnuam phalo pi mah vanleng tualpi lamah ka cim vak hi.

Pa Suan Kho Thang pen nidang khauthoh zuak navai pan kaki theihsa uh hi aa, a mah tawh Kawlpi vanleng tualpi kiang “welcome hotel” ah kaki mu uh aa, mualtung (Mogoke) kah ding hiveng nongzui nuam na ong ci aa, Pa Thang nong tonpih nop aa nongngaih ding takin utlua ing ci-in, ka zin ah kithawi kik in kazui pah hi. Tua hun lian in kakhut sungah Kawlsum Ks.5000/- kanei lai hi. (1981 kum pawl hi.)

Tua bang teng tawh a kithuah kahi uh aa ka lungsim sung ah Topa hoihna ka phat phat hi. Ka cihnop na ah tua hun laitak suang manpha pianna ah vapai aa sumbawl ding cih pen ei leitung mihing te lampan a hong pantah ding a om phial zongin a hong pantah ding hamsa mahmah hi.

Kei din munah suang manpha (precious stone) sep kaki pat khiatna pen Pa Suan Kho Thang hong pattah hang a hih man Topa min ka phat hi. Tua pan kithuah to in Mogoke ah ka zin uh ka tun uh teh U Khan Do tawh kaki tuakkha uhhi. A nidang in u Khan Do tawh khatvei beekzong a ki thei a kimu ngei nai ka hi kei uh hi.

Van kalei uhteh Pa Thang leh U Khan Do hong kikum khawmin Red Ruby tang khat tulnga man hong leisak uhhi. Ei mite sumbawl khawm te sung aa a ki gen ka zak ngei thu honghawm sawm nuam ing. “Sum bawlding kitonpih in a sum zian sik, tua khitteh a van leisak, vanzuak na dong tonpoh, a van zuaksak lai” cih kammal te kei tung ah a hongtung a hihi.

Hong van leisak uh pen deihsakna tak tawh hong leisak uh a hih manin Pasian in thupha hongpia aa, a kaang a vom ka khawng thei pahhi. Sanggam sung suahpih phial mahin u Khan Do ka ngaihsun aa thusia thupha zong kaki kum zel uh hi.

A maa pianzia kei muhna

Sumbawl pihte sung khawngah thu tuamtuam mi supna ding mawkgen khol lo hi. Pawlkhat te bangdan in, mi van leina a manzah azuak na zah cih khawng mawk gensak khollo hi. Mi pen mawk khasiat sak sawm lo hi. A hi thei zahin mi huhsawm cih kei pumpi tung pan ka mu hi.

A ki kep siam dan

Kawlpi panin puan silh nih (puanak 2, pheituam 2) tawh Calcutta ciang tung thei den zawpian hi. Tua pen na ngaihsut teh a hi ding mah hilel lo a hi hiam cikha ni teh, a kidawp siamna thusim honggen nuam hizaw ing. U Khan Do & U Kappu “Thang Cin Kap” ki ciamnuih ka mangngilh theih loh.

U Kappu “Abdul” in “puan suit” lei ding in bazar ah a vel vel U Khan Do in mu aa, “tua puan na lei leh na sumzian piuh ding ahi” ci aa a ki ciamnuih te khawnghun te nuihzak huai leh a nuam hun, khat leh khat ki maingap na kammal te a hi hi.

Tua te ka gen ki selphona hilo ki maingap ki ciamnuih, nuihzak huai kammal te a hong pulaak kik ka hi zaw hi. Ki ciamnuih uh hi napi in nuimel lo pian aa a ki gen uh teh kinuih za nuam zaw lai hi.

U Khan Do thugen khat tun ei hi bang aa gim liang tawl liang khualzin sumbawl aa ih zin zin ih lawm te Pasian min tawh sangkah aa a hong kipan te nikhat ni teh nuam hongsa in cin ong mangngilh lel ding uh a hi cih kammal a gen tu dong ka bilkha ah za lai ing. Tua a gen thu kua kua cih a gennop na hi lo aa hamsa phukha hang cih a gennop na hi ding hi ci-in ka ngaihsun hi.

Khatvei kaki suantaak gi ge a man bel mangngilh ken cin, ka van kazuak khit teh ka van lei (Diamond thoh) pen ka koihna thei lo in ka zong zong aa ka muh loh ciangin U Khan Do ka kamkuppih aa ka lawmte uh khat Taunggyi khua pan aa pa khat a la dingin ka upmawh khial kha uh hi.

A hi zong ka zon zon leh ka sum thoh khat kawm ah a mang lo lua ding ci aa ka koih lamm ka phawk kik thei pan hi. Tua pen ki suangtaak sim sim ing.

More: Pa Khan Do (kum 71, Buansing, Lay Seih Store) in hongnusia

Tu ni-in Pa Thang tung leh U Khan Do tung aa ka lungdam na thu laikung muk pan a hong pulaak thei ka hi hi. Ka lungdam na a innkuan te tungah Topa in thupha tawh hong thuh sak ta hen. Ka lungdam. Vum Lyan