Piakkhiatna ~ Pu Thangboi

Piakkhiatna ~ Pu Thangboi

Khat vei kawlpi a pawlpi lian khat ah hun kazat leh hun man teh khat pa in ka ipsung ah a sumbung hong guansak hiau hi (Anuai a lim pen hipah). Ka zin tunna katun teh ka vel leh asung ah a matpong zong na om mawk hi.

Kei zong “Hih pa lungsim man phalo khat hingel in cei” ci in ka koih khian pah hi. A pastor pa phone tawh hopih in “A lungsim man phalo ahia?” kacih leh; “Hikei e tha ngah lua hi’n teh evangelist a kazat uh hi” hong ci lailai hi. Hong piak takpi hiam cih ka dongpha sak a, matpong lo buang hong piak takpi ahih lam ka theih ciang in lamdang sa in ka zahtak mahmah hi.

LST hoih tak en leng piakkhiatna tawh kisai thusim tam mahmah hi. Abiahang in Sodom leh Gomorrah susia ding a pai mi 3 te (vantung mi ahih lam aman thei lo) bawng agawh liang pen uang kasa mahmah hi. Ak khat gawh lel leh kham mahmah ding uh hi. Lengla te’n zong “Bawng gawh liang kul kei” cilo mawk uh hi.

Abiahang in zindona/ piakkhiatna thusim na tel mahmah na hizaw mawk hi. Lengla te’n tua bawngsa anek khit uh teh “Mai kum tu bang hun in ta nei ni cei” ci hiau mawk uh hi. Tua kammalte Abiahang’ bil ah vanging zah in ngaih phial in ka um hi. Akhan tawn athu ngetnget pen hi. Alung kiat hun zong tam mahmah khin ding hi.

Tulai bang hi leh aki selfie laitak khawng alungkia ngaungau peuhmah ding hi. “Baih nawn o taw ei” acih hun tam mahmah ding hi. Ahih hang Pasian in Piakkhiatna tawh lam etna kongpi honkhuan pia ahih man in bawng ago liang ahi hi. Tua in ama teng honsak lian mawk hi.

More: Zogam nuntak gim namta ~ Pu Thangboi

LST sung ah piakkhiatna tawh kisai etteh ding tam mahmah lai hi. Pasian in atate piakhia ding a asawl pen akhelbawlna hi hetlo a, thupha apiaknop luat man na hizaw mawk hi. Piakkhiatna hatte kisik ngeilo uh hi. Piakkhiatna tawh lam etna kongpi hon ziahziah ding hilel hi. Hallelujah !