Lamka Crusade lawhcing takin kizo ta ~ Sia Do Khup

Lamka Crusade lawhcing takin kizo ta ~ Sia Do Khup

Kalaymyo panin Khitui Gospel Teamte leh Agape praise & worship teamte mi 17 kikuan to hi. Tedim a Khitui Gospelte’ zinpi Pa Sian Liante innkuan in zingan limtak hong vak uh hi. Singgial ah Suan Khup ten nitak an hong huansak uh a, amau inn ah kigiak pah hi.

Nipi zingsang kikhop AG biakinn ah zang. Cikha tangvalte leh Suangzang tangvalte in cycle 20val tawh hong kha. Behiang ciang Lamka ten hong dawn uh hi.

CRUSADE BAWL ZIA

• 1. Kha Siangtho deihna bek bulphuhin na kisem.
• 2. St. Paul sangpi neipa Sia Hau Khente innkuan inntekna.
• 3. Pawlpi(Saptuam) tuamtuam a makai tengin mawhpuakna la.
• 4. Pawl namkim kihel kim crusade thungen kiseh.
• 5. Tanu (sawltangzang) sem ding pawlpi kim pan kila khawm.
• 6. Kumpi theihpihna tawh crusade kibawl.
• 7. Khitui Gospelte ciah leh kuan bitna a om nading mawhpuak(tavuan) la uh.

THUNGETNA(THUMNA) HANG A LAWHCINNATE

• 1. Gamtuam pan hihna hangin buaina omlo.
• 2. Tuk tuiluan laitak ahih hangin guah malkhat zong zulo.
• 3. Mi tul tampi kikhawm ahih hangin gamlum sesu lo.
• 4. Zumkhak hun ahihloh hangin sun thusin mi 1000val.
• 5. Nisimin gup ngah mi kibehlap den.
• 6. Khangnote tungah Kha Siangtho kibua a khamtheihte uh kihaltum.
• 7. Sun thusinna hun leh nitak crusadete ah a kibangin Kha kibua.

ETTEH HUAI THUTE

• 1. Gambup khanlawh nadingin inntekna a la St. Paul innkuan.
• 2. Kiniamkhiat takin pan a la crusade makai khempeuh.
• 3. Crusade ah kihel khalo liang a Gospelte nek leh dawn bawlte.
• 4. Hun pat pan a tawp dong a dingcip Usherte.
• 5. Leitungbuppi et theih dingin live a khah khia mediate.
• 6. Amau thuneihna ciat crusade adingin a zangkhia kumpi uliante.
• 7. Midang buaisak selo a thungai hithiat mipite.

Video: Sia Do Khup’ laphuah: Lamka Khuapi ~ Cingpi & Huamnu 

https://www.youtube.com/watch?v=8XgoVT0XxfI

TOPA OMPIHNA TUAMDIAKTE

1. Thusia om theihna Lamka ah buaina dak ginglo.

2. DC a Palik lian pen SP (Superintendent of Polish)te innkuan in a tapa uh damlo thungetsak dingin hong sam thu va ngetsak thei. (Hindu biakna)

3. Minam makaipi Sia Pau ten zong anlim mehlim hong puak.

4. A pualam ah anne a pusuah ding thusuak ngah lo hitaleng, zintunna ah an hong kipuak ni khat keel khat ta kigo.

5. Kuan lam a hong buaisak zek Singngat India galkap ten ciah lam ciangin niangtui leh moh hong vak, lim kila khawm ziahziah thei.

6. Tawp nitak mipi ciah khit ciang anhuante leh St. Paul innkuan tawh Pasian phatin lamvui sai kik.

7. Lamka om sung anvak ding a tuh khalo Lalpu simte innkuan in Behiang leh Cikha kikal lamsap hong sik banah Cikha ah gan goin an hong vak teitei uh hi. Pia nuam taktak peuh leng piakdan ding om cihna hi.

PAHTAWINA KHEMPEUH TOPA IN TANG KHIN TA HEN.

Sia Do Khup