Khuado Pawi hongpian khiatzia tom lakna ~ Hau Thang

Khuado Pawi hongpian khiatzia tom lakna ~ Hau Thang

Mongolia pan Khampat: Ei Zomite pen , Mongolia minam hi-in Kawlgam ih lutma in, Sengam laizangah Yangty leh Khaungho gun kikal Mongolia minam te tawh kiteengkhawm ahihi. Segam pan in ih pu ih pate in, Tibet nazuan uh a, Tibet ah zong sawtpi mah nateeng man uh hi.

Tibet pan lal khia leuleu in , Kawlgam ah ki lut hi. A.D 80 Kumpawl in Kawlgam ah Zomi te kiom khin zo hi cih, Kuama nialtheihloh ding in Shan mite khansimna sungah kiteltak in kiciamteh hi. Pong kumpi gam pen leitungah athupimahmah gamkhat hi a,tua gamsung ah kumpi asemmasa penpen Khullice ahihi. A.D 80 kumpawlm in kumpi za ngah hi. Pong kumpi uk sungah Gamkee neuneu State sawm in kikhen a, gamkhen District 99 in kikhen sawn hi. Khampat khua ah Zomi kikhuasa in Zogun akipan nitumna lam khempeuh huamkhin hi. Khampat pen Zozumpi leh Akhuapi uh hong suak ahihi.

Khuado pancil Pu Tuah Ciang;

Hun hongpaito zelin Zomiten zongkhua hongphawk semsem uh ahihman in, Minamkhat in zia leh tong ngeina kip neilo a om den mawk pen hoih lo dinghi ci in, AD 1400 kum in Pu Tuah Ciang in ihzia ihtong ding leh ih ngeina dingte hoihtak na gual hi. Tua bang in Zongeina anagualhna sungah hih Khuado pawi zong nahel ahih man in hih mun pan Khuado pawi hong pia khia ahihi.Tua kumpan a kipan in ipu ipa te in tuuk an lakkhit leh khal an lakkhit ta ciang in khuado pawi kumkhen pawi pen kumsim in nazang to ngelhngelh uh hi.

Mothu hang in Khampat kisim, Khuado kizom theilo;

Vive, Mog Sung Anial Chronicle sung en leng Sam Long Pha in A.D 1474 kumin Meitei hausa Ning Tbouu Kamba tanu , azi ding in na pi hi. Lampi ah Sou Run Khum in agalkap te tawh napang sim in mopi te nathat hi. Pong Kumpipa thusapipa Chawlanghied suakta zenzen in Mong Mau Rang tungah alianpen kumpipa kiangah vagen hi. Hih thute hang in Pong kumpi leh Khampat kumpi hongkido uh a, Khampat khua kisim gawmpin galten buluh mang uh hi.

Zomite inn leh lo tawh nuamsa ding in akipat laitakun gamsungah hibang in galbuaina hong piantak teh ainn leh lo uh nusia in Galtai uh a, khulna bel uh hi. Hih khul zong aphuisam na pan un kimu thei hi. Ih pu ih pa ten phuiasam uh teh deihna om leh khiatna nei tak in aten masak na uh mun leh gamte abanban in nalo to ngelhngelh uh hi.

Phuisam dan:

Kimpi zin ni, Khapi kiatni khawhkhen ah’ Kawlzang ah Micin Sacin Kikhawl nung, tungpi suan ni, Ka pi neem nik’pi niksan honghoi ta leh na niksan napaikik leh, Vannu khulpi hongkhup leh taleh , Khulvang ah hong suak ta leh Dawi in Kau in hong piangta leh Gan Tualngo kuan ta leh natuah mawh ciang hih nu hih pa guh tep teh nagan tualngo zong in hih nu hih pan guh tep ken; nagan tualngo zong ngahta teh nakhua zuan in natui zuan in ataang alaam ding hong ngak lah hi. ci-in ih pu ihpa te in phuisam hi.

Gamsungah galdaih siangtak ciang in khul pan paikhia in Mualtung lam nazuan uh a, mualtung gam ah Ciimnuai leh Geltui khuate nasat uh hi. Ciim nuai leh Geeltui hong thupisemsem uh a, Thang Ho leh Lian Do te unau tangah hong khangto in Hausa sem uh hi. Api thuvaikhakna mah bang in Pupa ngeina Zo ngeina te hongpuah to kik uh ahih man in tuni ciang dong pupa ngeina , Zongeina leh KhuaDo pawi mahmah zong mangthanglo in akhang khang in kizom to suak ahihi. Khua do Pawi Kum khen pawi kumsawt guabang hing den ta hen!.

Agelh; Thang Khekh, Guite

* Hih Khua Do kipat khiatzia thu Rev. Dr. Cin Sian Pau B.A.B.S ,M.Div, D.Min (Manila) laibu bawl (Zomi te thu leh A Ngeina uh) cih laibu page 80 na sung pan hi.*
Asim nuam ding thulu kong guan tawm sak bek hi.

Beh lap natom no:

Nidang in Khua khat ah Zomi teng in Khuado ni anikibang hi; Tuhun teh Leitung mun khempeuh ah Zomi kizel ta ahih man in Khua do ni kibang leh et lawm penpen;

Nidang in Khuado pen anlak khit in kizang hi a, Kha liik kuanhi in Sawm ah an kisu ziahziah a, tangval ten khatang nuai ah daak tum/lem ziah ziah uhhi. Ahun Kha tanlai hun sung …

Tuhun teh gamsung gampua, khuapi khuata KHUADO ni kibangthei nai mahmah lo. Anikibang leh Kumpi zumkhak (Holiday) in nget theih ding lam et huai’ Zong hoih.

Laphuak/sa siam te’n Khuado hun teh mipi sak theih ding Minam khuado lapi phuah huai neih huai mahmah ta. Hun tawh kizui Music tawh kisa te hi ding.. Khuado hun sim Donalingling bekbek sa ding ih hiam?

Nidang khuado kipat ni in Dawi hawl khia uh hi. Dawi aw, Kau aw Pai khia in’ Nazun na ek zong nam sia, Nazi in hongngaklah, Na ta in hong ngak lah, ki ci’n Kau hawl uh hi.

Tu hun teh kau kihawl nai lo ei tengkihawl masa.. zukham in kihawl…. Na luak namsia, Nakam nasia, Hong kih mai ing, hongneh kei in, kikhopna buai sak teh’ pusuak pusuak, paikhia paikhia. Hau Thang – ZomiDaily