PDF File olnotak in na neusak nopleh

PDF File olnotak in na neusak nopleh

PDF File pawlkhatte a File Size gollua ahih manin Email ah Attachment tawh khaknuamleng kingahlo theihi. Tuaban ah File Size golluate pen website tungkhawngah ih Upload nopciangin hunsaupi alakbanah Space zong tampimah honglasukpah hi. Tuabanghun ciangin PDF File akibawlsate neusektheih nading omleh cih ki lunggulh mahmahthei hi. PDF File neusek nading, Resize bawltheih nading lampi tampitak leh abaihzawzong tampimah omding himah taleh hih anuai adanzong kizangthei hi cih kongtheisak uhhi.

Amasa penin PrimoPDF hih http://www.primopdf.com pan na download masa in. PrimoPDF thuzong Zomi Daily ah “PDF bawlnading akimawk ngah PrimoPDF” cih thulu tawh kigelhkhin zohi.

Na computer sungah PrimoPDF na Install khitciangin PDF File na neuseknop pen khatvei PDF bawlkikding ahihi. Cihnopna ah Word Document khawngpan PDF nabawlciang nabawlngei danmah in, PDF File panin khatvei PDF bawlphatkik nadingin Print namek khitciang PrimoPDF ah PDF namtuamtuam teltheihding hongsuak dinghi. [see photo]

Screen, eBook, Print, Prepress, Custom cih nam 5 aomlak ah File Size aneu seknuam ihhih manin Screen ahih keileh eBook pen natel inla, PDF File panin khatvei PDF mah nabawl phakik lecin na File Size tampi hongkiamtuam theiding hi.

Akitel zawdeuh dingin atom in,

1. Na PDF File hong masa in.
2. “Print” cihpen namek in.
3. Na Printers List sungpan “PrimoPDF” pen tel in.
4. PrimoPDF Dialog hongsuahciang in, Screen ahih keileh eBook pen natel in.
5. Anuai ah “Create PDF” cihpen namek in.

Tua hileh na PDF File panin File Size aneuzaw in khatvei PDF athak abawlkik nahihi. Hihteng naman ciangin Original PDF File leh nabawlkik PDF File te a Size etkak inla, nadeihzah in aneuzawhnai keileh Setting adangte zong sinkawikawi-in. Kuppihnop aomleh hih anuai a Comment Box sungah kikuppih theihi.

Zomi Daily
Written on 2011-08-05