A thupi mahmah “Hihna” (True Identity)
Muvailai pen hat mahmah in a buzong a sang na mun te ah lam aa, kisuan pahpah lo hi. A len ciangin zong niam len hetlo in vandawn ah leng in tua pan in lei ah miksi vak nangawn a ut hunhun in man thei hi.
Hun khat lai in lovat pa khat in a lolai aa, singkung a phuk leh tua tungah muvanlai bu na om aa, a tui zong tang khat na om citciat ahih man in, a man zong la-in inn aa, a akpi oplai bu sungah koih suk hi. Akno te hong keuh ciangin tua muvanlai no zong hong keuh in, akno te tawh hong kikhawl ta hi. Akno tetawh kithuah a hih man in akno omdan inhong gamta in leilak ah hong tai keukeu hi. Leilak ah ninpa natak kawm teng ah nekdign zongin hong om in, muvanlai ahih lam peuhmah kiphawk kha vetlo hi.
Hong gol toto aa, a ci a sa leh a mel mahmah pen akno tetawh hong kibang hetlo himah leh a lawmte omdan dan in omding mah kisa lel ahih man in van a len ding nagawn lau in a kha zong zaak ngam lo hi. Ham theilo pipi in ci-ik, ci-ik ci in hong vakvak hi. A mu peuh in lamdang sa mahmah in, “hih muvanlai hilo hiam?” ci’n kiho supsup uhhi. A mah le a mah pen muvanlai ahih lam kitel lo aa, miten a gen hang umlo in ak mah kisa sa mawk hi. A ma sung a, hih theihna leh thahatna om pen tello ahih man in akno mah bangin leilak ah nekding zongin hong omom aa, a hizongin a hihna hilo ahih man in hong kimang theilo in puksi dekta hi.
Nikhat lovatpa in tua muvanlai hong en in, nang pen lei a vak ding hilo hi ve te aw, van a leng ding hi zaw teh cin huih lak ah a lot leh laulua kisa in kia suk aa, leipum kivatna hi. Lovatpa zong khawl tuanlo in khatvei hong lawnto leuleu aa, laulua leuleu in a kha tawm hong zap in kiakik leuleu hi. Tua ciangin lovatpa in nitang salsak in tuni a kipan nangpen na hihna tatak tawh van aleng ta in ci’n lei ensak lo in vanlam nga in a lot leh a kha hong zap in leng pah vingveng hi.
Hih tangthu tungah Zomi te’n tha i lakding thu om hi. Galkap ki-ukna bei ngei ken teh cih lungsim, pai khia ta ni. Hong niamkhiat ding lungsim ngaihsutna leh thu le late nawl khin tani. I hihna tawh kituak minam khat sep ding leh sep tuak te sem tani, mite gelna bek ah kinga lo in en zong ngel thei hihang.
Chin busungah keuh khia i hih hangin Chin i hih loh lam pen kitel in, Zomi sungah kigawm kik a, a sangpen mun, kuama hong nongkai sak theih loding in malakna leh sepkhiatna te kipan ni.
A lianbel Pasian a nei minam, a sangpen Pasian teltuam minam i hih mah bangin, kineu sek loin gimna lianpi nei aa, sepzawh nading tha hong guan Pasian hatna suangin Kaal thak, lai mai thak ah ton khawm ni. Zomi makaite, Zomi Pasian nasemte, Zomi Siate, Zomi Sumhaute, Zomi Khangnote, Zomi mipilte, Zomi Party makaite, Zomi nulepate, Zomi khempeuh kimuanna neii ni.
—
Na khempeuh a semthei Pasian a nei mi in lungneu kei ta hen.
(He who trusts in the Lord shall not be disappointed).
Philipkhaipu
For so long our minds have rested
Blinded and unaware
We have been deceived by our own
Yet, from our slumber we shall arise
One by one, we awaken
That sleeping beast none could tame
Shall once again rule Zogam
Comment piaknop aomleh...