Communication na zatsiam hiam? ~ Khaibawi

Communication na zatsiam hiam? ~ Khaibawi

Thupatna: Communication pen leitungah a thupi mahmah khat hi-a, Communication ahoih, a hat, asiam, innkuan le minam, gam khangto hi. Nasep hoih ngahna ding, zakhan nading in zong, kisam mahmah hi. Mi pawlkhatte laipil mahmah, a degree uh zong sang mahmah napi-in nasep hoih, nasep nuam, a muzolo, a ngah zolo, a zakhang theilo gam khangtote ah tam mahmah hi. Tua pen Communication a siamloh man, ahoih loh man hithei hi.

Tangval pawlkhat a mel uh hoihkhollo, bang mah zong nei khollo, hi thingtheng sim zezen, mihau, miliante tanu nungak melhoih pipi, Lengtong Hoih bang a, ahoih olno tak in ngahthei uha,, nungak pawlkhat leuleu zong, a sam bang buahpian niniai, a mel uh zong, hoih khollo napi’ un, lengla tampipi khawl in, tangval melhoih pipi, Mun Neih Thang Dal banga tangval melhoih ngahthei mawk uh hi. Bang hang? Communication asiam man uh hilel hi. A khangto gamte ah degree neih ciang bek tawh nasep muzolo mi tam mahmah a, a khangto nailo gamte ah bel degree sang theithei thupi kisa hi. A khangto gamte ah bel skill tuamtuam siamding na thupisak zaw uh hi. Tuate sungah Communication skill pen thupi sakdiak hi.

Gal kidona ah zong Communication ahat te, ahoih te mah in galzo hamtang uh hi. Tulai US leh leitung I buaipih mahmah khamul saute bang, Communication a siamluat, a hatlua manun galhat uh hidih mawk hi. Tu hunteh Politic (Nainganzi) lam ah zong, President, Priminister, MP etc, te aki tel ciang leh kitelna thupi khat peuh aom ciang, communication asiamte, a hatte mah in pan mun ngah hamtang uh hi. Tua ahih leh Communication I cih bang hipeuhmah mawk hiam, Zomite Communication I siamta hiam, cih tawm kikum sukdih hi. Communication kammal pen Latin kam panin hong pai hi-a, Verbal Communication, Non-Verbal Communication leh Written Communication in khenpi thum in khen uh hi.

1. Verbal Communication:

Verbal Communication I cih ciangin, maitang kimu a kiho, ki kumkhawm cih bang dan, Phone pan, Skynet pan, VZO pan leh Radio, TV leh Media tuamtuam pan a kam tawh ki honate Verbal Communication kici hi. Nidang in ah hici bang ki honate pawlkhat, mukhalo, lawngkhalo, zang ziahziah khalo hi mahle hang, tuhunteh Technology hangin olno tak in I ki hotheita hi. Ut in utta keileng hite I zat loh hong phamawh ahih manin tuhun pen mi pawlkhat te’n Collaborative Technology naci liang uh hi.

Collaborative kammal pen Latin kam pan-a, hong pai hi-a, “connect with somebody or other people” eipau in a tomin genleng, mi dangte tawh kizom, ki ho cihna ahi hi. Technology kammal pen Greek kammal pan a, hongpai hi-a, techne leh logio kigawm ahi hi. Techne cih ciangin nasepna khat peuh ah “vanzat siamna,” thazung, thatang sanke, khua-ul sisan luangke kullo a, van, khuak zat siamna, hi-in logio cih ciangin “theihna sinna,” ahi hi. Tua hi-a, Collaborative Technology I cih ciangin, a tomin genleng, mi dangte tawh olno tak, baihlam tak a, ki zopna, ki hona cih a gennuam ahi hi.

Tua ahih manin mi tawh I ki hoteh, Interview khat peuh I paiteh a thupi mahmah pawlkhat in:
· Listen and feedback – I lawmte thugen ngaimasa phot in tua khitteh dongh kik or genkik pan ding.
· Respect for other opinion – Mi dangte ngaihsutna, mi dangte thugen zong zahtak sak ding, cih ahi hi. Hong ki hopih napi-in awl mawhlo, thusimlo, limtak dawnglo, cih banga, om loh ding ahi hi. Thusia gen ding ahih kei buang leh na lawmte’n hong hopih laitak, hong phone laitak na mankei leh zong limtak gen a, phone kik ding thupi hi. Thusia khawng peuh ahih leh bel kam kidop kan omlo hi.
· Etiquette – Thukhat peuh na genteh kamkhum tak, siangtak limtak, polite tak a gending cihna ahihi.

Tulai Zomita dingin maitang kimu a kiho leh Phone tawh ki ho mi namdangte bangin ki zangsiam nailo ahih manin thupi diak hi. Mi tawh I ki ho ciangin, interview I paiciang, kician tak in thugen in I lawmte thugen zong zahtak sak, limtak ngaihsak in tua khitteh a kiciat kei leh limtak siangtak in dongkik genkik ding thupi hi. Mi pawlkhat te’n a lawmte, a ki kuppihte,a seppihte thugen ngai nuamlo in ama utteng gengen in ciahsan, a phone khaksan, hun khaksak ziau cih bang om thei uh hi.

A dangte thugen ngai nuamlo in amau thugen 100% ki mang leh ut mawk thei uh hi. Zomi sungah zong, tuaci bang sia, upa, makai I om manin, tawmtaleng, ki khenkhen hi hang. Tua ahih manin mi tawh na ki hoteh, meeting khat peuh na neihteh, Interview khat peuh na paiteh nang a bekbek ci tentan kenla, mi dangte ngaihsunna zong, zahtak bawl in sangsiam in. Lai Siangtho in zong, khat le khat ki zahtak ziading, ki thusim ding hong hilh khin hi. A zuisiam, a zanghsiam minam leh gam ki pawlna peuhmah khangto ding hi.

2. Non-Verbal Communication:

I cih ciangin, pumpi ki hekdan, ki hek zia, ki mithek, ki zawl mite giau, ki mukpik cih dante pawl leh nikten puansilh, omdan khawldan, mi omdan ciinna, a gimnam a ki theisak cih bang dan a tuamtuamte pawl ahi hi. Mi pawlkhat pil mahmah, thei mahmah, a melbang pong piannong, a kam zong siamke, ahih hang, Non Verbal Communication zatsiamlo, theisiamlo uh ahih manun lawmding leh naseppih dingin ki deihlualo thei hi.

Tua ahih manin mi lak-ah I omteh, mi tawh I ki ho I ki thuahteh, omdan khawldan zong, eima innsung leh I khua I tui a, I omlai dan a, om gawptheih hong hikhinlo hi. Mi namdangte tuaci omtah, ci-a, omgawp mawk a, na ciinsawm leh lunggimna lianpi, lawhsapna lianpi na ngahthei ding hi. I paunak khat ah “sakhi in zong a tatnang kuam kua khual, buipi leikei in zong khua ngai” I cihte pen minam khangtote lak-ah zong na thupi mahmah hi. Ei Christian te zuihding ahi, Lai Siangtho in zong, biak innsung leh mun tuamtuam ah I gamtat luhek ziading, I niikten puansilh zia ding hong hilhkhin hi.

3. Written Communication:

Laigelh a tua tawh ki hona, laikhak in Laito pan ahi zongin, Email pan, Phone pan, Face book pan, Viber pan, Twitter pan, Laibu pan, Magazine pan, Internet leh Media tuamtuam khat peuhpeuh tung tawn pan laigelh a, ki hona, thu ki zaksak na pen Written Communication naci uh hi. Internet aki zatma in laigelh a, thu khat peuh I ki zaksaknopteh, a kha asim sawt thei hi. Zomi French paite bang innlam lai akhak uhteh, ni tampi asawt ban-ah guahzu, meikai thuakkha gawp ahih manin a laibang vul ning niang in, amal zong a mualgawp pawlkhat omta a, simhak simsim hih tuak hi.

Thuhoih mahmah gelhnapi hangin I laigelh a simdingte lampan in ana kitel kei mawk leh thasup huaisim hi. Nasep na zong ciang, company khat peuh tawh na ki zop ciang, ki pawlna khat peuh tawh na kizop ciang, lai gelh loh pha mawh hi. Laigelh nasiam leh na sepna ah na lawhcing ding hi. Mi khat peuh in lai hong khak leh zong a mi na theih nak leh limtak thuk kik tangtang ding thupi hi. A mi na theih kei leh bel tulai pen lauhuai thei hi. Gamkhangto, minam khangto aki etteh, a laigelh dan uh leh laibu bang zah bawlkhiata uh hiam, Media lam bang aci uh hiam, cihte ki en dih mawk hi. Tua ahih manin Zomi te’n zong lai tampipi I gelhding, laibu tam pipi I bawl zawh ding zong, hong thupi mahmah ding hi.

Tulai Zomi te’n Written Communication in Internet group mail te pan Email, Facebook, Viber etc, ki limzat pen phial in ka um hi. Internet thu tomcik khat genpak leng, Internet kammal pen Latin kam panin hong pia hi-a, NASA galkapte in 1950-1970 in hong bawlkhiat uh hi-in, a mausung bek a zatding in abawl uh kici hi. Ahi zongin kum 1980 khitteh mipi, tangpi hong zangsak uh hi. Ahi zongin Zogam leh Zomite sungah kum 2000- 2010 kikal in hong kizel pan hiaihiai kici thei hi. Leitung khantoh na Communication tawh kisai kum 20, 30 khitteh Zomite hong lawngkha pan, Zomite sungah mun hong luah pan cih theih phial hi.

Tua ahih manin tulai khangthak te’n I theihding ah, Written Communication group khat peuh I bawldingteh, minambup, minam ki pawlna or ki pawlna khatpeuh zatding I cih leh thukhun limtak in nei a, tua thukhun pen member ding peuhmah in thei masa phot ding, tua khitteh aki zawh uh leh member in lutsak pat ding ahi hi. Thukhun neilo or tua thukhun a member dingten zong thei masalo in member a sangpah, ahih kei leh amau phalna omlopi a, amau number or address I guansak ziauziau mawk leh a thuneu pen in thusitna leh sumliau na ki thuakkha thei hi.

I biakna Pawlpite leh I ki pawlnate I ki khenkhen sak bangin leitungbup Zomite ki zopna Written Communication group te zong a kumkum in athak hong ki bawl beh den phial mawk in, a member teng leh a thu ki suahteng lah ki bang veve ahih manin thukhun kician neilo I hi hiam, ahih kei leh Internet Law theilo I hi hiam, cih ki etphat huai hi. Thu ki suahteng ki bang veve ding ahih leh athak bawl behbeh nawnlo in, a omsateng limtak I puah theih ding thupi kasa hi.

Thukhupna: Ei sanga u zawte, pilzawte, siamzawte, makaite I lawmte zahtak hona, zahtak bawlna zong Communication hoih mahmah khat ahi hi. Tuaci bangin bawllo in eima dinmun ki tellopi, a maute I va haibawl, I va mawk hawmthawh mawk a, eima muhdah khatpeuh, eima hoih sak loh khat peuh I lawmte khempeuh muhdah theih ding leh a minsiat theih na dingin I va bawl khak leh tua zong a lauhuai mahmah leh ahoihlo mahmah Communication nam khat ahi hi. Thukhat peuh I genteh, I suahteh a taktak ahih ding thupi pen hi.

Mi dangte thugen limtak zahtak sak a, Namtal in “Phucil Phucil khau na zun ouh,” a cihteh Phucil in Neino a deih manin “sattat ding e,” ci-in, a thugen aleh lamin la-in akhau ana sattat vial leh amah in haksatna thuak lawh zawsop hi. Na khatpeuh I sepkhopteh Communication thupi mahmah ahih lam, Phuicil leh Namtak tangthu in zong hong phawk sak hi. Mihing kician khat in I pian leh Communication tawh ki pelhtheilo I hih manin Communication a zangsiam, gam leh minam khangto in, a zangsiamlo leh a zangkhial gam le minam khangsuk hi. Communication a zangsiam I hih ding hanciam ciatni.

Note: Zomi Innkuan Brisbane makaite in Sialsawm Pawi 2016 in Communication tawh kisai thugen dingin hong seh uha, tua hun a, ka thugen puahpha a, Zomi bup simtheihding in kong suah ahi hi. Khaibawi

References:

• i. Dr. Hau Za Cin, Technology I cihcih bang hi peuhmah hiam, ZONET on 20/08/2010.
• ii. Marie Lo Cascio, Collaborative Technology, (Lecture presented at Technical and Further Education Class room, Coffs Harbour, on 3/03/2015).
• iii. www.skillsyouneed.com/general/what-is-communication.htm