Kum 300 minam ~ Dr. Siambawi

Kum 300 minam ~ Dr. Siambawi

Change is the law of life. And those who look only to the past or present are certain to miss the future. John F. Kennedy

Myanmar gam, saklam le nitumna lam mualtung a om amau le amau Zomi, Zotung, Zophei, Laizou, Laimi, Khomi etc cih minam te khempeuh pen CHIN minam te ci in in Myanmar gam leh International ah kiciamteh hi.

Amau gam pen mualtung gam hi a Kawlmi te in a mau Mualtungmi te zong ci uh hi. Lokhawh nading, sumbawl nading in hoih lo hi. Leisung pian namanpha te zong kimu lo hi. Tua a hih man in, hih minam te pen Kawlgam sung minam lian 7 lak ah sumlehpai ah a zawng zaw te ahi uh hi. Pilna siamna leh kumpi nasem te ah zong Myanmar gammi tuamtuam te tawh tehna in tawm no bek om uh hi.

Tuhun le hunluithu

Tuhun ciang in, globalization tawh ki zui in, leitung kikhelna tuihual pi hang in, thukizakna te manlang mahmah in, mi te khantoh na, gamdang te khantoh na te in hih minam te kiang ki zel hi.

A mau a uk te a hi, gamuk te ii minam neu te tung a abawlna, khantoh loh luatna, nuntaak haksatna, zawnna te in, amau gam sang nuntaakna anuam zaw, mundang gamnuam te ah va pai in, nuntaakna thak va zong uh hi.

20 Century ma, hunluilai in a minambup, agambup a uk taktak om lo in, khua le kuam tawh ki zui in UKPI a ki ci te in uk uh hi. Minam min tak tak zong a minambup un a kician in nei lo uh aa, a om na mun te min, innkuan min (or) beh min te pen a mau ading ataangpi min te uh a hi hi. British khutsung pan Myanmar gam suahtaakna a ngah zawh a ki pan in a mau minam bup le a gambup a uk pen thunei Kawlmi, Myanmar gamuk te ahih pah hi.

Amau ii History tak tak pen 1800 khit pawl ciang dong bek lai tawh limtak in kiciamteh thei hi. Tua ma thu pen (historical point of view) pan kua mah in thei cian zo lo hi. A mau om na mualtung aa khua te a tam zaw pen 1900 khit ciang a ki phut pan ahi hi. Aneih uh Mualsuang te zong kum 100 kiim vi ve a tam zawhi. Ganhing lim te pahtawina aihna te tam pen hi.

Ngeina, Pawithupi

Aminam bup uh ading in, Khuadopawi pen a thupi pen hi. Amau minam ni February 20 nisim 1948 pan in kibawl kibawl a, pawi thupi pen a hi hi.

Leitung pusuah cilna le khuamuhna

Hih minam te in, khualzin gamvak uk te hi lo in, a mau omna mun ah nuam a sa thei te uh hi. British te in Kawlgam a uk hun lai tak, WW I a piang ciang in British te le apawl te ading Galkap van te puading leh gal hang in a sia khua te puah kik ding in amau minam te ki sap na pan in leitung tuipi gal apai khia ngei uh hi. Nitumna gam te pan Pasian nasem te in a mau mun a tun na te pan in hih minam te leitung in thei pan hi.

Lai neihna

Missionary te bawl sak Roman Alphabet hang in lai anei uh hi. Tua lai pen 1910 kiim pawl in na nei thei uh hi. Kum 2008 dong, tua lai ki bawl phatna, puah phatna om lo hi. Lai a neih cil un, a mau gam tek ah tan li ciang dong ki sin sak hi mah ta leh, kum 2000 khit a ki pan a mau lai kisinna tawm sem sem in a thei thak khangto tuan lo hi.

Hualpi na sepna le Thupingaihsut Nate (values)

1930-1950 hun sung in zanggm lam pan sing a pua ngei ngai uh aa, a om na ding inn te uh a bawl uh hi. Hih hun sung ah, tha hat pasal te kuan khia uh aa a gam uh ciak kik uh hi. Hih hun dong, “taksa thahatna” pen amau minam sung ah a manpha pen thu a hi hi.

1950-1975 hun sung in Galkap sung lut uh aa, a uk te sawl bang bang in a luangkham dong in na a sem uh hi. Tunglam te i sawltak hoih, a kuhkal te na hih uh aa, Kawl te in sawltak ding in a pakta mah mah uh hi.

Hih hun sung in “Tungsiah te piak Za le thu neihna” in a mau minam sung mithupi pen te, mimanpha pen te in ciamteh uh hi.

“Taksa thahatna” in “Tungsiah te piak Za neihna” mun pia in ki nawl khin aa, minam bup pan veng le paam ciang ah kia suk hi.

Hih hun sung in, innkuan bup in tunglam thunei te sawlna, koih na mun mun ah tuan in, a tanu a tapa te pen minam dang te lak ah a khangkhia uh hi. 1980 khit ciang in galkap nasep pan tawp uh aa pawl khat te a gam uh ciah in, pawl khat te in a mau gam pua lam mun tuamt uam aa sumzong in pai kawi kawi uh hi.

1975-1990 hun sung in suangmanpha to ding in Phakant le suang pian na mun te ah a pai ngei ngai leu leu uh hi. A tamzaw in, gamtatna hoih lo te leh nattun (Malaria) ngah uh hi.

Hih hun sung ah, a om khin sa “Taksa thahatna” pen mangthang sak ta uh aa, a om khin, “Tungsiah te piak Za neihna” le “Zangmi te bangin Hauhna” in a mau manpha a sak pen thu te lak ah hong ki hel beh ta hi.

Hih bang thu te hang in, a mau minam sung ah PILNA ki zel zo lo hi. Pilna nei lo, mizawng, minasem te na hi uh hi. Zawnna-Pilna neihlohna cyle sung ah a awkcip uh hi. 1990-2000 hun sung in Malaysia le gamdang pawl khat ah sum zong ding in kuan ngei ngai leu leu uh hi. Innkuan sung aa thahaat pen te pai khia uh aa, a innlam uah sum a puak kik uh hi. Hih hun sung mah in, a mau gam pan Kawlgam khuapi te ah dam dam in a lal lal uh hi. Kum 2000 a khen khit pawl a ki pan in​​ leitung gamlian pi te bel ding in kuan khia leu leu uh hi. Adiak diak in kum 2002 a ki pan in gamlian ta bel ding in ki kuan khia ngei ngai uh aa 2008 dong zong hih vai mah a khang penpen a hi hi.

Hih hun sung in, tha-hat pen te bek hi nawn lo in, numei, naupang, nupi, papi, innkuan bup in zong ki khin uh hi. A mau gam ah, a om tawm sem sem in, kawlgam mun tuam tuam ah ki thehthang, leitung mun tuam tuam ah ki theh thang a hih man un, a kampau te leh a lai te, a ngeina te uh, a mau teengna gam ten’ luah in, hun tom no sung ah, a mau pau leh lai te a khangthak te un limtak in, zat cing in a thei nawn lo uh hi. Amau gam pan a khang khia khangual te in kicing tak in a theih lai hang, khangno naupang te nam dang te pau le lai te thei zaw un enpi zaw ta uh hi.

A khangthak te un, Pau ah, a mau om om na gam mi te pau mah nuam sa zaw uh hi, enpi zaw uh hi. A Lai uh a theih taktak nawn kei uh hi. Amau tuallai te a simnuam kei uh hi. Amau lai tawh ki at thu zong tawm mah mah hi. Amau lai tawh ki gelh thu te in zong, Biakna thu leh minam thu bek bek a hih man in, naupang le khangno te a tam zaw in sim nuam lo uh hi.

La zong amau kam in limtak a nei nawn kei uh hi. Amau kampau tawh ki phuak la te sang, namdang te kampau tawh ki phuak la te, a khangno te un ngaih sa zaw uh hi. Tua tawh ki zawitawn in a ngeina te uh zong a thei nawn kei uh hi. A thei te in zong tua ngeina te nuam sa nawn lo uh hi.

Gam le minam vai khuamuhna

Gamvai, minamvai tawh ki sai muhna ah, abei sa, khanglui hun lai in, amau sung ah khua-pih lungsim, tanau, beh-lungsim ciang bek na nei man uh a hi man in, tu dong mah khua leh beh ciang tawh na sem thei pen uhi. Amau minam min te pen a mau ading a gol pen te a hi hi. Tua ahih man in tua min tawh kipawl na te phuan uh hi. Amau ading a golpen mun a hih man in, tua min sung mah ah buai un, tua sung aa a mipih te uh tawh thu leh la piang uh hi. Tua a hih man in mi a tawm mah mah hang un, a ki thu tuak lo minam te a hi uh hi. Theihkician neih lohna, tuahkhak thu te hunlui(history) ah aneih lohna uh, muhna toina uh hang in kilemna ngah zo lo uh hi.

Aminam sung uah, khang sawn a hau a om lo uh hi. Lo khawh losiah, khangsawn in na sep khat bek a sem te zong a om lo uh hi. “A vekpi phialun 1st generation” vive a hih na uh tawh thumuh na zong tawi, tom mah mah hi.

Khuapih, kampau, beh ki bang te ciang bek a lungsim uh tungzo a hih man un, tua sung ciang bek aa ding thungaih sun uh aa tua tan ciang bek a sem zo uh hi. “Khua leh tui, beh leh phung” lungsim puak nei uh a hih mah bang un, pau le khua ki gamla a sanggam te pen, sanggam a cih uh hang in sanggam lungsim tak tak in ngaih sun zo lo, ki it zo lo uh hi. A itna, a deihsakna te un, a suahna khua le mual te kan tan zo lo hi.

Tu hun in, a minam buk phial in Christian te a hih uh hang in, a mau upna sang a mau ii a lungsim lui te mah in uk zaw lai ahi man un, minam sung ah kilemna ngahzo tuanlo uh hi.

Gamdang pai khiatna, pilna neihlohna, thutheih lohna, zawnna (poverty), lungsim neuna (inferior complex), gamvai lam ah tei lohna, thukhat bekbek tung ah ding-cip-na cih thu te in AD 2008 hun laitak hih minam te lim, hih minam te dinmun a hi hi.

Mailam hunthak ding te ah

Atung aa thu te tawh ki zui in hih minam te pen, huntomno sung in a nuntaakzia uh hong ki khel pahpah ding hi. A theih khak loh kaal un,​​ A sawt lo kum 30, AD 2040 kiim ciangin, a khangthak te,​​ Kum 1-30 sung te ii 90% val in a ngeina te uh a thei nawn kei ding uh hi.​​ Kum 80% val in a lai uh thei nawn lo ding uh hi.​​ 50% val in a pau uh a thei nawn lo ding uh hi.

Tu zawh kum 60, AD 2070 kiim ciang in,​​ a minam bup ii n a ngei na thei lai 1% bek om ding hi. A ngeina te uh kizang nawn lo in laibu sung bek ah om ding hi.

A lai a thei lai 10% bek om ding hi. Hih laisung ah Lai Siangtho leh Biakna labu sung a lai te leh minam itna ki gelh lai te tampen ding hi.

A lai a thei lai 30% bek om ding uh hi. Tua te pen kum ham te hi ding uh aa, amau a sih uh ciang in a mau te tawh a mau KAM PAU, LAI, NGEINA te ki a kivui, mangpha ki khak khawmpah a hi hi.

Leitung ah hunkhat lai in om ngei uh aa, tu hun ciang in a manthang khin minam tam pi na om khin uh hi. Tua bang thu te pen hih bang hun ah a tam sem sem ta hi. “Kum 2000 hun lai a ki pan in, ni 14 sim in language khat ta mangthang ta hi.” ci in UNESCO in gen hi.

Bang hang in mangthang uh a hi hiam?

Alai uh kepcing nang’ khantoh nang’ platform om lo. Alai uh tawh sum ki bawl thei lo. A lai uh taw degree ki ngah thei lo. Nisim thukizakna nei lo uh. A la le ngeina te uh pen pawilakna bek ah ki zangh. Nisim nuntaak na ah ki zangh nawn lo. A kampau te lak ah namdang te kammal te manlangtak in a mal a mal in hong lut sem sem.

Amau pen namneu mimal a tawm te a hih man un, nampi te lak ah lungneuna (inferior complex) a tam zaw in nei uh hi. Amau le amau ki en neu. Amau le amau sang namdang te pi muh zaw uh hi. Amau le amau ki lem lo uh hi.

Hih thu pen a hang (factors) tam pi tak om ding hi. Minam lian pi pi te a mangthan na uh a hang pen mipil tampi ten, kumtampi hunla aa na kan khin uh hi. Huihpi, meimual, tui in tuum,​​ zinling hang in na mangthang uh hi. Gal te in zo in a vekpi ua sila in bawl na hang in mangthang uh hi. Anek tuidawn ding haksat na hang in ki khen, ki theh thang uh hang in mangthang uh hi.

Minam te a manthan na hangtampi tak a omhang laigual khat bek tawh siangtak in ki at thei aa tua in, “Amau te in hun kikhelna tawh ki zui in kikhel zo lo a hih man un, hunkikhel na in​​ amau​​ te​​ mangthang sak hi.” “They can not change according to the changes in out side world, so they become the victim of changes.”

AD 1800 khit ciang in a ki thei khia minam khat, amimalbup un MINAM khat in ding man lo in, GAM nei man lo in, KUMPI nei man lo in, AD Kum 2100, a ki theih zawh, kum 300 ciang in a hih leitung pan a mangthang kik khin ding minam te a hi ding uh hi.

Hih lai gelh ciang in emotion te a hi itna (love), deihsakna (wishes), lunggulhna (desire), lametna (hope), lainatna (passion) khat zong a ki hel lo hi. Tua hang in apua lam mi khat mun pan (3rd Person) in ki gelh hi. Atung a thu te bang in, piang ta hen, hi ta hen cih deih kaih ngaihsutna zong hi lo hi.

Kum 2008 hun lai tak, Kawlgam le leitung thu luanzia te en in i mailam kum 100 sung ading lungngaih kholna bek hi. Tg. Sian Nun Siam (3rd MBBS, Mandalay)