Turkey leh Russia te’n US in Terrorist Group te huhna pia hi ci

Turkey leh Russia te’n US in Terrorist Group te huhna pia hi ci

Dec. 28, 2016: Turkey leh Russia in mai kha ciangin Syria buaina tawh kisai Kazakhstan gamah genkhawmna nei ding uh a, tua ma-in Turkey leh Russia in US in Syria gam-a terrorist group kicite huhna pia den ahih manin jihadist-te hatsak tuam ding uh hi ci hi.

Turkish President Recep Tayyip Erdogan in zan in, “US makaih leh a kipawlpih (US-led coalition forces) ten IS/Daesh leh Kurdish groups kici rebelste lakah People’s Protection Units (YPG) leh Democratic Union Party (PYD) huhna pia uh hi cih lim tawh lahna ding leh a teci ding (evidence) om hi ci hi. US makaih leh a pawl ten Daesh/ISte huh hi ci-in hong ngawh uh a, tu-in amau terrorist groups huhna a piakte lak uh-ah Daesh, YPG, PYDte kihel a, milim (pictures), maan (photos) leh videos tampi tawh huhna a piakna ding uh lahna ding om hi,” ci hi.

Ahih hangin hih Turkey President pa’ ngawhna pen US state department spokesman Mark Toner in hih bang ngawhna pen man lo a, kingakna bulpi ding nei lo hi ci-in thalnial pah hi. Russia in zong zan in a tuam in US ten Syrian rebelste tungah khalna a koih uh laih in, liang panin a kikap vanleng kapkhiatna “shoulder-fired anti-aircraft missiles” kici a piakna hangin Syria gama Russia galkap omte adingin lauthawnghuaina piangsak hi ci hi.

Russian foreign ministry spokeswoman Maria Zakharova in US in annual defence policy bill kici a bawl Dec. 23 in thukham (law) ahih theihna dingin Obama in a suai a kaih manin USte’ policy kilaih a, Syria gam-a moderates rebels kicite tungah “shoulder-fired anti-aircraft missiles” a piakte jihadists (IS, al-Qaeda leh Fatah al-Sham kicite) khut sungah tung lel ding ahih manin Syria gam-a Russian air force leh Russia galkap omte leh Syria gam-a Russia embassy adingin lauthawnghuaina piangsak a, tua bang galvante zangin Syria ah Russiate khatvei sanga tamzaw hong kikap khin zo hi ci hi.

US National Defense Authorisation Act provision sungah US Defense Department in Syrian rebelste tungah anti-aircraft missiles a piakna dingin Congressional committee phalna om lopi-in secretaries of state leh defence submit report piak ding phal lo a, a phal theihna dingin rebel kua tengin US tung panin galvan, intelligence analyses leh anti-aircraft missiles bangzah ngah thei ding hiam cih US Congress committee thukimna kisam hi.

Al Jazeera reporter Natasha Ghoneim in Russia in Obama’ administration beidek kuanin nakpi takin ngawhna nei a, Russian foreign ministry in Obama’ administration in US President kiteelcing thak Trump US President zum ah a tut ma-in leitungah buaina nakpi piangsak ding hanciam hi ci hi.

Syria buai kipat cil a kipanin US in President Assad a kilaihkhiat theihna dingin Syrian rebel groups kicite tungah logistical support leh galvan tawh huhna na pia den a, Assad ukna a tuk ding lai takin Russia in Sept. 30, 2015 in Syria ah galdona hong panin rebels leh jihadist kicite tang leh tahum bangin khentuam se loin nuai cih takin a nuaina hangin tu dong Assad ukna a ding zo lai suak hi.

More: Obama in “US in IS piannading in kihuh mahhi” ci

Turkey leh Russiate’ foreign minister ten mai kha ciangin Kazakstan khuapi Astana ah Syria buaina leh ceasefire neihna ding vai genkhawmna nei ding uh a, Iran zong kihel ding hi. Turkey in Gulf gam-a a kipawlpihte Saudi Arabia leh Qatar zong cial hi. Syrian opposition main political body in zong zan in rebels ten Syria gam kiim-a omte tawh kilemna a om theihna dingin na a sepkhawmna dingun kunh a, ahih hangin Astana ah kihona ding vai-ah cialna ngah lo hi ung ci uh hi. Source: Al Jazeera and news agencies/ Thang Khan Lian