Pate Ni maw “Papite Ni”? ~ Hau Za Cin

Pate Ni maw “Papite Ni”? ~ Hau Za Cin

Mikangpau a Father’s Day kici pen Zokam in Pate Ni i ci hi. Tukum adingin June 20, 2010 hi kici hi. A piangsa khempeuh pa nei vive ihi a, i pianna pa i pahtawi ni ding ahi hi. Pahtawi ni ding cih ciang tua banga pahtawi ni a bawl om a, hong kizel toto in tu in leitungbup hong kizel suakta a, pianna pa a pahtawilo hih ding kuamah ut nawnlo ahih manin mi pawlkhat in a patsa uh Ni khat zatpih zuihpih in pate pahtawina ni a kizang liailiai ding hihtuak hi.

Zomi khat i pat hileh bel a vengpa hiam khat beek in ‘tua ni ding hi kei veh aw, tua ni ding hizaw veh aw’ ciin thukimpih lo dinga, zatpih nuamlo ding hi. Tua i cih ciang Zomi te lungsim puakzia leh founder hih ding thupi isakzia, ei phuatloh peuhmah a kankuat (oppose, langpan, nial, zuihpihlo) leh a picin ding hazatna i hauhzia gennopna hi a, tua banga thu tuam sat den a hoihloh lam uang gennopna ahi hi.

Pa i cih ciangin ta neisa te pa kici hi. Numei ahih leh ta neisa te Nu hi a, pasal nei khempeuh Nu hi nailo a, pasal nei nailo pawlkhat zong Nu om veve hi. Zi nei sate papi hi a, pa hipah tuanlo uh hi. Zi neilo pawlkhat pa om leuleu a, zi nei khin napi pa ahi nailo zong om leuleu hi.

Nung kum in Washington DC ah ko biakinn Sihzang Church ah ka kikhop cil ni in, “Pate Ni ahih manin pate letsong kipia ding hi, hong ding un” ciin makaite in hong pulak ciangin ka ding kei hi. Makaipa mah in, “… nang zong hong ding o” hong ci a, ‘hi ding maw’ ci in ka dingto a, laikung hoih mahmah letsong hong kipia a, tutan ka neilai a, tua ni ka phawk velval a, ka lungdam zawzen hi.

Kei ngaihsutna ah PATE NI ahih leh pa ahita, ta a neita, suan leh khak a neita te pahtawina ni hi dinga, kei banga nungmaha innkuan neipan te pahtawina hilozaw in (kei hong kipahtawi ni ding hilo zaw in), kei a pahtawi ding pawl hilaizaw lo ka hiam ka ci hi. Tua manin zi nei khin ka hih hangin a dingpah lo ka hi a, PA leh PAPI cih kikal ka tawikhai man hi.

A mikangpau kawm kik bualbual leng Father’s Day hi a, Husband Day hilo hi.

Tua manin Pate Ni ah papi khempeuh pahtawina kizang ding maw, ahih kei leh pa ahi khinsa te bek pahtawina kizang ding? Pa te pahtawina ahih leh zi a neihloh hang ta a neih leh pa hita a, pahtawina ding ahi hi. Papi khempeuh pahtawina ahih leh Zomi te in zi nei khempeuh papi kici ahih manin ta nei in nei nai takei leh pahtawi ding ahi hi. Zi nei khin khat a zi tawh kikhen kik henla, ta nei kei leh (hunkhat laiin pa hi ngei ahih manin) tua zong Pate Ni ah pahtawina a kipia veve diam.

Pawlpi leh kipawlna khawngin hih bang ni ciang pahtawina i vaihawm pen ahi ding mah hi diam? Mi, ama pa tektek a pahtawi nuam zong om dinga, tuate kipahtawina ding a khaksak kha i hi thei diam? Biakinn ah, pawlpi ah – tu ni Pate Ni ah i pianna pate pahtawi nuam i om hiam – cih bangin hun awng hong ziau in, a utte’n hih lel leh a hoih diam? Ahih kei leh a pahtawi dingte in pahtawi nuam in pahtawi nuam takei leh pawlpi saikhit sakin ‘tuni Pate Ni ahih manin pate i pahtawi ding hi’ cisuk ziau leng a hoihpen ahi diam?

Pa a nei peuhmah pate pahtawi nuamlo om in ka um kei hi. Ahi zongin ‘pa’ hong ci ding a om nailo khat ‘pa’ ciin pahtawi mawk leng a kigen ngei (kua ci a hia? sangmang khat khualzin mipi ten khuamual ah na muak uh, a nungzuipa masa, a sangmangpa nunung ci, a vaidawnte in amasa pa mah sangmangpa sa in pakkual pia, ‘kei hi keng’ ci tuanlo, nopmawh sa selo pai liauliau, nitak ciang a mi dawn uh pen pakkual a piakloh zawk uh na hi kha bilbel… 🙂 khat bangin a kipahtawilo ding pa kipahtawi kha henla tuapa in nopmawh hong sa tuan khol kei leh a kipahtawi ding pa a dahlua kha kei tam?

Pa cih ciang innkuan sungah pa pen cihna hi zong kici thei leuleu hi. Zinei tung hita leh zi nei nawnlo hita leh, zi nei nailo hita leh pa hi kici thei hi. Zomi te zatdan ah innkuan sungah a thunei pen, a vaihawm pen, a lianpen PA kicih a ngeina hi; meigong innsungah zong ‘pa pen Nu’ ahi hi. Innsung pan pa bel ciat paikhawm ding a kicih ciang pasal omlohna ah numei pai hi, tua pen ‘innsung pa pen’ ahi hi.

Tua ahih manin PATE NI (Fathers Day) i zat ciangin mipi lawp thu leh makaite lawp thu bek tawh kipahtawina khawng i bawl gawp kha hiam… Pahtawi limlim a utlo kuamah ki omlo hi ding…. a gen uh sangmangpa nungzuipa zong nopmawh sa selo, phamawh sa selo, a siapa om ta leh kisuanna themkhat bek neilo in pai liauliau kici… upa te’n “Kamsiam ngaidah leh lamphei tawn nuamlo omlo” na ci uh hiven. Kipahtawi ziahziah ding hi.

Ka nu leh pa hong it, hong kep, hong khoina te ka phawk a, Topa in amau thupha tampi hong piaksak den leh ciin thu ka ngen hi. Lungdam tuun angkawi Zua aw. Pate Ni ah Topa thupha ngahta in. Na von, Dr. Hau Za Cin