Australia gam Melbourne ah Sialsawm pawi

Australia gam Melbourne ah Sialsawm pawi

A 2 vei na SIALSAWM SOCCER TOURNAMENT pen 24-27 APRIL, 2015 sung Melbourne khua pi ah ki bawl aa, pawlpi tuamtuam pan in Soccer Team khat ta hong ding khia uh hi. Tua Pawlpi te in FGA ( Full Gospel Assembly), SDA ( Seventh Day Adventist), ZBCV (Zomi Baptist Church Victoria), ZMC FC ( Zomi Mission Church), EAC ( Emmanuel Assembly Church) leh ZBC/MZCC (Zo Baptist Church/Melbourne Zo Christian Church) te hong ki helthei uh hi. Tu kum pen pawlpi khempeuh tha lawp thei mahmah in ah, zong hah kat thei mah mah uh in, ki mawl na te nop ci mah mah hi.

24 ni ZBCV leh SDA ki mawl uh aa, ZBCV ten 4:2 tawh SDA te zo uh hi.25 ni in Puai masa FGA leh ZBC/MZCC te ki mawl uh aa, Goal 1 tuak ki din uh hi. Puai nih na ZBCV leh EAC te ki mawl uh aa, Goal 2 tuak ki din leuleu uh hi. Puai thum na, ZBC/MZCC leh ZMC FC te ki mawl uh aa, ZBC/MZCC ten Goal 1 tawh zo uh hi. Puai 4 na ZMC leh FGA te ki mawl uh aa, Goal 3 tuak ki din uh hi. 26 ni in EAC leh SDA te ki mawl uh aa, SDA ten 4:3 tawh zo uh hi.

27 ni SIALSAWM A PI ni in Pawi hon na hun ki bawl masa aa, ZAA President a hi PA LIAN in hon na hong neih sak in Pa Khup Pau ( Chin State Ministry of Sport ah a sem ngei) in SIALSAWM thu tom kiim hong ngen khit ciang in hun khat na ki zo aa, SEMI FINAL masa ki mawl ki pan pah hi. Semi final ah ZBC/MZCC leh SDA te ki mawl in ZBC/MZCC teb 4:2 tawh hong zo uh hi. Puai nih na FGA leh ZBCV te ki mawl in ZBCV ten 2:1 tawh zo uh hi. A thum na ki suih na ah, FGA leh SDA te ki mawl aa, FGA in 3:1 tawh hong zo uh hi.

Final ah ZBCV leh ZBC/MZCC te ki mawl in Goal 2 tuak ki din a hih man in Penalty ki sui uh aa, ZBCV ten 12:11 tawh zo uh hi. Tua Khit Ciang in Letsong piak na ki nei in, ZAA pan Secretary a hi Pa Nang Khan Khup Naulak in thu gen na tom no hong nei hi. Tua khit ciang in Pa Lamh Kim ( SIALSAWM SOCCER TOURNAMENT Thuvanpi) in lung damh koh na hong nei aa, tua khit ciang in Kawlgam pan hong pai a hi Sia David Khen ( AGAPE PAWLPI, KALAYMYO) in han thot na tom no hong neih khit ciang in, letsong piak na te aban ban in ki zom to hi.

Tu kum Melbourne SIALSAWM SOCCER TOURNAMENT ki mawl na letsong (Prize) ngah na te a nuai aa bang a hi hi.

Champion – ZBCV
Runner Up – ZBC/MZCC
Third – FGA

Best Player – Tg KHUAL ( ZBC/MZCC)
Top Scorer – Tg KIM PU (ZBCV)

Best Defender – Tg LIAN PU (FGA)
Best Midfielder – Tg KIM PU (ZBCV)
Best Striker – Tg NGURA (SDA)
Best Goalkeeper – Tg DAVID (ZBC/MZCC)
Thupuak
Lamh Kim @ Lang Kap SAMTE
Melbourne
Australia