Sul a hong heikik sawm nawnlo ngaih

Sul a hong heikik sawm nawnlo ngaih

Kei kong ngaih bangin kavang mubang nong ngaih ale, ka lungzuangna te zal in amual aguam kantan in nasiang ah vabang in ong leng nuam sam ingh e maw Ngaih. Kapumpi nasep silbawlna ah aom hang ka lungsim na siangah om tawntung hi. Ahihang tuate nang theikhalo mate Ngaih. Manpha kasak mahmah thupi mahmah a kangaihsut itna ngaihna tong ih lelte bangmah in thu simlo ahi Ngaih aw, nang kiang ah tun ahi leh na lungtup lungdeih mahmah tangpal khat omta ding hiven maw.

Simlei pian dangin thu le la zong dangta, ahih man saploh deihloh itna thu a guallelhna na ngah kikkik zel ingh. Na kiang pan ka lamet lungnop na sang lungzuang na ngah ka hih man in sinthu ih lelte khaubang ki kai awk ta.

Ngaih, nang tawh ih kihoho ciang lungdeih libang cingta ding lungtup tungta ding ci in na ngaihsun khinkhian ngei ingh.

Bang deih bang uk bang duh ci in na theihloh kal in ka kansim a, nang nong om ciang lungdeih libang ciing ding ci in mailam hun ding ka ngaihsun ngei hi. Hih bangin mailam hun ding lawp in ka ngaihsut hang atawpna ah ka ngaihsutna bek mah ahih lam ka tel sesem hi.

“Kei innlam ciahta ning, sawt omnawnlo ding, tua hang inzong ong nak hongam lo, alamdang in laken maw,” nong cih ciang ih kigamlat dingte ngaihsun in lungzuan luankhi kanul lam athei pen kei bek ka hi hi.

Ka sunmang kazal mang nangawng a ih kikhen ding alau angaihsun ngamlo kei ka hih leh lungzuan luangkhi le dahna huihpi in hong nawk kik leuleu hi. “Aw ka ut ka deih bangin piang theih le maw”, ci in na khuisa sa ingh. Tun ahih leh tut hak omhak in patauhna te tawh kaki dim hi.

Ahih hang ih kithei tun’ ih kiho tun’ message te ka et ciang ka lungsim thak suak in ka maitai a ka mai ah nuihmai suak hi. Neu sen lim a lung katup vang ngaihno aw itna ngaihna kong lelelna kong ngaih theina hang in ka lungzuan in ka tha zaw ahih man in, kei bang ka vang zu bang khumlo ta adingin cih ciang ka thozo kik tam .

Ih kiho nawn loh kong hopih ding na deih loh na utloh nong dawng nop loh akipan bang sem koi ah om ci in kong kan zel a tun in na hih leh neu sen lim a lung na tup tangpal tawh kitheita cih na omdan akipan ka ngaihsutna in athei ciang “Ngaih aw nangla sang nunnuam kai niciang, keila nunlui ngai in kumbei ding maw, kei sang pal zaw gual ang na zalni ciang kei zuan luankhi kuan hong nulsak diam, ci in zaila na awiawi ingh.

Ih kigamla akipan kong it kong ngaih theina te tel siam in nikhat ni teitei ciang ong pai kik ding ci in na lam en khinkhian ingh. Tu in sul hong hei kik lo ding ahi Ngaih nang adingin ka nei itna pen zong anei omlo hong hita hi. Ciim man a gelh. Cin Ngaih