Tulai Zomi dinmun lung himawh huai ~ Dr. Zam S. Khai

Tulai Zomi dinmun lung himawh huai ~ Dr. Zam S. Khai

Gennop Bulpi – Zomi sungah minamvai hangin kisuam in sisan luanna zah dinmun dong i tun ciangin Zomi bup in na kisa mahmah hi. Zomi a tamzaw in Pasian thuzui vive hi hang. Minam it vive hi hang. I ngimna paipi kibang vive hi hang. I neihkhop gal lianpi a kibang hi. Zomite, ei le ei kisuam dingte hi lo in, luang kipham dingte hi zaw hi hang. I ngaihsutna, i sepnop ziate leh i panziate a kibat kim loh hangin phung khat pan piangkhia hi hang. Zomi khat sisan luanna in Zomite adingin thuakzawhloh zahin tamlua khinta hi. Tangthu kihilhsak ni. 1997-1998 kum sung nasia takin Kuki-Paite Tualgal kidona panin pilna latek ni. Kilemna ding hanciam tek ni. Facebook ah thu suakte a man leh a manlo, a kitel lo tam mahmah hi. Thu man tello pi in thu khensat pahpah kei ni.

Langgupna thu suaksak pahpah kei ni. Thusuak leh thukikhah khempeuh Zomi kilemna piangsak thu ahih ding hanciam ciat ni. Na Zomi pih khat tawh kigalbawl thei mah ding hi teh. Ahizongin na Zomi pih khat na gal hi ngeilo ding hi. Na Zomi pih khat tawh sikhat-sakhat hi teh. Zomi khat le khat a kisuam ciangin, a galte a suam hilo in, Zomi a mah le amah a kisuam hi zaw hi. Zomi makaite in kilemna ding leh pankhop theihna dingin Zomi makaite kimuhkhopna pi khat hong vaihawm in hong semkhawm dingin mipi lam panin kilamen mahmah in lunggulh mahmah hi.

Zomi Minam Itna leh Pasian Upna

​Zomite in Pasian it leh minam it vive hi hang. Zomite in i minam itna mualtuang sak zaw ding maw? I Pasian itna mualtuang sak zaw ding? Pasian it khat in minam zong ki-it thei veve ding ahiam? Minam it khat in Pasian zong ki-it thei veve ding a hiam? Pasian itna leh minam itna a kimeh khawm thei ding hiam? Pasian it vive te mah in minamvai semte hi hang. Minam it ciatciat leh Pasian it ciatciat i hih hangin ngaihsutna leh kipawlna tuamtuam kinei ciat hi. Tua ahih manin, I tupna kibang thei, kibang lo thei hi. Kikan teel hi lehang bel, i ngimna pi khat kibang in, i sepnop zia kibang lo zong hi kha thei ding hi.

Zomi sungah i neihkhop nam nihte in Pasian i upna leh i minam hihna ahi hi. I Pasian upna leh i minam khat hihna in hong gawmtuah thei pen ding ahi hi. Zomi sungah kilemna leh pankhopna a om ding ka lunggulhna leh ka thunget bulpi ahi hi. I John 3:20, 21 ah “Mi khatpeuh in, “Pasian ka it hi,” ci napi-in a sanggam khat a muhdah leh, a zuauphuak ahi hi. Bang hang hiam cih leh a muhtheih a sanggam khat a it lo mi in a muhtheih loh Pasian it thei lo ding hi. 21Khrih in eite tungah hong thupiakna in: Pasian a it mi in a sanggam khat zong it ding hi, cihna ahi hi.” I John 3:15 “A sanggam khat a mudah pa in mithat ahi hi. Mithat khat sungah nuntak tawntungna teeng lo ahih lam na thei uh hi” ci hi. Lungsim muhdahna in muhdah kipatna zungpi hi a, kithahna in muhdahna lianpen ahi hi. Pasian i it taktak hiam? Zo minam i it taktak hiam? Kisit tel pha tek ni.

Zomi Kipawlna Tuamtuamte

​Zomi sungah ahuampi in gam leh minam vai ah nampi li khawng kipha hi: Minamvai tangmisem, minamvai hiamtawi, minamvai kipawlnate leh mipi cih bangin kikhen thei hi. I vekpi in minam it tek hi hang. Tangmi semte sungah zong party kibang lo, hiamtawite sungah zong kipawlna kibang lo, mipi sungah zong panpih leh thapiak kipawlna kibang lo ding hi. Tua hangin, kitelkhialhna ding mun tampi ah om thei mahmah hi.

Zomi sungah kipawlna tuamtuam a omna zong, i khantohna khat hi, cih lam in kila thei hi. Ngaihsutna leh kipawlna tamna zangh siam kei lehang, kikhenna leh kimuhdahna hong piangsak zaw thei hi. Kipawlna tuamtuam, party tuamtuam a om ciangin a hoihlam in kidemna, ngaihsut hoihzaw kidemna, gam-le-minam ading in zaitak in khantohna dingin nasep hoih leh nasep lian tampi septheihna piangsak thei hi. Kipawlna tuamtuam a om hangin Zomi bup in i ngimna bulpi khat om gige hi, cih i phawk gige den ding thupi mahmah hi.

​ Kawlgam sungah galkapte hangin Zomi mipite in hawmthawhna omlo zah in launa leh patauhna tamkhin mahmah hi. Tua ban ah, Zomi sung kilem lahna hangin kilungmang beh mahmah ahi hi. Hih bang biaibuai kawmkal ah Zomite pilvang in kidawm siam in gamta kampau ding kisam lua mahmah hi.

Facebook Zomi Mipi

​Media kizopna manlang mahmah in kampau khat, lai-at khat in hun tomno sungin leitung mong dong kizeel thei pah ta mawk hi. Ahoih ahih leh kithei pah, a sia ahih leh kiza pah mawk hi. Zomite in i ommuan tek in pil kisa ciat tek ihihna zong angtang huai khat ahi hi. Ahih hangin i pilna i zatsiam loh ciangin i minam adingin lauhuaina leh supna piang thei tawntung zaw hi. Kilemna susia thei ngaihsutna, ngimna, gamtat kampau nate kidawm ciat ni. Facebook media tuamtuamte ah i suahsak thusiate in nungthu piangsak thei cih phawk gige in kidawm ciat ni.

Facebook ah thusia suaksak-kizelhsak khat in Zomi sungah kimuhdahna gu a khahkhah ahi hi. A pammaih mahmah Zomi siluang khat pansan in ciamnuihbawl, kikobawl, kizahpihna leh kitawnna in kizangh dinmun ciang dong a tung Zomite, i dinmun ngiam mahmah hi, cih kiphawk ciat ni. Zomite thuman, citak leh hangsan hi, ci-in hong kiciaptehna pan in bangzah dong kiamsuk khinta i hiam? I kiphawk kha hiam? kingaihsun pha tek ni!

Zomite Neihkhop Gal

​Chrisitan upna sungah i gal lianpi pen in Satan ahi hi. Santan in Pasian na galbawl den ahih manin thu-umte gal zong hi pah hi. I neihkhop gal ahi hi. Pawlpi sung kibuai theihna thu tuamtuam hang hi thei hi. Satan, makaite, mipite hang hi thei hi. Buaina a om sim in, a nam thum in kihel denlo kha ding hi. Satan hang ahih hun om ding a, makaite leh mipite hang zong ahih hun om ding hi. Satan hangin buaina mipite kingawh theilo ding hi. Makaite hangin buaina zong Satan kingawh thei tuanlo ding hi. Pawlpi khat ah buaina a om peuh ciangin, Satan bekbek kimawhsiat pahpah in Satan bang khasia lua in kap damdam thei zeel hi, kici hi.

Santan hangin buaina piangthei ahih hangin buaina khempeuh amah hikhin samlo hi. Mimal khat i angsung deihluatna hang hi thei hi. Makaite’ thuneihnop luat man leh huaiham luatna hang zong hi thei hi. Mipite’n nungzuih siamlohna hang zong hi thei hi. Huaihamna, hazatna, thuneih nopna, gualtungtuang nopna, kiphatsakna leh kideihgawhna tuamtuate hangin kibuai den hi zaw hi. Satan in kimawhsiat den in, mimal mawhna leh khialhnate kipulak nuamlo in kipuah phatna ding om thei lo pah hi.

​Tua mahbang in, minam vai ah zong neihkhop gal kinei hi. Ahih hangin, ei sung i buaina a tamzaw en lehang minal, makaite leh mipite hang na hi zaw thei hi. Tu laitak kum 2021 beikuan Zomi sungah i buaina in i neihkhop gal/galte hang hi thei, zong hi masa lo khathei ding hi. Khangluite’n “Deklam tuktum zong galsuak thei” ci hi; “Mibawl in kimang kei, ei le ei kibawl in kimang bek hi”cih thugil zong a ngaihsut huai mahmah khat hi. Paunak ah “Akta mangkuan ki tutu” acih i bat khat ding zong Zomite dinmun dahhuai leh lauhuai mahmah hi. Zomite i neihkhop gal (common enemy) do lo in, ei le ei i ki-do do leh bel, taitam tung hetlo ding hi hang cih kimu khin gige hi.

Muhzia leh paiziate kibang kimlo ahih hangin, i neihkhop ngimna leh i neihkhop gal hangin kipawl theihna om thei veve ding hi. Zomite’n, i kilamdanna tuamtuamte kitheihmawh bawlin i kibatnate leh i neihkhop ngimnate tualtungsak leng, kipawl khawm thei-in na lian tampi kisem khawm zo ding hi. Namkhat sakhat i hihna hang bek in zong kipawl khop theihna om thei ding ahi hi.

Tangthu Kihilhsak Ni

​Paite kam in “Lemna kadeih uh” ci in, Thadou Kuki kam in “Lemna kadieh uve” ci uhi. Kammal kinai mahmahna hangin hih minam nihte kum zalom tampi sung kithuhual takin nungta khawm thei uhi, kici hi. Ahih hangin tuma kum tam nai hetlo lai hun in India gam ah Naga-Kuki kikal a kibuai laitak in, Zomi Paite tawh hong kipeh khak manin a pammaih mahmah nuntakna tampi kisup lawh hi (Zomi Paite-Kuki Tualgal, June, 1997-October, 1998). Kum 1997, June 24 ni in Zomi Paite-te tenna Saikul khua (Churachandpur/ Lamka khua gei) ah nitak 8:30PM pawlin KNF (Kuki National Front) Kuki gamsung mite hong luut hi. “Hiai khua ah ZRA te leh Naga helpawl (NSCN-IM) te om uh, hon pekhia un,” (“Hih khua sungah ZRA leh Naga NSCN-IM gamsung mite om hi, hong piakhia un”) ci in pasal a muhpeuh kiang vuah bandot uhi.

Tua khuasung ah om tangval teng thaungat in khua taw lam ah kaisuk in tua ni in pasal 10 that pah in pasal 5 liam hi. Hih mulkimhuai kithahna in Zomi-Kuki Tualgal kipatna ahi hi. ​​​Hih tualgal hong piankhiatna thu in minam min “Zomi” cih kammal Kuki te in deihlo in Paite lamte Kuki suaksak naum, Paite lam in Kuki te siah (tax) don pia nuamlo, Naga gal dopih lo in gupzawk nei tuanlo a laihawl dinmun ah a omna hangin Naga-te tawh Paite kipawl hi cih upmawhnate zong kihel hi. Hih tualgal hangin mitampi in sihlawh, liamlawh in galtai in bawlsiatna tampi leh haksatna tampi thuakkha uhi. Gal kipat zawh kha khat a cinman in Churachandpur district sung ah mi 100 bang kithat khin, inn 300 kihal khin, mi 10, 000 galtai khinta uh hi, ci in kigen hi.

Mun khat ah a kigenna ah mi 352 val si, 136 liam, inn 4670 kisusia, khua 50 val kihaltum in mimal 13, 000 val in galtai uhi, kici hi. A taktak in a tung ah kigen zah sangin tamzaw tham dingin kiummawh hi. Tua Tualgal pian lai in a kihel khate genna ah: “I gal lamte khua ah i pai ciangin nungak meel hoih mahmah tampi bang pammaih lua hi, citziat huai takin kisuam lum kha in a awtna awte uh, i bilkha ah mang thei nailo hi” ci in hong gen uh hi. Tualgal kipat ni a kipan in phu kila toto, kithuk toto uh ahih manin kum 1 leh kha 4 sung kidona kizom hi.

​Mitam hong si mahmah khinta ahih manin kilemna ding geel zeel in kisia pahpah zeel hi. Mizoram pan in U Liante zong lemtuah dingin vapai zeel hi. Minam sung leh biakna sungah makaite in zong leptuah ding hanciam in mapang tek uh hi. A sawtsawt ciangin Kilemna Laibawlna October 31, 1998 kum in hong nei uh hi. Lang nih tuak pan in kengli nei sitaakna tawh kilemna leh kimaisakna nei uh hi. Hih bangin kilemna a kibawl hangin lungsim sungah kigim neihna leh lungsim natna damsiang lo in tudong mah kizopzia nop taktak zo nailo hi, kici hi.

​Kawlgam Zomi sungah tuciangciang ei khang ah, tualgal hong piang nai lo hi. Hong piang ding ki deih hetlo hi. Tua ahih manin a pianloh nadingin kidal thei lai, kipelh theih lai hi hang. A kipelh theihna dingin Zomi bup tungah vaipuak lianpi om tek hi. Kipawlna ciat ah makaite tungah vaipuak lian mahmah hi. Thautawi makaite tungah vaipuak lian mahmah hi.

Gamvai tangmite tungah vaipuak lian mahmah hi. Zomi kipawlna lianpite ah makai pite tungah vaipuak lian mahmah hi. Zomi mipi tungah vaipuak lian mahmah hi. Kilemna ding, kithutuahna ding leh pankhopna ding apian theihna dingin vekpi tungah vaipuak om tek hi. I hih theihna mun ciat ah pang ciat ni. I thuneihna leh i huzap Zomi sung kilemna dingin zangh tek ni.

Thukhupna: Facebook thusuah sakna ah pilvang tek ni. Thu kigen khat peuhpeuh um pahpah kei ni. Thukhen sat pahpah kei ni. Kiholhthawhna piangsak thute khah kei ni. Kilemna, ki-itna leh pankhop theih nang a piangsak thute lunggulh in hanciam ciat ni. Thu hoih thupha bawlna in Pasian deihna hi in, Zomi nam itna lahna taktak ahi hi. Zomi sungah panmun letna na neih leh, na thuneihna leh na huzaap Zomi kilemna dingin zangh in. Zomi sungah panmun neilo na hih leh zong, na thuneih lohna pilval takin daidide kikepna in zangh lecin Zomi sungah kilemna om tuam ding hi.

A lunggulh huai mahmah khat in: Zomi gamvai makaite, hiamtawi makaite, kipawlna tuamtuam makaite leh biakna makaite kimuh khopna om in kiholimna, kikup-khopna leh kithuminna a om theih ding mipi in lunggulh mahmah hi. Topa mahmah in Zomite sungah kilemna, ki-itna leh kithutuahna hong tunsakna dingin i omna ciat panin thunget tek ni. Amen! Dr. Zam S. Khai, Dec 16, 2021