Pasian’ nasep kum (25) cin ~ Jam Daniel

Pasian’ nasep kum (25) cin ~ Jam Daniel May 5, 2021 (Wed)

Pasian’ gam nasep kipatna le sepna

• 1. 1991-1996 sungin B.Th.; B.D zawhna letmat ka ngah hi.
• 2. May 5, 1996 LCBC khawk EC. meeting’ a (43) veina Saipimual khua pan hunbit Pasian’ nasem ding in khawk makaite thukimpihna tawh sanna le apna hong nei uhi.
• 3. Tua hun a kipan ka khua pawlpi kem kawm dingin tavuan hong pia uhi.
• 4. 2007 kum in Siampiza (Ordained) ka ngah hi.

Biakna sung Minister Card te:

• MC NO. 06 CTBA
• MC NO. 48 TTBA
• MC NO. 48 ZBCM
• ZR. 57 (ZBCM Revival Leader)
• MZC-MC NO. 01

Lungdam kohna

Ka sangkah sung tawntung tuni dong thu hong ngetsak a, kisapna sum le pai hongsik ka NU le PA tungah lungdamna ka ko hi.

Ka Mother Church CLBC pawlpi deihsakna tawh LCBC ah hong tensakna hangun Pasian a’ding minister khat a suak thei ka hih manin ka lungdamna thu ka puak hi.

Lungkim takin hunbit sia khat a ciapteh theih ding sanna le thukimpihna hong nei LCBC khawk makaite tungah ka lungdamna ka ko hi.

Ka Mother Church in Kawlkam tawh Pasian’ thu gen theih nading kum 2 sung khasum bit tawh hong kahsak manun lungdamna ka ko hi.

Siampiza (Ordained) hong pia Rev. Dr David Shin, Rev. David Han, Rev. Paul Shin, Rev. Go Sian Muangte tung lungdamna ka ko hi.

Pasian’ nasep Silver Jubilee pawipi bawl ding hong vaihawmsak ZCF-KD ka pawlpi tungah genzawh loh lungdamna ka ko hi.

Pawi a’dingin sum le pai hong khak USA a om ka nau Paupute innkuan, Khup Mungte innkuan, Lian Pau (SianLian)te innkuan, Na Mang (Piangbawipa)te innkuan, Go Ciangte innkuan, Taangbawite innkuan, Pil Thang, Sangpi le Teng Sangte tungah ka lungdam mahmahna thu ka ko hi.

Kong pulaak theihloh sum malte limtak ciamteh in thu kong ngetsak uhi.

Malaysia gam sung pan pawisim a hong pai khempeuh, lungdampihna letmat a kipan itna gah (khuttawi) hong piate, pahtawina puanlaisan, puandum, ngawngawh, silh le ten, pahtawina paakkual hong pia khempeuh tungah lungdamna lian lua mahmah hi ci’n lungdamna kong ko hi. Security le Usher hong sepsak veng kipawlna ZKDA makate tung lungdamna ka ko hi.

Ka pawlpi ZCF-KD in Siampipuan hoih mahmah khat USA pan hong vaikhaksak in hong pia uh a, pawlpibup itna gah ahih manin thupi mahmah ka sa diak hi. Ka zi Lunsan a’ dingin puan le nik hoih mahmah zong hong guan sawnsawn lai uh ahih manin ka lungdam ngaungau uhi. Ka pawlpi mite KHA pilna nei ka sa mahmah a ka angtang ngiat hi.

A cinglopen a siapa uh ka hih hangin, ka innkuan un a hoih pen tawh hong pahtawi in hong zem tawntung uhi. Mi malkim tungah Topa’ hehpihna thupha, Silver Jubilee thupha hong tung ciat ta hen! Jam Daniel Kt