Tuhun zizon zineihdan ~ Lengtong Pauno

Tuhun zizon zineihdan ~ Lengtong Pauno

Tu hunkhang zizon’ zineihdan tawh kisai in, tuni dongcianga akhaatvak ahi, Haiciin a ka behpa Sia PKSiing Tunglut in, “Nulepate’ hong deihsak neiding maw? Ei’ ngaih nei zawding?” acih tawh akizom in, kei’ ngaihsutna tawm hong dawngpak ning.

Tuhun nulepa pawlkhat, khuahun paizia khuahun huihnundan tawh akituak mel nawnlo lungsim gaihsutna (tualthuat) aneilai nulepa pawlkhat omlai mawk hi.

Sianggen’ mahmah lehang, tuabang ngaihsutna aneilai nulepate’ lungsim tawh kituakding, amau hong deihsakding na ngakngak mawk leh, nasih dongmah, na khaatvak, na khaatteen’ kul khading hi. Ahangin, tu hunkhangah, amau lungsim bang nungak khatzong om nawnlo khathei dinghi.

Na nulepa tuabangdanmi ahihkhak leh, cihna hi. Amasapenin, nang’ziding ahihmanin, nang’deih nang’ngaih thupi masa penpen hi. Nulepa in, atapa a it leh, a it atapa zi atanu a it ding uh ahi hi.

Tua ahihmanin zizon’ pasalzon’na ah, aneiding te’ it le ngaih le deih thupi masa pen hi, aci kahi hi.

Keizong, ka tapa it kahihmanin, ka tapa it azi pen, ka tanu taktak mahin ka saang hi. Ka hawmthawhna a omphial lezong, amau naupanglai himawk ven, kei’ ngaihsutzah aneiloding mah hi, ci in ka telsiam hi. Ka lungdam, Munkhai’pa (Siansikpu)

Video: Itna Kip Khosak in ~ Lengtong Pauno (lamal hilhcianna)

https://www.youtube.com/watch?v=7f7rCgZ-OTU

MIHINGTE’ ZIA LE TONG NAMKHAT (KAMTAM’ LUATNA)

A mudah zong hilo, aki siasaknuam zong hilo, asutuahnuam zong hilo, a it’ mahmah, adeihsak mahmah akhual’ mahmahte’ innsung baangkua hinapi, akamin brake neilo, thugenlo a om theilo, paupau paupau nuamden mawk, athugending atheihteng beita, hita leh paupau nuamveve mawk ahicianga, amonu’ kiangah ateeknu’ thaneemna teng gen, ateeknu’ kiangah amonu’ kizen zawhlohna teng gen leuleu…

Kuama dotlohpi a amonu’ kiangah, apasal’ zawllui teng gen pongmawk. Apasal’ kiangah alawmnu’ kingaihpih teng gen. “Na zi bel maapa hingelngel ding aive aphauh(ေဖာက္) masa” khawng cigawpkha talailai haaaa.

Thusia deih leh mi lungsimsia hipeuhmahlo napi’n, akamtam’ luatman a, hiteng genleng bangthu piangding, cihte ngaihsuta neivetlo in, mi’ innkuan sung nangawn abuaisakgawp mi omthei mawk hi. Adiak diakin, numei hizaw deuh thei hi. Ka lungdam, Munkhai’pa (Siansikpu)

TOPA,… LUNGDAM ING (Siansikh – Gen 22:14)

Katate Munkhai leh Lunlek pumkhat suahni (8-4-2018, Sunday, 5pm – 7pm) nitak in, mipi’ mai ah, upna tawh katu’ minding Siansik(Pau Sian Sikh) ka pulak khia hi.

Kei pen kum 80. ka phakkhit in, Biakinnpi sungah Pasian minphatin la kasa dinga, katu Siansikin music hong tumsak ding hi. Apu kum 80. ka phakin, Siansik pen, atawm penin kum 20. pha hamtang ding hi, cih zong ka pulak hi.

Ka tate akiteen’ zawh uh kha 3. taangbang aphapan tu laitakin, ka tanu Lunlek gilsung ah, Siansik kha 2. pha hi, 2019, February kha teh, Siansik suak ding hi, ci in Siavuan te’n gen hi.

Kei pen, 2042. kum teh kum 80.pha ding kahihmanin, tua hun takteh Siansik zong, kum 20.bek hilo in, kum 23.sung lut tading himawk hi.

Tua hi a, ka tate’ kiteen’ ni in, aki teengtegel sang’… alungdamzawpen, apa uh keimah kahi a, tuamah bangin, Siansik pian’ni ding zong, keimah apu sangin, hong ngak’lah sakpihzaw TOPA ahi hi, Halelu-jah!!! TOPA,… LUNGDAM ING. Ka lungdam, Munkhai’pa (Siansikpu)