ZAM Thupuak :: 29 June 2014

ZAM Thupuak
ZAM :: Zomi Association of Malaysia

REMEDIHealth Insurance Vai Gencianna Dotna & Dawnna
REMEDIHealth Insurancepen ei Malaysia gam sunga om Refugee leh Asylum Seeker te zat theih dingaUNHCRlehTUNEte pang khawm a kibawl ahihi. December 31, 2014 bei ma limlim mikim in neih loh phamawh ding khat in ngaihsut huai hi.

1. HihHealth Insuranceii ngimna bang hiam?
Health Insuranceciang kamsiatna tawh liamna baina leh natna hangin zatopi ih tun ciangin kibawlna sumbei huhna ding leh muhmawhna atuak kha zenzen ten sumlehpai ngah ding cih thu hi. Tua tawh kizui-in ei Refugee leh Asylum Seekers ten sumlehpai hamsatna hangin cina luna leh aliam abai zatopi tung ngam/zo lo tampi om hanga, tua bangte aa dingin a hun lap a Zatopi ih kilah ding deihsakna tawh sumlehpai tawh huh ding cih pen hihHealth Insurancengimna bulpi ahihi.

2. UNHCR Card tawi khempeuh in ih REMEDI
lei gaih kul ding cihna maw?
December 2014 beima in UNHCR Card tawi khempeuh in alei ciat ding uh kihanthawn mahmah hi.

3. Alei thei ding kua teng hiding hiam?
UNHCR Cardteng lehAsylum Seekers Cardkhempeuh in lei thei uh hi. UNHCR Card mangsak a laidal a tawi tengin zong lei thei uh hi.Ahi zonginAssylum Seeker laidal bek atawi a Card ngah nai lo tengin lei thei nailo ding uh hi.UNHCR Card/Asylum Seeker Card a ngah khinsa ten siau thei pan ding uh hi.

4. Kei penRefugee ka hihi.UNHCR Cardanei nai lo ka pasal pen liam pha mahmah ahihman in Zato ah ka kilah uh kul hi. Tuabang hileh sumlehpai tawh hong panpih ding lunggulhna tawh hih Insurance lei leng a kingah diam?

Health Insurance te’n pen tua bangin nasemlo uh hi. A tom inHealth Insurancein ama natna leh liam theihna te tawh kipelh/kikep theihna dingin hong huh hong panpih ding cihna hizaw hi. Tua banahInsurancein member te sum piaksa teng tawh member te zato lum a om leh sumlehpai tawh huh in panpih hi. Mailam thupiang ding thei khollo ih hihman in hihInsurancelei ciat le’ng kikepna khat hi in hoih pen ding hi.

5.“60 days waiting period”cih sese uh a deihna bang a hi tam?
60 days waiting period”a deihna pen mi khat in hih Insurance a lei ni a kipan ni 60 acin dong natna satna tawh kisai sum beizah bangmah piak sak nailo ding hi. Ahih hangin tua hun sung mah in member khat in Accident hong tuakin zato tung leh kihuh veve ding hileuleu hi a cih nopna hi. Bang bang hi leh Accident na tuak khit ciang na lei phingphing sangin mailam thupiang ding kithei khol lo ahih teh a hunlap mahin lei lecin hoih pen hi.

6.‘Inpatient Treatment’‘Outpatient Treatment’uh a deihna bang himawk ding hiam?
‘Inpatient Treatment’ciangin zato sungah kep leh khoi a om cina te cihna hi a, hihte pen kaal khat bang om thei uh hi.Gentehna in aat akul cina gimte/git neihlohpi a zato tung vat cina gimte/nasepna pan leh motor Accident tuakte cihte pawl pen ‘Inpatient Treatment’ a cihte uh hi.
‘Out Patient Treatment’lup sese a kul lo cina te cihna hi. A theih baih dingin cina zato ah kilak pak ziau a innpa’n zatui zaha tawh a kikhoite gennopna hi.Gentehna in cina sisan ensakte/datmaan kizaihte/zun leh ek, khaksawh sitsak cihte/siavuante Appointment piak zui a zato paite etc hizaw deuh uh cihna hi.

7. Hih Insurance lei in hileng zato ka lup ciangin kei sum a bei diam?
Zato sunga nasemte lah theih ding UNHCR Card/laidal na neih nak leh sum bei zah Insurance in hong piaksak ding ahihman in nang sum bei thuah nawn lo ding hi. Hih thu tawh kisai telloh leh dotnop na neih leh hih Telephone nambat te ah Kawlpau, Mangpau, Malaypau tawh kidong thei hi.012 330 6469/011 330 19019/011 330 19020.

8. Laibu sungah “Mimal leh innkuan khat mi 5ciang min kikhumteGroup Hospitalization Scheme (GHS)paizia tawh kizui-in a tam pen RM 10.000 kipiak sak ding hi. Innkuan mimal 6 tungsiah ahih leh a tampen RM 12.000 kipiaksak ding hi” ciin kigelh ven, a deihna a kicianzaw in nong gen thei diam?
Mimal leh innkuan khat mi 5ciang min kikhumteGroup Hospitalization Scheme (GHS)paizia tawh kizui-in a tam pen RM 10.000 kipiak sak dinga, innkuan mimal 6 tungsiah ahih leh a tampen RM 12.000 kipiaksak ding hi cih ciangin RM 10,000 pen innkuan sunga member om teng in zang khawm ding cihna hi a, mi khat in RM 10,000/RM 12,000 ngah ding cihna hi lo hi.

9. Hih Insurance pen koici bangin kilei thei ding hiam?
Hih Insurance hong kipat taktak ciangin UNHCR leh TUNE te in Selangor kuam tengah hawhna hong nei ding uh hi. Tua laiah UNHCR Card tawite leh Asylum Seekers Card neite’n lei thei pah in min khumna zong bawl thei pah ding hi. Tua hunpi hong man khit ciangin RefugeeAsylum Seekers’n TUNE Office omna veng tuamtuamte ah hih Insurance lei thei lai veve uh hi.

10. HihGHS/ REMEDI (Refugee Medical Insurance)alei ding bang hileng bangzah man ahia leh?
Mimal ahih leh kum khat in RM 120 piak kul hi. Innkuan ahih leh kum khat in RM 140 piak kul hi. Innkuan te’n ta thum kum 18 nuaisiahbek hel thei uh hi. Tua banah papi/nupi khat in ta thum kum 18 nuaisiah hel thei hi. (Kum 18 tungsiahte’n ahihleh amau aituam ding a lei uh kul cihna hi. Innkuan te’n ta thum banah a dang a neih thuah uleh khat ciang RM 20 ta piak beh kul ding hi. Ih mangngilh loh ding khat ah hih Health Insurance pen UNHCR Card tawite leh Asylum Seekers Card tawite bek in lei thei hi.)

11. Laibuneu (Brochure) sungah “Hih Insurance in natna pawlkhat huhna pialo hi” acih pen bangte himawk ding hiam?
Hih Insurance lei khin mah taleh Insurance in a huam loh natna pawlkhat a neite’n a zato lup man uh amau leh amau kisik ding hi. Insurance in a huam loh natna te pen a nuaia teng hi pha deuh hi:Nupi naupaai,nausuak, nausia. Amah leh amah kithah asawmte (Suicide), lungsim poi thei leh mihaite, mitlimlangh, pumpi sungah siik ahih kei leh bangle khat thuah a kulte, pumpi sunga van khek cihte.. etc…

July 2, 2014 sun 12:00 hih Insurance tawh kisai UNHCR leh TUNE Insurance te ZAM zumpi ah hong hawh ding ahih manin Khua makai, Pawlpi siate, makaite leh a lunglut khempeuh nong kihel kim ciatna dingun deih sakna lianpi tawh kong zawn uh hi. UN vai zong genna kinei ding hi.

UNHCR-CDU tawh khasim meeting
UNHCR-CDU makaihna tawh June 27 ni-in New Conference Hall ah kipawlna makaite kimuh khopna kinei leuleu hi. Kimuh khopna RST le RSC panin uliante hong kihel thei hi.
RST pan alian penpa Mikewell in Malaysia pan kum 1 in tul 15 bang kipuak thei ci hi. Leitungbup gambel buppi i 1% bekin gam 3 na a zuan thei hong suak hi. Gam 3 na tun theihna dingin amasa in gambel, galtai mi hih ding thupi masa pen hi. Dam lohna tawh kizui-in zong gam 3 na kipuak hi. Ahih hangin damlo khempeuh kipuak cih hipah lo hi. Numei leh naupang huh ding panpih ding neilo te cih bang ahi hi. Ahonhon a gam 3 na pai pen August 17, 2010 ma UN ciaptehna ngahsa teng hiphot ding hi.

Ciapteh ding:
UNHCR, IRC nasepna khempeuh sum kingenlo (free) a khawnkhong ahi hi.
Na tangthu (case) te na gendan kibang den ding kisam mahmah hi.
Phone kiset theilo. Gam 3 na painuam ung cici napi in phone set ciang kingah ngei mahmahlo ci uhhi. Na phone laihna khat na neih leh zumah zasak pah in.
Pawl khat te RST, RSC, DHS, IOM, CO man khinin alen ni ding nangawn kigen khin, atunna ding mun nangawn lem khinta in, ahih hangin lemlohna tawh RST hong kipuak kik te buaihuai mahmah ci uh hi.
Pawl khatte RST a phi tak uh ciangin a painopna gam genin uliante in lem a sak kei uh leh tua dante kha 12 pan 18 ciang kingak sak hi. Na vaiah buaina a om kei a leh navai manlang semsem ding hilel hi.
Tulai takin USA, Canada leh Australia gam 3 in gambelte hong la uh hi.
Gam 3 na tun theihna ding na tangthu (case) ahoih ding kisam mahmah hi. Maikum ah tukum sung sangin Europe gamte’n tampi hongla zaw ding ki lamen ci-in gen khia hi.
Thuman genloh, khemna (fraud) vai tawh kisai in tukum in kum dangsangin kilim sit zaw hi. Tuate asit a entel ding ngiatin ulian pawlkhat kiseh ngiat uh hi. Na thungen aman leh navai bangmah zekaina omlo ding, thumanlo na gen a leh navai zekai ding. Man maw manlo asitte in tukum bei dong sittelna nei ding uh hi.
Hih vaitawh kisai-in hopihna khat hong kineih aleh bangmah launa ding omlo hi. Pawlkhatte in UN card sut kik ding lau ahih manin phone lenlo, pailo uh hi.
Na UN card pen cikmah hun hong laksak kik ngeilo ding hi.
Nabuaina asian masiah na zumvai pen akhawl cip ding hiphot hi.
Na vai asian khit ciang bekin na maban kizom thei ding hi.
Gamtel dingte a dong nuamte hih email: [email protected] tawh kidong thei den hi. Thubuaina nei a dong nuamte hih email: [email protected] tawh kidong thei den hi.
RSC panin Elisa in nung May kha sungin thuman genloh, khemna (fraud) vai tawh kisai-in a kantel dingin uliante hongzin uh a bang cih sep ding cih hong genkik nailo uhhi ci hi. Asittel, akantel pawl i mansiang lohin tua cih khawlsak phot ding ci uh hi.

Zaksakna
Vanleng tung natuan madong ahih kei leh na paina ding gam natun madong na phone nambat mipia kei in.
Zum panin na phone missed call aom leh hong sapna nambat mah samkik pahin la nangah kei a leh azing athai ah sam kik hamtang ing.

Na vai bang ciang tung na theihnop a leh www.casi.rescue.org ah ki enthei a, na ID pen na MY nambat hipah ding a, na password pen amau hongpia ding uh hi. Password angah nailo te kingen thei hi. Ahih hangin na tangthu omlo ding hi.
[email protected] ah dotnop/dawpnop na neih leh lai kikhak thei hi.
DHS interview June 18 ni kipan kikta in July 18 ciang om ding uh hi.

Tukal Palaai te buaipih diak teng
Cin Suan Mang (Tungzang) June 7 ni-in Setapak palik te’n na manin kitankhia thei hi.
Cin Lian Mang (Tungzang) June 8 ni-in Kota Damansara palik te delhna panin liamin Salayang Zato ah puakin Memo kilak sakin IAD ah kiap thei.
Man Mun Cing (Tungzang) June 9 ni-in inn ah nausuak na panin GHKL ah emergency ah paipih.
Thawng Khai (Tungzang) June 10 ni-in Bukit Jalil tonginn ah kivan thei.
Thang Lian Sum (Tungzang), Thang Sian Tung (Lailo), Thawn Khai (Bukphil) June 10 ni-in Bukit Jalil tonginn ah vavan thei.
Cin Lian Mang (Tungzang) June 10 ni-in UN minsanna ngah pih thei.
Cin Lam Lian (Pimpih) kawlgam pan hong pai thak KL hong tung ma Ipoh panin sihbupna tawh hong nusia in June 12 ni-in palaai 4 in vauap thei.
Nemno (Vangteh) June 13 ni-in zato ah kibuai pihin Memo IAD ah ki-ap sakin UN min sanna hong ngah thei.
Cing No leh Peter Khai (Tungzang) June 16 ni-in damlohna vai kibuai pihin UN min sanna ngah pih thei.
Pa Sut Lian Thang tanu Cing Zuan (Phaiza) June June 17 n-in Ampang Zato pi ah kibuaipih in nausen agent te tungah ki ap thei.
Cing Khawl Vung (Tungzang) June 18 ni-in Serdang zato ah kibuai pih.
Lam Sian Vung (Ngalbual) June 18 ni-in GHKL zatopi ah kibuai pih.
Nu Man Vom (Kaptel) June 19 ni-in ACTS ah kibuai pih.
Khup Mang (Tungzang) June 19 ni-in Setapak palik te in na manin kitat khiat pih thei.
Ciin Khawl Vung (Tungzang) June 20 ni-in GHKL OPD ah kibuai pih.
Lian Lam Tuang (Zozang) June 22 ni-in Setapak palik te matna pan tan khia thei.
Niang Sian Man (Sezang) June 23 ni-in Setapak palik te matna pan tan khia thei.
Mang Lian Zam leh Vung Suan Mang (Tuikhal) June 23 ni-in Setapak palik te mat vai kibuai pihin suakta thei nailo.
Pau Biak Lian (Leilum) ZRC card tawi June 22 ni-in Salayang zato ah kibuai pih.
Dim Uap (Dim) June 23 ni-in Tzu Chi ah paipih.
Neih Thiam (Tunzang) June 23 ni-in IPR ah ki buaih pih.
Cingta (Tungzang) June 25 ni-in Serdang zato ah kibuai pih.
Suanno (Dolluang) June 23 ni-in Dang Wangi palik zumah ki buaipih.
Kam Za Khup (Fartang) June 23 ni-in puaisa te kiangah avai ki buaipih.
Paul Mung Tawng (Laibung) June 24 ni-in Jinjang
Lockup ah ki buaipih.
Khai Pi (Dimzang) June 25 ni-in Sg. Buloh thongah ki buaipih.
Ning Khan Man (Ngua Sing), Thang Khen Mang (Dimlo) June 16 ni-in GHKL ah ki buaipih.
Khen Deih Piang (Tuipi), Thang Kap Lian Thang (Keltal) leh (Tun Khan Kim (Singunau) June 17 ni-in Tamaloh zatopi ah kivan thei.
Ciang Deih Cing (Mualnuam), Pi Nu (Dimlo) June 18 ni-in Clinic ah ki buaipih.
Hau Lian Mang (Tanzang), Niang Sian Sung (Thangzang) June 19, 20 ni-in Klang zatopi ah ki buaipih.
Gin Sian Tuang (Keizang) June 20 ni-in Banting zato ah ama cardlo pi tawh zato na lum ahih manin ama card tawh valaih pih.
Cung Dim (Tualzang) June 24 ni-in ACTS ah va buaipih.
Ning Sian Sung (Thangzang) June 23 ni-in Tzu Chi leh June 26 ni-in Klang zatopi ah ki buaipih.

ZSM laibu len te tungah zaksak nunung
Khua makai, Pawlpi makai leh avengveng pan palai (ZSM laibu) len khempeuh ZSM zumpi panin kong hopih leuleu uhhi. Ih kizaksak sa ombang in Zomi Genvai (ZSM) pawllutna laibu len khempeuh lakpan atamzaw ki ap khinta ahih manin laibu len khempeuh tungah lungdam na kong puak uhhi. Tua hi a, 11 & 25 May 2014 ni thupuak pan hong ki tangko khinsa bangmah in kumlang cingkhin ta ahih manin nang khutsung ah laibu omlaitak in member lutkhinsa khatpeuh muhmawh in, a om leh zumvaipuak hinawnlo in (Nang) laibu len nu, laibu len pa vaipuak hi ding hi ci aa ih gensa bang lian in zum thukhun ombangin vaihawm ding ih hih manin azenzen aa laibu hong ap nailo na omlai uh leh nong ap mengmeng nang un zahtak na lianpi tawh kong zasak kik uhhi. Hih pen ZSM laibu len te tawh kisai a nunung pen zasak na hi ding hi.

World Refugee Day leh ZEC
2014 World Refugee Day Central Market ah nasia takin kibawl a tua munah a lam dingin a beisa kumte mah bangin UNHCR in ZEC siamsin naupangte hong samin ih Zogam Khantoh Nang (An Lakna) leh Phitla kilam thei hi.

A (2) veina sang siapi meeting
June 26 ni zingsang 10am pan 2pm ciang UNHCR-EDU nuai a om sang siapi teng EDU ulian kimuh khopna Chinese Assembly Hall ah kinei-in ZEC panin zong sang siapi teng kihel thei uh hi. Sang naupangte khantohna ding thu tampi kikum khawm thei hi.

US Embassy pan zaksakna
US gam atungsa te’n Malaysia aom innkuanpih te Visa 93 (I-730) tawh asap uh honkhat om a, a Case uh Malaysia Embassy hong tungkhinta hi. Ahi zongin Malaysia lampan akikanlo leh avai sianglian nailo Backlog honkhat om ahih manin, tuate July 23 nibup siansuahna neiding cih US Embassy pan ZAM Palai te hong zasak uhhi. Tua ahih manin US Embassy pan Phone tawh ahi zongin Email tawh ahi zongin July 23 ni hongpai un cih zaksakna hongneih uhleh amanlang in ZAM zumpiah hong zasaksawn theile uhcin ahithei bangin hongki vanpih ding hi.

Nang Card lo zatsawm kei-in
Zota paina, nasepna, mat le hen khat peuhpeuh ah na card zanglo a mi dang card na zatsak a ahih leh zum pan hong kibuai pih zolo ding hi. Tua ahih manin na paipaina ah na card puak ding mangngilh ngei kei in.

Innkuan lutpihthei nailo te ading
Innkuan lutpih (DS) thei nailo min sazian pia nailote in ZAM zumpi ah hong pia un UN zumpi ah khabei teh ki-ap kik nuamta hi.

ZAM Card tawi Zomi te ading nasep

• UNHCR-EST nasep zonsakna Giants a sem ding min piasa khempeuh in June 30 Monday ni ZAM zumpi ah navan uh tawh zingsang 9am lapin hong pai un.
• UNHCR-EST pan mahin Johor Bahru KFC sai a sem dingin Zomi citak mi 50 kideih hi. A lunglut khempeuh ZAM zumpi ah na min sazian uh hong pia khol un. Alunglutte kizopna ding: Mangpu 019 510 6413

Lungdam kohna

• Zomi Catholic (ZCCM, St. Joseph Church, Sentul) pan tukal Thupuak bawlna ding RM50 hong piakhia leuleu uh ahih manin lungdam ihko hi. ZCCM Pawlpi tawh na kizop nop leh: Francis Khampi 016 269 1351.
• Laatui khua mi Kham Sawm Mung leh Cing San Lian unau in USA alen theih lungdamna kohna in RM50 hong pia ahih manin ki lungdam mahmah hi.
• ZAM Thupuak zum pan lalo a Pawlpi tuamtuam leh ZEC sang tuamtuam pan hong print khiat sakte tungah lungdam mahmah hi.

Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  [email protected]

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…