Pasal khatin a lawmngaihnu akhennop ciang kammal tawh agenloh gamtat pawlkhat ~ Job Cinpi

Pasal khatin a lawmngaihnu akhennop ciang kammal tawh agenloh gamtat pawlkhat ~ Job Cinpi

Nungak tangval lawm kingai a tam zawte pen pasal lam pan khenna kammal a gen masa tam lo uh hi. Kikhen ding pen numeite in gen masa zaw uh hi, ci-in sittelna kinei hi. Bang hang hiam cih leh pasalte lam pan kikhen ding lam gen masa lo hi mah leh pasal khat in numei khat a khen nop ciangin a kammal tawh gen loin a gamtatna tawh lak uh uh hi. Tua manin numeite in a lawmpa in amah ngai nawn lo hi, kithuahpih nuam nawn lo hi, cih thei ahih manin numei lam pan khenna kammal gen uh hi. Tua ahih manin Pasalte in numei khat a khen nop uh ciangin bangci gamta uh hiam cih thu gen nuam hang.

Hong awlmawh pha nawn lo ding

Awmawh pha nawn lo cih pen a kilang khia pen dinga gamtat khat ahi hi. Pasal lam pan hopih masa ngei nawn pha lo, numei lam pan hopih sunsun leh dawn nading a kisam ciang bek dawng kik, tua zong a tom thei pen ding ngaihsun. Mi mawkmawk khat tawh koho bang le, cihte pen pasalte lam pan khen nuam ta hi, cih lahna lim ahi hi.

Tatna khempeuh mawhsak den

Hih zong a kilang khia mahmah khat ahi hi. Hekna tatna khempeuh ah mawhsak den, mawhna zong den, a om kei leh zong bawltawm cih bang phialin o ding uh hi. Kingaih cil lamin bangmah awlmawh lo napi a nung lam ciang, tua na ci, na tuaci gamta, hoih kei, ka lungkim kei ci ding uh hi. A lawmnu hoihna muhsak nawn loin a mawhna bek zong ta ding hi. Mawhsak ding, lungkiasak dih cihna ahi hi.

Omkhawm napi khattang kisa den

Omkhawm cih ciangin amah tawh kithuah kikhawl napi lungkim bang thei lo, khattang kisa lai veve, cihna ahi hi. A taktakin lawmngaihte tawh tutkhop khawlkop hun cih pen lungnop mahmah ding hun ahi hi. Ahi zongin a tunga thu nihte tawh kituakin hong awlmawh pha nawn lo, hong lungkimsak pha nawn lo ahih manin khattang kisakna hong om ding hi. Tua pen pasal tung pan a kothei ding hi lo a, numeite lungsim sunga thuak khak ding thu ahi hi.

Hong nawlkhuin nuam ta ding

Kimuh ding hun ciangin zong thalawp pha lo ding uh hi. Ut lo, kimu nuam lo, ci lo ding uh hi. Ahi zongin paulap tuamtuam zong thei uh a, paulap a om kei leh zong thalawp het lo ding uh hi. Kimuh ding gen khol khin napi a hun ciang a hang tuamtuam tawh a ni khin kik, kimuh ding sang a thupi zaw om, ci-in hong nawl khin nuam ding uh hi.

Lungduai zo nawn lo ding

Na kingaih cil lam tawh a lungduai dan, a thuak zawh dan kilamdang mahmahta ahih leh hong khen nuam ahi ta hi. Heh pahpah, pasal pipi nuak pahpah, a heh kineih cihte pen a gamtatna tawh hong lak khia ahi ta hi. Hehtak lo pi a heh kineih, maisak ding lam sangin tua khialhna mawhna tawh tawnbawl ding, bawl pian ding, amah le mah a heh theih nading zong zong ding cihte hong om leh thei pah lel in. Lungkhamna nei lo ci napi nang tawh a kimuh nak leh a mai tai ngei lo cihte phawk huai hi.

A innkuanpihte le a lawm a gualte zong kilamdang ding

A innkuanpihte le a lawm a gualte kiangah, na tungah ama lungsim tuakzia gen loin om lo ding hi. Tua ahih manin a lawmte ahi a, a innkuanpihte ahi zongin na tungah a gamtatzia uh hong kikhel leh amau tungah na thu pawlkhat gen khin hi kha ding hi. Nang hong it nawn pha lo, hong kighuahpih nuam nawn pha lo cihte pen nang sangin a lawmte tungah gen masa zaw den ding hi.

Lawmdang a ngai bangin om

Lawmdang ngai ta ing ci masa lo kha ding uh hi. A lawmdangte muk le kam pan ahi a, midang khatpeuh pan ahi zongin lawmdang ngai ta hi. Tua nu tawh kighuah pian hi. Kimu zel uh hi, ci ding uh hi. Numei dang khat tawh muangmawhin khen leh a ut pian ta ahi uh hi. Lungdam, Job Cinpi (Zomi Laisim Nuamte)