Zomi Innkuan USA thu (ZIUSA)

Zomi Innkuan USA thu (ZIUSA)

Zomi Innkuan USA kipawlna in United States of America gam sung, mun tuamtuam a om Zomi-te’ khua leh tui kipawlnate ahi, Zomi Innkuan kipawlna tuamtuamte a kigawmkhopna phungpi ahi hi.

Florida Zomi Innkuan (USA) kipawlna in kipawlna aphuh zawh uh kum (5) acinna pawi a bawlna uh tawh kituak in, March 26, 2005 ni-in Florida State sung Hollywood khuapi ah “A masa pen USA Zomi Innkuan Khawmpi” kibawl hi. Hih Khawmpi ah innteek Florida Zomi Innkuan (FZI), Zomi Innkuan DC (ZIDC), Chicago Zomi Innkuan (CZI), Appalachian Zomi Innkuan (AZI) leh Zomi Innkuan Oklahoma (ZIOK), Zomi Innkuan kipawlna (5) panin Makaite, mimal vekpi (30) val kah a, Khawmpi akah khempeuh thukimna tawh “Zomi Innkuan USA” kipawlna kiphutkhia hi.

August 20, 2005 ni-in, Zomi Innkuan Oklahomakipawlna in kipawlna aphuh zawh uh kum (1) acinna pawi a bawlna uh tawh kituak in, Oklahoma State sung Tulsa khuapi ah, Kipawlna Interim Committee makaihna tawh a (2) veina USA Zomi Innkuan Khawmpikibawl leuleu hi. Hih Khawmpi ah innteek ZIOK, FZI, ZIDC,CZI, AZI leh Zomi Innkuan Portland (ZIP) kipawlnate panin Makaite, mimal vekpi (30) val kah hi.

January 14, 2006 ni-in, Chicago Zomi Innkuan kipawlna innteekna tawh, Illinois State sung a om Chicago khuapi ah, Thukhunpi Kipsakna Khawmpi (a 3 veina USA Zomi Innkuan Khawmpi)kibawl hi. Hih Khawmpi ah innteek CZI, ZIOK, FZI, ZIDC, AZI kipawlnate panin Makaite leh New York, North Carolina State-te panin Zomi tangmite, mimal vekpi (30) val kah hi. Khawmpi sungah Kipawlna Thukhunpi kikupna picing takin kibawl a, Khawmpi akah atamzaw thukimna tawh “Zomi Innkuan USA – Thukhunpi” kikipsak hi.

A kikipsak Thukhunpi sungah anuai a bangin Kipawlna Ngimna Bulpite kician takin kikhung zo hi.

1.United States of America gam sung a om Zomi-te sungah kikhualna,kipumkhatna leh kipanpihna akhan semsem theihna ding,

2.United States of America gam sung a om Zomi-te’ khua leh tui tawh kisai khantohna ding vaite leh Zomi taanggpi taangta buppi tawh kisai phattuamna ding vaite pankhop theihna ding,

3.Zomi-te in minam kician, minam picing semsem dinmun khat atun’ zawhna dingin kipawlkhawm in vaihawmkhop theihna ding.

Thukhunpi zui in kumsim in Kipawlna Kumcin Khawmpi kibawl toto a, June 9, 2007 ni-in Tulsa khuapiah 2007 Kumcin’ Khawmpi kibawl hi. September 20, 2008 ni-in Tulsa khuapi mahah 2008 Kumcin’ Khawmpikibawl hi. Tu kum, July 4, 2009 ni-in Tulsa khuapi ah 2009 Kumcin Khawmpi kibawl a Zomi Innkuan kipawlna (8) panin makaite leh tangmite, mimal vekpi (100) val kah thei hi. Hih Khawmpi pen Kipawlna tangthu sungah a lawhcing pen Khawmpi ahi hi.

Kipawlna maban kalsuanna khempauh ah a makai dingin panmunlen (9) apha Executive Committee khat Khawmpi sungah kiteelkhia hi. (Teelcing EC panmunlente atuam in kisuaksak hi). Kipawlna tawh kisai thu leh la khempeuh ah thu anei dingin Kipawlna Board of Directors pawl kidingsak ding a, Board sungah anuai a Zomi Innkuan kipawlna tuamtuam panin pawlmi phazah tawh kituak in a kipuak ding Tangmite kihel ding hi.

Kipawlna in ahuam Zomi Innkuan kipawlnate in; Zomi Innkuan Oklahoma, Florida Zomi Innkuan, Zomi Innkuan DC, Chicago Zomi Innkuan, Dumas Zomi Innkuan TX, Zomi Innkuan Indiana, Jacksonville Zomi Innkuan, Atlanta Zomi Innkuan, Zomi Innkuan Iowa, Zomi Innkuan Texas, Zomi Innkuan Columbus, Zomi Innkuan Portland, Zomi Innkuan Arizona, Zomi Innkuan Utah, Zomi Innkuan Missouri cihte ahi hi.

2008 kum sung in, Zomi Innkuan USA kipawlna in Oklahoma State kumpi thuneite tung panin Incorporation (Kipawlna) hihna dinmun ciaptehna kingahkhin hi. Tuaban ah, USA gam sung a sum leh paai tawh thu vaihawmna khatpeuh ah akisam mahmah “Public Charity” “Non-profit Organization 501(c)3” (Taangpi Kipawlna) dinmun pen, July 01, 2009 nimit tawh USA Internal Revenue Service zumpi panin san’na leh ciaptehna kingahkhin hi.

Tua ahih manin USA gam kumpi tung ah Zomi ih minam min tawh dinmun kician khat a kingahkhin hita a, tua dinmun siksan in ih minam maban tampi a kikalsuan thei hita hi. USA gam sung a om Zomi buppi kithutuak in, kipawlna khat sungah kipawlkhawm thei a, lawng khat in ging in, minam maban ih kalsuan zawh leh Zomi-te dinmun a kitawisang zo ding ahi hi. Agelh: Thusapi, Zomi Innkuan USA