A suakcil naungek bangci kepding? (1) ~ Cing Van Kim

A suakcil naungek bangci kepding? (1) ~ Cing Van Kim

A suakcil naungek bangci kepding?

A. NAU NAWI PIAKNA

1. Nu’ nawizu hoihtak piak nading kigin kholhna
* Nawimuuk-a om vang neute a kikhak loh nading kisil simin nawimuuk sil den in.
* Nawi muuk a tum loh nading in kisil simin dokkhia den in.
* Naupaai laitak puan kigaak lua silh kei in.
* Nau paai laitak le nausuak khitin tha aaom sak nektheih tuamtuam te ne in.

2. A suakciil naungek nikhat bangzah vei pia ding?

* A suakzawh nai lang sung peuhmah in nu’ nawizu pia pah in.
* Naungek kha guk a cin dong nu’ nawizu bek pia ding hi. Nu’ nawizu piak loh dingin a kikham a hih kei nakleh tui, nawivui le a dang tuamtuam te piak kullo hi.

* Bangzah vei pia ding cih ki ciangtan lo hi.
* Ihmu phial mah taleh nai nih hal ta bangin phong in la, nawi pia in.
* Nikhat in a tawm pen giat vei bang pia in.

3. Nau nawi piak zia

* Nau nawi piak ding sim nu in ama’ khut le a nawimuuk silsiang ding hi.
* Na kiu kawmah naungek’ nu om sak in la, na ban tawh naungek’ pumpi bup huai in.
* Naungek’ pumpi le a nu’ pumpi kimat ding hi.

* Nu’ nawimuuk a vom khempeuh in naungek’ kam sungah om kim ding hi.
* Nu’ nawimuuk a muam naungek’ muuk in tuk ding hi.
* Naungek in nawi a valh lam kiza ding a, a gawl kilok ding hi.

* A tawm pen nailang sung le naungek in a kham mateng pia ding hi.
*Nawi a lang khat bebek teep sak lo-in vei le tak khel zel in.

4. Nawi a kham hiam koici theih ding?
* Nikhat guk veipan giat vei bang nawi a teep leh
* Nau in nawi hoihtak a valh lam a kizak leh

* Nawi a teep khit zawh nu’ nawi a nip leh
* Naungek’ cilesa a moisuah sitset leh
* Zun tha-in naudap a kawt leh

5. Nawi a kham loh lam koici theih ding?

* Nawi teep khit nangawn nau in nawi kham meel a puak kei leh
* Naungek ihmu den in nawi piak hun dingteh phot a kul det leh

* Nawi teep khin napi nu’ nawi a khauh velval leh
* Naungek ‘cilesa a guai phianphuan leh
* Naungek in zun a thak kei leh

6. Nawi piak khitteh huih lakkhiat sakna (Burping)

* Naungek in nawi a teep ciangin huih zong teepkha thei a, nawi a teep khit sim huih lakkhiat sak ding kisam hi.

* Naungek na liang tungah bok kawm sakin a nungzang zuut in.

* Na gil tung kingam sak kawmna phei tung tusak in. A mailam tawm awn sak in la. na veilam khuttawh lenkip kawm na taklam khut tawh a nungzang beng kheuhkheuh in.

More: A suakcil naungek bangci kepding? (2) ~ Cing Van Kim

Tung tawi pian sa-in nau nawi pia in la, na piak khit zawh them vei sung tung tawi in. (A ban zop lai ding) Cing Van Kim NB: Hong kidong mun zawdeuh te a kisuak sak ahi hi.