Omna athupit zia ~ Pu Thangboi

Omna athupit zia ~ Pu Thangboi

Kawlte’ paunak khat ah “Nop nasakna mun ah omken la; na omna ding a kilawm mun ah omzaw in” (Piau yar mar ma ni neh; taw yar mar ni) ci uh hi.

Ih omna ding mun koilai ahiam? – Omna ding mun pen khensat hak khe mahmah hi. Khuano pan khuapi zuat ding pen lawp huai in khentat baih mahmah napi khuapi pan khuano zuat ding pen ki ut masa hiaulo hi.

Zi kaneih ding teh ka omna ding mah ka lung hong kham pen hi. Yangon ah innsap luailuai ding lah kum tampi kasin ngeisa khat ahih man in ka ngap nawn hetkei hi. Ka cihna ding theilo kahih man in nakpi tak in thu kanget leh Pasian in ka omna ding mun hong hilh lian hi. Tua pen: “Tonzang ah na innpi uh a om ve leh !” cih hiziau lel hi.

Si leh sa tawh ngaihsun leng bel Yangon ah khangno hun sung teng kum 20 val bang om khit teh khamtung lam leh kahtoh kik ding pen thubaih hetlo hi. Ahi zong in Pasian’ hong sawl ahih man in lungkim tak leh lawp tak in kapai lel hi. Tuni dong ka kisik hetkei hi. Pasian in kei’ ading asia hong gelsak hetlo ding cih ka um mahmah hi. Tonzang ka tun zawh kum 1 khit teh ta pasal khat hong pialian ahih man in ka lungdam mahmah hi.

Kumpite Masa 19:9 b ah Pasian in Elijah’ kiang ah; “Hiah bang hih na hiam ?” cimawk hi. Baal kamsangte Elijah in athahkhitna hang in kumpi Ahab’ zi Jezebel hehlua mahmah ahih man in Elijah thahsawm hi. Tua thu alauluatna tawh Elijah deihtak in taii hi. Ni 40 ataii khit teh Horeb mual tung hi. Tua lai ah Pasian in “Hiah bang hih na hiam?” cimawk hi.

Tulai pau leh “Na bang paak a hih lai tung mawk na hiam ?” “Nang hilai ah kuan hong sam ahiam?” “Bang lau a hai taitai na hiam?” cihna hi.

Elijah i nuntakna sungah Pasian in na lamdang tam sem mahmah hi. Mite in zong muang in lau mahmah hi. Carmel mualtung ah Baal kamsang zali val tawh kito uh a Elijah in zo hi.

Ahih hang: Numeisan khat lau in Elijah hong taii mawk hi. Ih nuntakna sung ah launa akituak theilua hilel hi. Athupipen ah Pasian i dot ding ahi hi. “Topa aw bang cih peuhmah ding ka hiam?” ci a ih dot ding ahi hi. Elijah in zong na dongkha hetlo in na taii ziau mawk ahih man in “Hiah bang hih na hiam?” cih dotna ngah hiau hi.

Pasian in thu asit khit teh “Nang’ tang ding in Elisha sathau nilh o” ciziau hi. Ataktak in Elijah azakia ahi hi. Pasian in midang khat tawh alaih ziau ahi hi.

Ih omna ding mun ah ih om kei leh ki zakia thei hi. Pasian in mi hau mahmah hi. Ong sawlna mun ah ih om kei leh midang khat tawh hong laih thei lua hi.

More: Tuni Tonzang ah thu khentat pawlkhat ~ Pu Thangboi

Tuni in Pasian in “Hiah bang hih na hiam?” ong cikha tam. Ka lungsim ah hong suaklua ahih man hong gelhkhia kahi hi. Genkhialh a om leh ngaidam, Mung Laan Thang (Tonzang, Zogam) July 9, 2029 10:42 PM