Ka mangngilh loh ding ka pa kammalte (2)

Ka mangngilh loh ding ka pa kammalte (2)

Phulum phul hun ciang,

Khuapi guah hong zuu aa, vasate zong a haam uh hong kidangta hi. Nitum kuanta aa, innkim tengah vasate haamin gamlum mahmah uh hi. Innka lamah pusuak kha in ka khuadak leh phulum na phul hi. Innsung lamah taikawmsa in,” phulum phul ei,” ci-in ka awng phei hi. Galkap bang hileh galdo dingin akigingsa tawh akibang ka naute gel zong a tutna pan un thakhat in hong dingkhia uh aa, hai koihna lamah tai-in hai khat tek ka lapah uh hi.

Ka pa un hong mu aa,” Na khawllai kong hilhnop om hi,” hong ci hi. Kei zong,” Pa.. gen mengmeng aw leh phulum na kang man ding hi,” ka ci hi.” Tu ni na top man kei uh hang phamawhlo hi nidang ciangin hong phullai lel ding hi, ka thugen na ngai phot dih un”, ka pa un hong cikik hi. Ka unau thum un thusate kiangah a zusuah/ a niangtui suahkik ding uh a ngente bangin ka pa maiah hai khat tek tawh ka ding uh hi.

Tua ciangin ka pa un thu hong gen a,” Phulum na top uh ciangin kungmui tung(bemung tung) leh leilak khawngah a phiaphia te na muh uh ciangin a tam dingsa in delhdelh kha kei un, tuate na delhdelh uh leh suang suikha in na tuk ding uh a,na ngahsa khempeuh uh na buaksuah ding uh hi. Phulum kua zong masa unla na muh uh ciangin ciang(lawh) tawh phulum kua khuh un. Ciang(lawh) vang pan in hong dawk masa sa na hai sunguh ah khol un, tua hileh tampi na ngah ding uh hi,” hong ci hi. ” Pa.. manta maw ,” ka cih leh,”na khawl lai,” hong ci-in a thu gen hong zom lai hi.

“Nidang ciangin sum leh paai zong in na om hun uh ciangin zong tu-a kong gen phulum topdan ding bangin na hih ding uh hi.Nakiim na paam uh a, mi thugen peuh um in na sep laih kawikawi kei un, na sep na zonkik kal un na lawmten na na semsem ding uh a, a neihsa uh na ki behlap ding hi. No na hih uh leh na neihsa sung uh pan na zatkik uh hong kul dinga,na lawmte uh na phazo nawn kei ding uh hi,” hong ci hi.

Ka pa un hong thugen a man khit ciangin innpua lamah ka pusuah uh leh phulum a na kangta hi. Ahizong in ka pa uh hong thugente tu ni dong in kang nailo a, phulphul lai hi.

Thomas Khanno