Ka lunggulh den khat tangtung ~ Tg. Samuel Nas

Ka lunggulh den khat tangtung ~ Tg. Samuel Nas

I suah ni, zi/pasal neih ni, leh i sihni pen khangkhat nuntak sungah ni thupiak diakte in kiciamteh hi. Ken bel mimal takin ka behlap nop khat om. Ka mi ngaihsan mahmah khat Dr. Ravi Zacharias ka muhkhak ni hi.

Amah US pan hong lengin, ko zong sang khawl sung ci-in Tamil Nadu pan ka va delh suk vingveng uh a, Kerela ah ka va kisutuah uh hi. Ka sang uh pan 670 km. khawng in kigamla in teh. Meileng tawh zan khat bit na pai ung. Vai thupi khat manawh a khualzin ka hih manun lampi pen nuam mahmah lel hi.

Bingphut Ong Kul

Kerela pen tu-a ka paina tawh ka khatvei paina hi a, meltheih kinei mello zawmah lai hi. Theihsunsun Dr. Shashi Tharoor te pawl in lah ong thei peuhmah lo ding uh aihciang a, amau va manawh pongmawk pen ong hi thei sam lo. Ut thu hi nawnlo in tuahthu ong hi zaw ta ahihmanin bingphut “by-feih” policy pen zatloh phamawh ong hi ta hi. Koi ah zintung ding, koi lam mamawh in pai ding cih khawng ngaihsut pak ciang bel lungsim pen zing tuaituai sam hi.

Kerela pen laisiam tamna gam cihmahtak a gam mite thunuam thei mahmah uh hi. Gam mite lamlahna leh google map zangin ka painopnate uh bel ka tungtung zel sam uh hi. Tutung ngaw-ngaw bel Google Map zong ahi ding bang takin kizangkha cih theih.

Ka program uh pen nitak lam pek ahihmanin khuasung vel phot ding cih thusuak ka ngah uh a, vak theihna lamlam ah vak ding cih thukimna lawmpa tawh ka nei uh hi. Tua thukhensatna tawh kizui in ka paipai uh a, a tawpna ah gualgen minthang Kovalam Beach khawng bang ka va tung phei thethup uh hi. Tua laiah sum neih sunsun tawh ann lim nono bang ka va ne phiauphiau uh a, maan bang va kizaih zihziah nong hi ung. Nuam zawzen.

A mun a mual hoihna leh etlawmna te pawl bel tutung i thulu hi khollo ahihmanin suut dah ni. Nai ong cing kuan ta cih ciang, kithawi in Kerela a Hall lianpenpen Travancore International Stadium lam zuan dingin ka pai uh hi. Ko lawmta lawp diak ka hi uh hiam, naikal nih khawngin va tung baih seisai hi ung. Tun baih manin tutna a mailam kingah kha a, ong lemkik bilbel hi.

Dr. Ravi Ka Theih Patna

Tan 12 ka kah lai hi in thei ing, tua pen tuma kum 10 lai khawng pek ong hi kik ta. Lawmte kamkupna pan ka zak hi in, a tungin bel pakta pah khawl het lo hing. Aizong tun ka nung ngaihsutkik ciang, ka pahtaklohna hang pen amah ka tel nailoh man na na hi zaw. Dam damin a thugente ngai in, a thugelhte ka sim zel a, tua panin ka pahtakna khang semsem hi.

Autobiography kigelh limlim ka sim masak pen zong Dr. Ravi a, “Walking from East to West” cih pen ong hi pah hi. Singapore University ah a thugen, “Can man live without God” cihte khawng leh, Yale University leh Princeton University khawng ah, “Why I’m not an Atheist” cih a paper present te khawng pen kei adingin manpha mahmah hi.

Ka college kahlai un (2011-14) Atheist minthang Richard Dawkins, Christopher Hitchens, leh Sam Harris cihte pawl huzap in ko lamah zong Atheism pen ong thang mahmah man sim hi. Amaute pawl leh a kaihzatamte thugelh khawng i simsim ciang i upna pen bang tan hiam ah ong linglawng sak zo veve hi. I Christian upna pen a man takpi mah hiam? Pasian pen om takpi mah hiam? cih dotna khawng ngaihsunin i buai hun tampi ong om hi. Tua laitakin ka upna hong thakhauhsak leh lampi man hong lak, Jesu khephung hong tun pen Ravi Zacharias hi. Tua manin pakta lo thei lo cih ding hi.

Amah na kithei kha kei hen la hi leh, upna lamah lam saupi pial thei ding dinmun ah ana kiding cih khawng ka ngaihsut ciang, ama tungah ka lungdamna lian mahmah hi.

A thu theihna leh a pilna in zong tutan ah pil nopna lungsim hong guan hi. A pilna a lang bek zong kiban leh ei ading hun mahmah ding hiveh aw ka cih hun tam mahmah a, tua in laisim thanopna hong guan zel hi.

Amah Kua Hiam?

Tuhun adingin Apologist minthang pen khat hi ding hi. “Billy Graham of the Intellectuals” ci-in a minvawh pawl om a, minvawh siam uh sa ing. Hih in a hihna leh a sepna tampi tak gen pah hi. Tu-in Pasian na a sepzawh, i Upna uh huu a azin koikoi zawh (defending the Faith) kum 40 bang pha to ta a, nitum lam manawh kuan hi ta mah leh, Pasian in zang mahmah lai hi.

A lawhcinna sut ding tampi om hi. Laibu 40 val gelh khin; A tangval tungin Vietnam gam kha khanlawhna dingin Pasian mizat khat zong hi; UN Prayer Breakfast khawng ah zong thugen in kicial zel hi; leitung a University minthang diak (Oxford, Princeton, Yale) cihte khawng ah zong thu tam veipi gen khin hi; Honorary doctor a ngah zong tawm nawn lo ding hi.

RZIM pen zong ama patkhiat hi in, a thulu pen uh hiveh aw thupi ka sak den khat – Helping the thinkers believe. Helping the believers think. “Thungaihsun mite thu-um mi suaksak ding. Thu-um mite thu ngaihsun mi suaksak ding” cih hi in, ngaih sa ing.

A influence pen mi nautangte tung lamah hat diak cih a kitheihna pen tutung ka program uh zong, a chief organizer pen Kerela Ex-chief secretary nana hi. Tua program sungah Kerela ex-Chief Minister thum bang ong kihel cih khawng hi lai hi. South Indian te politican minthang Shashi Tharoor zong ong kihel kha lai. A circle of influence pen neu lo cih i gennopna pak hi.

Hun Zatzia

Tutung ka thulu uh pen “The Quest For Truth” hi. Tuhun postmodernist world adingin subject poimoh mahmah khat bel hi peuhmah hi. Updan sandan tampi tak om kawmkal ah koi pen hiam Thuman cih limtak a suutna hi pen hi. Thugen pen ong kipanpan ding ka sak leh, a thu ong hial bawl pah mawk hi. Nai ka et leh minute 50 phial a gen khin nana hi. Nuam sa lua, zaknop sa lua, hun beilam zong ana thei lo ka na hi zaw hi. A thugen khit ciang, QnA session minute 30 khawng kizang a, tua teng tawh hun ong bei ziau hi.

A sermon leh interview khawng a 100 a sim phial ngai kha khin ka hihna ah, zak ding thuthak lua bel genlo hi. Aizong i zaksa hi mah leh, a takah ama gen i ong ngaihkik pen a zaknop dankhat ong tuamkai deuh hi leh kilawm hi. Ong sukkhak dan leh i lungkimna pen ong guicing deuh tawh kibang hi.

Nuntakzia ding ong genkhak thu li ong hawmsawn pak hi leng:-

1) Eternity – Tawntung (eternity) mitsuan kawmin nungta ding. I nuntakna tu-a I muhtheih ciang tawh beilo hi. Sihna khen lamah hun sauzaw om lai hi cih phawk den ding.

2) Morality – Man leh man lo a khen ding pen Jesu hi. Jesu in hong thupiak, “Pasian it ding, mite zong it ding” cih pen mah a thupi pen hi a, nuntakzia hoihpen zong hi pah hi.

3) Accountibility – Khatvei ciang Topa mai-ah kiding ding a, i gamtatna tawh kituakin thukhenna om ding cih i lungsim ah koih kawmin nungta ding.

4) Charity – Midangte ading thupha hih theihna lamlam ah mapang ding.

Hih khuam lite tungah na nuntakna uh na lam le uh cin, na nuntakna a manpha suak ding hi cih pen ong kam vaikhak hi.

Program man khit ciang va kichibai hen la, maan khawng va kilakpih leh cih pen ka deihthusam hi. Book signing khawng ong bawl hen la, a thugen zelte “the Problem of Pleasure” “The Meaning of Life” “What a person of Influence looks like” cihte khawng manpha ka sakzia leh ka na metpihzia khawng siam bangbang va kigen leh cih khawng ka lungsim ah om hi. A laibu bawl teng lakah, “The Grand Weaver” pen ka nuntakna lam hong hilh mahmah laibu khat ahihzia khawng zong ka hilh nuam hi. Aizong tua teng bel tutung lem lo hi phot hi. Aizong phamawh sa keng, amah ka va galmuh khak bek zong pen ka lungdam lua khin hi.

Tun amah kum 73 khawng pha ta in, kum bangzah tan a zinzin zo lai diam cih kigen theilo. Ong zin khak sunsun ah, ka va galmuh khak pen ka lungdamna lian mahmah hi. Dam man om ka sa a, lawmte kiangah zong ka kisialhpih den ding khat hi ta hi. Tg. Samuel Nas