Tedim Khuapi ah (06 Oct 2015)

Tedim Khuapi ah (06 Oct 2015)

Thu tawmno khat tawh ka zomi pih teng hih laitawh na dam kim un ci-in
hong hopih masa ingh.

TEDIM KHUAPI AH – Ih theihsa tek mah bangin guahtui tamna hangin,
kipawlna tuamtuam pan haksatna tuakte adingin panpihna kipia tek hi.
Mun tuamtuam a omte mah in ih mipihte ih veitekna hang ahih manin
thupi in, ih kipumkhat nopna hong kilang mahmah hi. Zan deuh in
Champhai pan in ZYA Tedim ah sumtang pawlkhat hongpia uh aa, Tedim
khuapi ah amau lampan a sum kihawmkhiate tawm hong lut sa lua uh cih
hong gen uh hi. Hongpai mi nih hi a ka tuntoh kik uh teh na gen in na
kikum ding hi ung hong ci hi. Champhai te in hong vei cih pak ding hi.
A lungdam huai mahmah khat hi.

TEDIMKHUAPI AH – 4/10/2015 nitak nainih pawlin Rev. Nang Lyan Kap in
ama sang makaihna Timothy ah Tedim khuapi sungah kipawlna tuamtuam pan
leh Pawlpi pan hongsapna tawh kizui in misawm thum bang kipai a, ama
deihna ah meeting ahih hangin, khensat lian cih bang omlo a, a thupi
ama hong sapna pen ah khamtheih kizuak na koici kham zawh ding cih ahi
hi. A pai khempeuh sung pan in thu tampi kigen aa a tawpna ah,
kitelna tawh kisai MP candidates te thugensak ding kilunggulh tek hi.
Hong semkhia dingin ZYA – Tedim te panmun lak kiap hi. Tua ban ah
Tedim Khuapi sunga om, Pawlpi kihel lo kipawlna tuamtuamte kipawlna om
thei leh cih lunggulhna om a, tua ding pen ZYA – Tedim hi leh cih
khutlapna tawh khensatna kinei in, TYF pan mi nih in khut lam lo –in a
dangtengin kilam tek a, mailam ah kipawlna tuamtuamte kipawlna pen ZYA
– Tedim hita ding hi.

TEDIMKHUAPI AH – Nung kaal sungin nitak lam khatin kek hong kia in,
Sangpi khatna huang sung a om singkung nih hong kha hi. Mundang a omte
hong ciah leuh cin, khuahun kikhel pian ta a, hong vot pianin Phalbi
gim hong nam litlit ta hi. Nong ciah khak zenzen uh puan lum hong
kiging ding na hi maw.

TEDIMKHUAPI AH – Palikte omna khang teng lampi kikek zo pian ta uh a,
suangtum cian kipan ta uh hi. Hong man hen la a za hong zut lai le uh
nopci lua mai ding hi.

TEDIMKHUAPI AH – Tan sang kahte sang khakin hong ciah uh a, a gamla
tawh laiphi ( distance) dingte a hih leh laiphi dingin Kalay
University zuanzuan ta uh hi. Tua hangin khangno a lui a thak ki
phamat keei in khua sung bel nuam mahmah cih ding hi. Akluai phei teng
lampi hong hoih piñata ahih manin Mawtaw neute hong lut ta ahih manin
hong khuapisak tuam mahmah hi.

TEDIMKHUAPI AH – ZCD in leilum, lawibual ah, thugenna zong nei a, tha
kingah mahmah hi. A sawtloin Sakollam ah zong hong nei dinguh a, tum
theih a tuamtuam leh, sak theih a tuamtuam tawh kibawlpih kha ngel
ngel ding hi.

TEDIMKHUAPI AH – Tedim a Sangpi khatna vai nung lam in kong gen ngei
pen huhna kingah a, tutphah, sabuai ding pawlkhat hong tung hi. Tua
ahih maninPadenpauh leh kong khak khek zawh ding lunggulh huai mahmah
hi. Hih tawh kisai in, Pa Kimsan in kihel tek ni ci –in mun tuamtuam a
om zomite hong zawn khin hi. Ken zong khat vei hong zawn kik nuam ing.
Paden pauh khatteh Ks. 80,000/- sang tamzaw lo bei ding hi. Ka zo
mipihte aw, ih pilsinna sang hong tul lua mahmah ta hi, khat vei ih
sang innpi ei a neite in, zuunpha kik dingin hong zawn ing.
Lungdam mahmah theih pak teng kong at hi.

Ih omna tekah Pasian in a thupha tawh hong dawntuahtek ta hen maw …..

Tplian
0933395577