Kim Jong Nam kithahna hangin Malaysia gamsung Security khauhsak mahmah

Kim Jong Nam kithahna hangin Malaysia gamsung Security khauhsak mahmah

Malaysia, Kuala Lumpur Airport sungah abeisa Monday (Feb 13) ni in Korea gammi Kim Jong Nam aki suamlup khitzawh Malaysia gamsung luttheihnading Entry Points khempeuh ah Security kikhauhsak semsem cih CNA in genkhia hi. KL Airport sungah akithatlum Kim Jong Nam pen tulaitak Norht Korea Leader Kim Jong Un ii asanggampa ahihi.

Selangor Police Chief inzong Kuala Lumpur International Airport (KLIA) leh Kuala Lumpur International Airport 2 (KLIA2) te ah Passengers alut leh apusuak khempeuh kilim etcik mahmah hi ci’n genkhia hi. Adiakdiak in Kim Jong Nam kithahna vaitawh akizom mipawlkhat Malaysia gamsung panin apaikhiat dingzong patau uh ahih manin Entry-exit Points tengkhempeuh akilim etcik mahmah hi ci’n Bernama inzong Thursday ni in genkhia hi.

Malaysia gamsung aom North Korean Embassy te tungahzong huhna kingen a, hihvai kancian nadingin akisam Information te hongpiaknading uh ki ngen cihi.

Kim Jong Nam kithahna vaitawh Vietnamese Passport atawi numeikhat, Indonesian Passport atawi numeikhat leh Malaysian pasal khat kimankhin phot hi. Ki suamlupna ah akihelding in aki ummawh pasal dangte zong Malaysia gamsung mahah omlaiding in ki ummawh a, Malaysian Police te’n azonsan laitak uh ahihi.

KLIA2 aom Security Officer khat ii genna ah gamsung azinding Domestic Flight ahi zongin gampua azinkhiading International Flight te ahi zongin Departure Point apaikhia peuhmah Security limtak in Checking kibawl ciatciat hi. Airport sungah kithahna hangin Terminal Security pen angei mahbangin limtak in kisemsuak theihi ci’n genkhia hi.

Aki suamlum Kim Jong Nam ii aluanghawm pen Chowkit aom Kuala Lumpur Hospital ah akikep laitak ahihi. Zato huangsung National Institute of Forensic Medicine maiteng ahzong gamsung gampua Journalists tampitak omden uh a, hihvai tawh kisai in leitung in theinuam mahmah uhhi.

Aluanghawm akhei uh “Post-mortem” zong Wednesday ni in kibawlkhin kici a, ahi zongin a Result pen ki genkhia nailo kici hi.

Kim Jong Nam pen Monday ni in aomna Macau lamzuanding in aciahsawm hi a, KLIA2 ah zingsang 8am hunpawl in vanleng ngakin aomlaitak aki suamlum ahihi.

More: North Korea Leader Kim Jong-un ii sanggampa Malaysia ah kithat

Hihvai hangin Malaysia gamsung ah Security khauhsak mahmah uh ci ahih manin, adiakin Malaysia gamsung guklutsawm, gukciahsawm cihte lauhuaituam khading hi. ZD Sawltak #zomidaily