India ah numeino khat pasal 2 in buanhuan in meitawh hallum

India ah numeino khat pasal 2 in buanhuan in meitawh hallum

India gamsung ah numei kibuanvai, Rape vai thuthang khat omleuleu hi. Eastern India aom innsung khatah pasal 2 in numeikhat abuanhuan khit uhciangin meitawh hallum uhhi ci’n Saturday ni in Indian Police te’n genkhia uhhi.

India gamsung ah numei zahmawh vaitawh ki bawlsiatna “Sexual Violence” tammahmah a, hih thupiangpen tunai anunungpen thuthang ahihi.

Hih thuthang tawh kisai in Local Police Officer khatin agenkhiatna ah Thursday ni in numeikhat a innpan in zawhthawh thutawh pasal 2 in man in paikhiatpih uh cihi. Tualai takin numeinu ii a innkuanpih tepen khuasung ah mopawi siim in apailaitak uh ahihi.

Tua numeinu pen pasal 2 te’n India, Jharkhand State sung aom gamsung ah paipih uh a, zawhthawh thutawh buanhuan uhhi.

Hihvai numeinu ii anu apa te’n atheih uhciangin khuasung upa “Local Village Council” te kiangah Complain bawlpah uhhi. Tuaciangin Local Village Council te’nzong Friday ni in tua mibuan mi 2 te daan piakna in 100 vei “Sit-ups” bawlsak uh a, tuaban ah India sum 50,000 Rupees (US$750) zong liausak uhhi.

Village Council upa te’n khuasung ah buaina aom ciangin India gam ii Judicial System pen zanglo uh a, amauthu tawh khuasung ki ukna nei in, daan piakna neitheizel uhhi.

Police te genkhiatna ah tuabangin Village Council te’n daan piakna khauhtak in apiak uhciangin mibuan 2 te lungkimlo uh cihi. Tuaciangin mibuan te’n numeinu ii anu apa te benggawp uh a, tuakhit ciangin numeino pen meitawh ahal uh cimawk hi.

Local Police Station panin Officer asemlaitak ahi Ashok Ram in agenna ah mibuan te’n numeino ii anu apa te’n benggawp in, tuakhit ciangin numeino aomna innsung ah taivingveng in tua numeino pen mei ahal uhhi ci’n genkhia hi.

Hihvai tawh kisai in hoihtak akancian dingin Special Investigation Team zong kikoih khinta cihi.

India gamsung ah tunaisawng Sexual Crimes atam mahmah laitak ahihi. Press Trust of India te pulakna ah Southern Pradesh State sungahzong pasal kum 55 aphakhinkhat numeibuan ci’n kingawh ahih manin, amahleh amah ki sihbawl hi ci’n genkhia uhhi. Tua buan athuak numeino pen kum 9 bekbek aphapan khat kici hi.

More: India, Delhi ah naungek kha 8 bekbek aphapan khat buanthuak

Jammu & Kashmir khuasung ahzong kum 8 aphapan numeino khat pasal tampi in buanhuan (gang-raped) in thatlum sawnsawn uh ahih manin, tuavai tawhzong abeisa sungteng mipi lungkimlo in, India gamsung muntuamtuam ah lungphona akineih kawikawi laitak ahihi.

India gamsung ah abeisa 2016 kumsung in zawhmawh vaitawh buan athuak 40,000 Case tak om cimawk hi. Tuazong kumpi thunei te tungah aki Report lo tampi omdingin ki ummawhlai hi. Sawltak #zomidaily