Covid-19 Update: White House Press Briefing pan atheihhuai thu pawlkhat

Covid-19 Update: White House Press Briefing pan atheihhuai thu pawlkhat

– Coronavirus stimulus package pen Senate ah a “deal” uh akikup lai tak hi aa, innkuan kim sum ngah ding cih te bangmah kitel nailo hi. President Trump in belh ahoih pen hih ding lamen ing ci hi.

• – Student loan payment khempeuh ni 60 sung interest omlo ding hi.
• – Canada leh Mexico gamgi teng kikhak ta aa, vai thupi nei te bek kilutsak ta hi.

– Secretary of State Mr. Mike Pompeo in US gam pan gam mi te koi mah zin khiat loh ding genkhia ta aa, Leitung gambup aa aom US gam mi khempeuh amanlang in hong ciah nangun taangko khia hi. Tua ahih manin U.S gam pan mundang peuh mah zin khiat nawnloh ding hi phot hi.

– President Trump in nung deuh in “Families First Coronavirus Response Act” cih sign thu khin aa, tua tawh kizui in COVID-19 hangin na i sep zawh nawn kei leh i nasepna ciat ah “pay sick leave” atawm pen ni 14 pan atungsiah kila thei ding hi. Khuan i lak sungin sum zong hong kipia ding hi. Ahi zong Covid-19 hangaa nasem zo lo te bek huam ding hi.

– President Trump in Covid-19 free testing ding zong sign thu khin aa, Covid-19 test abawl peuh mah amawkna hi ding ci hi. Mi tampi test akibawl theih nang “testing site” zong mun tampi ah kilam ding hi. Natna symptoms hong lak kei aa na ci adam nak leh test va bawl kul lo ci hi. Gentehna – Puukkhuh (cough -flu) mawk mawk te zong phamawh nailo aa, pukkhuh leh cisa, naklah cih te akigawm leh belh test bawl pah ding dan ahi hi. Pasian hehpihna tawh i ci adam nak leh test bawl kul lo aa, i inn tek ah i om ciat phot ding ahi hi.

– Tax return filling date “deadline” pen April 15 pan July 15 ah kikhin to ta aa, IRS website “www.irs.gov” tungah zong kien thei hi.

– New York leh California county tampi ah “shelter-in-place order” kipia in lock down kibawl ta hi. Vai thupi aom kei nak leh Inn pua lam peuhmah pusuak lo ding cihna hi. Ei ma omna ciat ah zong tua dan hong tung thei ding ahih manin na khempeuh kigin huai hi.

** Inn ah i om ciat leh zong thu gen in i innkuan pih te tawh a nuam thei thei in i om theih ciat ding thupi mahmah hi. Launa leh patauh luatna te i neih luat loh ding leh Pasian muangin thu i nget ciat ding kisam mahmah hi. Khat leh khat zong phone tawh kiho pih ciat in tha kipiak ciat ding zong kisam mahmah hi. Hih hamsatna pi asawt lo in hong bei sian nang nakpi takin thu gen ciat ni…*** Thomas On S. Mung (Washington D.C, March 20, 2020)