Dahna nungsangah lungdam kohna ~ Hau Za Cin

Dahna nungsangah lungdam kohna ~ Hau Za Cin

Ka pa, Pu Pum Do Lian (74) in April 26, 2015 Nipini nitak nai 3:30 in ka khua uh Murlen, India pan lamet hetloh laitak a hong nusiat vat ciangin a theikha khempeuh in hong delh in hong tutpih in nong hehnem uh hi. Tua hun laitak in kei Zosuan Tuailai Khawmpi zangin Tedim ah ka zi Vung Deih Cing Valte tawh ka om uh hi. Ka pa hong nusiat thu telephone tawh hong kihilh a, a zing ciang sun 12 in kivui ding ahih manin a luang lap in ka delh thei kei uh hi. A thei kha khempeuh in hong delh in hong hehnem in hong khamuan uh hi.

A luang delh leng laplo ding ka hih manin Tedim pan ciahsuk in Tahan a ka Ni Cing (Pi Nuam Ngaih Cing) kiangah ka pai hi. Ka pa kivui hun India sun nai 12, Kawlgam nitak nai 1 in ka Ni Cing te inn ah Sia Job Thawngno makaihna tawh hun bawl in Upa Vial Khan Do in hunuk hi. Meltheih u leh nau a za kha peuhmah in hong delh in pawlpi mite zong tampi mah hong tu in lungzuang hetlo in hun ka zang uh hi.

Kawlpi ah ka taam sung un a za kha peuhpeuh in hong delh in hong khamuan uh a, hampha ka kisa a, Zomi ngeina kikemcing lai in a dahte dahpih hi hang ciin ka ciamteh hi. Zangkong ka tunsuk ciangin zong vanlengtual ah hong dawn in, a za kha khempeuh in hong delh in nong tutpih uh a, thungetsakna leh khamuanna thute nong gen uh hi. Hampha kisa in ka angtang mahmah hi.

Singapore tungsuk in Zomi Innkuan Singapore in vanlengtual ah hong dawn in, nitak ciangin inn ah hong tutpih in nong dahpih uh a, nong uap, nong kithuahpihnate khempeuh uh manpha sa in ka angtang mahmah hi. Tua nitak a hong pai manlo te zong a banban in nong pai ngelhngelh uh a, tuni dong kitatsat nailo ahih manin Zomite in nong itna te uh ka tan khempeuh hangin ka lungdamna ka gen zo kei hi.

Ka nungsang delh in India ka ciah a, Kolkata ah, Aizawl a, Champhai ah, Murlen ah a za kha khempeuh in hong delh in hong khutlet uh a, ka pa hanga hizah itna leh deihsakna ka tante in hong khamuan in ka angtang mahmah hi. Tu in Singapore tungkikta in inn ah ka om ciangin zong telephone tawh hi in, pumpi mahmah tawh hong delh ahi zongin itna ka ngah khempeuh — note tungah lungdamna gen zawhloh ka nei hi. Topa in note khempeuh thupha hong pia in hong ompihta hen cih ka thungetna leh ka deihna hi.

Ko innkuan leltak hizaha nong it uh cih ka ngaihsut ciang Pasian pan hong pai itna hang bek hiding cih ka ngaihsun hi.

Minam adinga ka hih theihzah vua ka nupa vua ka kalsuan laitak vua ka pa in vantunggam hong zuatsan cih ka zak uh ciangin Topa gelna lamdang ka sa uh a, ahi zongin minam a bawl Pasian in Zomite itna a kicing ka tanna ding vua a lemgel hiding in ka ummawh uh hi. Hizaha itna ka tan uh pen ka khantawn un ka mangngilh ngei kei ding uh hi. Na vekpi un mimal, pawl min ka gen khin zo kei ding uh hi; ahi zongin, note:

• Mimal a hong dahpih a, khutguak hetlo a hong delhte;
• Kipawlna mina hong dahpih, hong tutpih leh galna hong neite;
• Pasian nasem siampi puansilh a hong tutpih, khamuanna hong gente;
• Khua leh tui mina hong dahpihte;
• Biakna pawlpi min a hong dahpih hong uap, hong phawkte;
• Leitung kiuli pan email, facebook, telephone, viber, whattsapps, etc tung tawna hong dahpihte khempeuh leh a dangte khempeuh….

Na vekpi un Topa in a zah tampi in thupha hong piata hen. Ka innkuan min un lungdamna pulak in lungdam thu kong gen uh hi. Nong it, nong ngaih uh leh nong dahpih uh; Ka pa Pum Do Lian innkuanpihte khempeuh tangin, Hau Za Cin