Hluttaw ah Pi Cing Ngaih Mang thusunna (May 28)

Hluttaw ah Pi Cing Ngaih Mang thusunna (May 28)

May 28, 2020 ni in Pi Cing Ngaih Mang (ZCD teelcin MP, Tonzang) in Hluttaw meeting 16 veina, ni 6 ni ah mipi tangin thusunna limtak nei thei hi, cih kiza hi. A thusunna pan mipi theih ding a kilawmte anuai abang hi.

Myanmar kumpi in gambup an khingkhamna ding leh lokhawhzia khantohna ding ngimna (National Food and Agriculture System Project) a neihte a taksuah theihna dingin gambup President in World Bank pan $ Million 200.00 leitawi ding thu pen thuhoih mahmah hi, ci-in ka thukimpihna hong pulak nuam ing.

Hih sum teng hong tun ciangin zekzia ding nampi thumin kikhen cih thu leh Tedim leh Tonzang kihelin Chin State khuapi mun 9 leh gambup mun 28 ah 2020 kum June kha pan kipan 2025 kum June kha sung tengin gankhawina, lokhawhna leh leilet bawlna cihte ah nampi thumin khenin kizeek khia ding ahih manin lungdam huai ka sa mahmah hi. Hih kum 5 sungin project huam sunga om mipite nuntak khawsakna tampi khangto taktak ding hi, ci-in ka lamen hi.

Hih project tungtawnin a mun leh a mual zui a lokhawh singpuakzia tuamtuam a omte tampitak in khantohpih ding hi. A diakin keima constituency huam Tonzang gam hi ta leh Chin State nek leh dawn pen a tamzaw Sagaing leh Magwe panin kilasawn ahih manin nektawm zonna haksa tuam mahmah hi. Tua hangin Chin State pen Myanmar gambup ah nek leh dawn van man tam a man pen khat suak hi. Pupa ngeina zui a lokhawhna hangin annek tuidawn kham khop a kingah zawh loh kum tampi pai khin ta hi. Tu-in ahih leh hih project tungtawnin Chin State ah nektawm zonna tampi nuamtuam ding ahih manin ka lungdam mahmah hi.

Tua banah guntui leh luitui kilak theihna munte pan tuibem bawlin tua pan leilet buhciin theihna leh khai ciin theihna tampi hong lem tuam ding a, tulai pilna tawh kituak a sepkhiat theihna dingna tampi kisemkhia thei ta dingin ka lamen hi. Chin State sungah coffee, zawngtah, thawhbat, lenggah, apple leh wah oh cih bang khaiciinnate limtak tulai pilna leh vanzat hoihte zangin kisem to thei lai leh tualsung bek hi loin mundangah zong tampi kizuak thei-in summuhna kibehlap ding hi.

Gankhawina ahi bawng, sial, lawi, vok, ak, kel cihte ah zong tutung project tungtawnin pilna leh siamna, gante cidamna ding kepna leh dalna cihte ah zong tampi nuamtuam dingin ka lamen hi. Tonzang khuapi bang hi leh nidangin nailung khawi minthang mahmah hi. Mawtaw lampi kizopna a hoih loh man leh thutuamtuam hangin nailung khawi nasep vai hong dai dide hi ta leh tuni ciangin hoih tak kisem thei hi leh tualsung pan gamsung gampua dongah sumzuak sum lei theihna piang ding hi.

More: Tulai Zogam kumpisung thuthang tawh kisai vuanzi Pu Pau Lun genna

Lokho mipite nuntakna kitawisang zo leh gambup nuntak khawsakzia zong a khangto hi pan ding ahih manin President in World Bank pan $ million 200 a leitawi ding ka thukim mahmah a, a zat khiatna ah zong ip sim sel sim cihte om loin mipi tungah muitun takin hong kizeek khiat ding ka lamen hi. Source: The Tedim Post