Pu Thang Congratulate theipan ing

Pu Thang Congratulate theipan ing

Zan nitak (Kawlgam ading tu zing) in Pu Thang (Pu Chin Sian Thang, Elected MP) tawh kiho in Congratulate theipan ing. Amah pen Campaign a zinna sungpan tawllua ahih manin na damphalo a, ka kiho ciangin adamkikta nahi hi. Zomi-te’n tangthu thak khat a gelh hihang ci in na lung dam mahmah hi. Vote hong pia Zomi khempeuh tung ah lungdam mahmah ing ei cici hi. Tuipi gal khatpan hita leh, gamsung gampua pan, gam leh minam na it manun, a thu tawh ahi zong, thungetna tawh hong panpih akua mahpeuh tungzong lungdam ing cih thu na gensak kawikawi in ci.

Asawtlo in lungdam kohna hun khat nabawl nung in, lungdamna thute hong suutkhia nung, thungetna la in Pasian tung ah lungdam kohna zong na bawl nung hong ci hi. Mai kum sungin gamsung gampua pan kikaikhawm in Zomi khawmpi khat bawl ding na vaihawm nungin, hong ciah ngeingai un cih a lawpna thu hong genbeh hi.

Ka kiho madeuh in, Pi ASSK in Kumpite Laikhak puakkhin a tua thu ka kigenman uhhi. Thukhun bang hileh, March kha kiim a Kumpi Za a kisuan ding hi in, NLD Party in tu kikaal sungin kiginna neinuam uhhi. Kumpi Za aluah thei dingin kiging nuamta ahih man a, Galkapte leh tu a Kumpi in a Za hong ap takpi tammaw cih leh tu a Kumpite lungsim theinuam a, Pi ASSK in a sinna ahitam maw, hih Laikhak tawh kisai a dawnkikna tungtawn in tu kha thum sung bangci kalsuan ding cih geel theipah ding hive’n, hong cipah bilbel in, Sitni pilna leh Gam Thu atelna teng thupi ka sa hi.

Chin State sung a Kumpi phuh ding vai tawh kisai ZCD Party in bangci kalsuan ding cih thu ka hemdot a leh, NLD Party tawh a pangkhawm hive hangin, tu’n ei ZCD Party pan MP tengtawh Kumpi a kilam thei ding suak in, ih liangko tung ah Topa’n tavuan hong suan hi ei, asawtlo in Chin State NLD Makaite leh Gambup NLD Makaite tawh na kithuza nung, zing leh thai ah, Yangon lamzong Party pan khat na tusuk nung, cih thuteng hong gen ei.

Pu Thang in abeisa kum tampi sung haksatna athuaknate kantan in tu in Minam Maban lianpi asepbeh dingin MP in akiteel hi a, a Maban lian mahmah, sah mahmah, a Vai tam mahmah hi. Cidam thahat sinsen in ma hong pangin, pilna siamna kicing semsem angahna dingin anungta Pasian tung ah thu ngetsak huai mahmah hi. A kalsuan luhekna a kipan, vai lianpi a hawmna khempeuh ah Chin State leh Zomi buppi tang’in thu leh la avaan ding suak ahih manin, a mawhpuak lian mahmah hi.

Tua tawh kituak in, a mipih Zomi buppi in limtak in panpih in, tha pia a, thu ngetsak ding kilawm ka sa hi. Kiteelna thukhun tawh a kitukalhlo, Zongeina kimuakzia zui in, Pu Thang leh teelcign ZCD MP teng, pahtawina, muakna leh lungdamna lahna in khuttawi bang aneih huai in ka ngaihsun hi. A thupi ah, ih kiim ih paam a nam tuamtuamte etteh in, Minam Makai in mipi in ih teel ahih ciangin, ama nung ah thuap a, a makaihna ih zuihsiam ding kisin huai mahmah hi. Mothak et bangin koiteng ah hong khial tammaw, a sem thei takpi tam, a bang munteng ginalo hiam cih lam ah kipanglo zaw a, Pasian in Makai ding in siam in, Mipi in teel ihhih ciang, thupha pia in, panpih ni cihtawh a kihanthawn hihang ei.

GSKhup
Tulsa, OK