Dollar zakhat in ka hihna hong telsak! ~ Zomi Quavadis

Dollar zakhat in ka hihna hong telsak! ~ Zomi Quavadis

Gitneih loh takin ka phone hong ging vauvau hi. “Hello” ka cih pah seisai leh ong hopihpa in “Tumahmah in Kawlpi vanlengtual ah mangkangte thum va dawn inla, tua thumte lakah a samsau numei pen nang kithuahpih ding ahihi. Amau pen Zogam sung en nuam a hong pai a hi uh hi. Limtak in na etpih in maw” hong ci hi. Kei zong “Hi ta vem!” cih kawmin ka mawtaw sitaat in Kawlpi vanlengtual lam ka zuan suk pah hi.

Amun ka tun ciangin vanleng na tu khin a, vanlengtual pua ah mangkang numei samsau khat in a van teng tawh minute 20 sung dektak ong na ngak khin ahihlam ka theih ciangin ka kisuang simsim hi. Kimeltheihna ka bawl khit uh ciangin namdangte Hotel a hilo Zomi te Hotel ngiat Taungzalat Hotel ah tam bei ta leh ka tungsak hi. Zinmuakte zong mangpau na siam peuhmah uh hi. Ka Phone numbat ka piak khit ciangin “Na vaak nop peuh ciangin hong sam in maw” ciin ka ciahsan kik hi.

A zingciangin hong sam pah a, ka mawtaw tawh paisuk in ka pi hi. Tuani pen Tedim Township sungah mun minthang zaw deuh teng ahi “Paha Sialkong, Gullu mual, leh Zozaang khuakhung mualdawn a Pu Pauboih mual akici leh a geia RCte singlamteh phuh agolpi zong ka etpih hi. Mangkangnu in thangah mahmah hi. A paina peuh manzaih kawikawi in, ong dotnop teng zong hong dongin Video zong ka kizaih pahpah uh hi.

Tua banah Zogam tuikhan laia tui kicingh pen zong ka etpih a, lamdangsa bilbel hi. Tuikhanna hanga gentuakte khuathak satna cihte zong ka etpih kawikawi hi. “Mun dangdang ka muhte sangin tua nong etpih teng thupisa zaw ingh. Ka lungsim hong su kha mahmah hi” hong ci bilbel hi. Bangci lam in a lungsim su kha hiam bel thei khang maw! Zozaang khuanawl a Tuitawnglui a cih zong a thu leh lui lamdang a hihna limtakin ka gen hi. Lamdang lah sa, zaaknop lah sa hiding hiven a mittang bang kia khia dektak zawzen hi. Mun thupi tampi ka etpih khit ciangin a nikhatna ka khin uh hi.

Tuani zan amah limtak tawlnga in kei ka innlam ah ka ciahto leuleu hi. A zingciangin Tedim lam ah ka kimasuan to leuleu uh hi. Zingsang lol ka hihman un Taingen ka tuntoh uh ciangin annek ding na om nai lo hi. Pasian thupha tawh gataamciim leh vaimimciim na om bilbel a, zasanvui sansitset tawh naptui tolh liangin kuang khat tuak ka viik uh hi. Lampi pen theihsa mah bangin Falam lamkaa dong vomto dilhdelh a, Tedim lam ka pial phei uh ciangin suanghum lak vive ah kising let-let in ka pai uh hi. Guahtui luang lo bilbel ahihmanin phadawm hi. Vui tam bilbel cih ding hi.

Thangmual ka tuntoh uh ciangin mangkangnu sam sangin ka sam na kaang zaw lianga ka kinuih sansan uh hi. Thangmual dawn ah khe tawh kahto in, a dawn tuaivum ka tun uh ciangin Titanic sunga danin a nunglam pan a khut nihte letsak in Thawnkham Zogam ngaih la ahi “Zogam aw ken hong ngai ingh, Zogam aw ken hong it ingh” cih la ka sakpih leh tha hong ngah peuhmah hi.

Maan pong 100 bang ka kizaih zawzen uh hi. Tedim ka tun uh ciangin Zomi ansai khat ah a so velvel aksa Zohuan tui hawp in buhsihsa vatvat tawh ka ne khawm uh hi. Ka paina khempeuh vuah Zo- an vive bek ka neekpih hi. Tedim Sanginnpi te, biakinn hoihnono te zong ka etpih kawikawi hi. Tua panin Tonzang lamah ka pai leuleu uh hi.

Lampi bel theihsa hizel lel hi. Etpih ding teng khempeuh ka etpih khit ciangin Naakzang khaulei zong ka etpih a, letmat leiin khau tawh luigaal ka kaipih hi. Lam tawntungah mangkaangnu in “Nasia lua, Nasia lua” cici niloh hi. Bang lamah nasia sa hiam cih thu bel ka dong ngam kei hi. Tonzang ah kilehkik in Hotel ah ka giak sak a, kei bel Tonzang topa tawh kimeltheih ka hihmanin a inah ka giak hi. A zingciangin Kawlpi ah ka kilehkik uh hi.

Lam kaalah Khaikaam University ka etpih hi. Tutung bel “Nasia lua” tam cih lo hi. Bang ngaihsun ahiam thei keng, pau vet lo in khua dakdak mai hi. “Gim pian hi niteh maw” ka cih zong hong zaak tuak lo hi. Tawmvei ka om sung un a muhnop khollo hon khat mu man ka hihmanun ka mawtaw sitaat kik in ka ciahpih vingveng hi. A zingciang a ciah ding ahihmanin tua zan an ka ne khawm uh a, Zogam thu ka theih bangbang ka gen hi.

Zomi te’n MP guk ih neih manin lametna lianpi ih neih vai khawng ka genpih hi. Taungzalat Hotel innkhum zaangah tu khawm in khataang silsial ka en khawm uh a, thu tampi ka kikum khawm uh hi. Tutung bel nuihna tam nawn het lo hi. Nai 12pm hong saat petmah ciangin ciah dingin ka kithawi hi. Ka ciah ding ciangin “Zingciang hong kha kik hamtang in maw, ong ngak ding hing” hong ci hi.

Zingni hong suak a, zing niangtui ka dawn khit ciangin Taungzalat Hotel ah ka pai leh innkong ah aman nong na ngak khin hi. Vanlengtual lam ka zuan phei pah uh hi. Vanlengtual sung a lut ding ciangin ka khut hong len in ka liangko tungah tawmvei hong kingaisuk hi.

Tua khit ciangin a mitnuai kawm in “Hong phawk tak ning ei” hong cih khit ciangin nunghei nawn vet lo in hong lutsan vingveng hi. Mual a liam khit ciangin ka khut a hong humsak bang hiam cia ka et leh US Dollar zakhat ong pia na hi gige hi. Tua sum in nithum sung ka kithuahpih, thu leh la tampi ka kikuppih mangkang nungaknu a dingin zinlamlak (Tourist guide) khat lel ka hihlam hong kiphawk sak kik hi. By Zomi Quavadis