Football thu a gen sawm ka hi kei hi. English Football ah tuma deuh leh tulaitaka England Team te pen thukizakna saite (journalist) in, “The Golden Generation” ci uh hi. Tua lak ah a kihelte pawlkhat David Beckham, Paul Scholes, John Terry, Frank Lampard, Steven Gerard, etc leh a naupangpente Wayne Rooney leh Joe Cole te ahi uh hi. Hih khanghun sungah a kimawlte pen England in 1966 kuma WC Champions a ngah uh pan team hoih penpente hi in a kingaihsun ahi hi. Tua manin FIFA WC Germany 2006 ah zong lametna lianpi nei in Champions ahih kei leh Final tan tung teitei dingin (Zomi Comedy sungah Boxing champion ding a ki umpa mah bangin) amau zong ‘a ki um kingkengte’ ahi uh hi. Ahi zongin tragedy struck and Rooney got sent off…. and the rest is, as they often said, history.
USA te in zong Greatest Generation cih bang na nei uh a, amau khangthu a sut uh ciang tua huna khangte tua bang matutna nei uh aci uh hi. Ko, India gam, tu laitak in Information Technology ah ka mabut laitak uh hi a, IT Generation kici thei mai ding hi. Gam tampi ah India pan IT skills tawh nasem tawmlo hi. IIT Kanpur ah ka lawmpa khat pen Hyderabad, India ah college a kah lai un amau batch pen tua college history ah laisiam penpen batch hi ciin kiciamteh hi. Ko zong, ci laizang leng, Hnahlan ah High School ka kah lai un Murlen khuate peuhmah in 1,2,3,…. kigual suk diudeu den ka hih manun Hnahlan khua inn 500 in Murlen inn 80 pen hong simmawh thei hetlo uh hi. Tulaitak Lamka CBA pawlpi mi sung pan Ph.D. ngahsa khangno mi 3 in India gam University ah Professor sem uh hi. A pawlpi bup uh mihing tul 4 (4000) phalo maithei hi. Khangpha i cih Golden Generation i cih tua hilo hiam.
Hong Kong ka zinlaia ka lungsim ah hong suak khat pen hih hi. Khatvei thu a Zomi hizah Lai Siangtho sangkah gamdangah ki om cih pen ka ngaihsutna a sau sak mahmah khat hi. Amau pen tuhun adingin, ei Zomi te adingin i Golden Generation te hilo uh hiam ka ci hi. Hong Kong ah Lasiam Sia Lianpi (Tang Lungtup), M.Th. sinlai hi a; Sia Mangno, M.Th. mah hi a, Sianu Man Hau Cing, Th.D. hi a, Sia Dal Mang, M.Th. mah hi a; Philipines ah Sia Thang Cin Lian, D.Min. hi a, Siamah Cingkok, Ph.D. hi a; Korea ah Sianu Zen Dot Mang, M.Th.? hi a, hi a, hi a…. ka ci toto hi. Tua hun lai leh tua madeuh in Singapore ah Sia Khoi Lam Thang, Sia Tua Mung, etc cihna zong na om hi. Tua bek hilo, a gen uh ciang a pai nailo (tua hun in), Sia Nang Sawm Piang, Sia Go Van Mung, etc cihte hilai hi. Tua bek hilo lai, kawlpi ah ka muh Sia Cin Ngaih Thang, Sia Mun Thang, Sia Hen Khan Go, leh a dang tampi om hi. Hihte khempeuh ka ngaihsut ciang Topa Pasian in Zomi te zong Ama nasem dingin Golden Generation cih theih ding hong pia hilo hiam, ka ci hi.
Golden Generation cih ciangin khangkhat hun ah a khangkhawm a muanhuai mahmah, amau sepna peuh ah a lawhcing khawm, a muanhuai khang cihna hi. Sia J.M. Ngul Khan Pau te Lai Siangtho sangkah laiin zong amau khangual pen a khauh pai mahmah hihtuak hi. Sia Dino Tothang pen EFICOR ah General Secretary hi a, India gambup leh gamdang tawh kizopna ah a lianpen (i theihsiam pakna dingin) hi a, Sia Kabi Gangmei pen Baptist World Aid ah a lianpen hi leuleu hi. A dang zong omlai. I gennop zawk pen in ah khangkhat hun ah a khangkhawm lawm leh gual kihual deuh om a, tua bang khangpha (good generation) pen tam mahmahlo hi. Tua bang khangpha hun ah a khang khate hampha mahmah uh hi.
India gam hi in, Kawlgam hi in, gamdang ah hita leh i khantohna upate kammal kawm leng, ‘muh theih in khang’ hi phial hi. Lamka khua sung bekbek pan India gam sungah kumpi u lian a sem tawmlo hi. Kawlgam pan Pasian mina kalsuanna lian pipi a nei tawmlo hi. Hihte khempeuh ka ngaihsut ciang a mawkna in a kingah hilo ding cih ka upna om hi. Pasian in hehpihhuai ciin hong pia phei pak zong hilo kha ding hi. Thumanna leh Cihtakna khahsuah ngei kei inla, cih kigelhna Lai Siangtho i neihma pek in thuman thutak tawh a gamta minam ihih manin tuni in a manpha mahmah leh a khangpha mahmah hun Golden Generation hun ah Topa in hong sangkhai hilo hiam ka ci hi. Hun pawlkhat ah kiim leh pam huihnung hangin luvaih hun leh mangsia man banga i mengmet hun om kha ding hi, ahi zongin tuate in i lungsim hong hencip lo in i neihsa, i go, i van manpha thumanna leh cihtakna hangin mailam ah zong Golden Generation tampi i neih toh zel ding ka lamen hi. Na ngawng ah awk in, na lungtang tungah gelh in, cih i laibu i neihma, tua laibu sung pan i sim teekteek ma pek in i neihsa, i awhsa, i lungtang ah i gelhsa thumanna leh cihtakna a khahsuahlo dingte ihi hi. Tua khempeuh pan hong pai thupha ahi Khangpha, Golden Generation, a kibansamlo dingin Topa’n hong pia thei hi.
I phawk tawntung dinga hoih kasak bel – hih bang Golden Generation hong pianna dingin a pattah mi om hi. Makai thupi i cih in amah a laih thei ding, makai a sem thei ding mi tampi a sek khiate hi a kicih mah bangin hih Golden Generation hun ah zong a piangsak makai om hamtang ding hi. “King” a om theihna dingin “King Maker” a om kul hi kici a (politics vai ah), tua banga King a pianna dinga a kimulo ah a gim, a tawl, a pantah khat na om hamtang takpi hi. King i hih khit ciang King Maker i sep kul hun hong om dinga, tua hun ciang khangthak khangpha hong pian kik den theihna dingin ei zong King Maker hihding lungsit kei ni. The earlier the better (Makai thei ding a khangno theithei sekzo leng hoih hi).
Golden Generation omsak den ni.
Hau Za Cin
Phuitong Liim
Comment piaknop aomleh...