Nigeria leilu lamah Suicide Bomb puak

Nigeria leilu lamah Suicide Bomb puak

Jan. 16, 2017: Tu ni-in Nigeria leilu lam-a om Maidugiri khua-a university campus sunga om biakinn (mosque) ah sihpih bomb puaksak numei khatin bomb puak kham sak a, mi li a sih banah mi 15 in liamna tuak hi ci-in Maidugiri khuamite leh university lecturer ten AFP news agencyte kiangah gen uh hi.

Bomb puaksakte kuate gamtatna hiam cih a pulak khia kuamah a om nai loh hangin numei no leh numeite sihpih bomb puaksak dinga a zang den Boko Haram Islamic ngontate gamtatna dingin ki-ummawh hi.

Al Jazeera reporter Ahmed Idris in Nigeria khuapi Abuja panin a genna ah tu nai diakin Boko Haram ten a bukna uh Sambisa gammang tampi khahsuah uh ahih manin (tu-in galkap ten uk ta) galkapte tungah phuba lak kikna dingin hih bangin ngongtat uh hi ding hi ci hi. Boko Haram makaipipa Abubu Shekau in amah a gumte kiangah bomb, thau leh mipite suamin a kihinghallupna dingun kunh hi.

Borno police spokesman Victor Isuku in bomb puah mai-in biakinn ah sihpih bomb puaksak numei kum 12 kiim university sungah 04:15 GMT pawlin lut sawm a, a kawnga kikhih IED [improvised explosive device] bomb puaksak in si hi ci hi. Biakinn ah bomb a puak khit a sawt loin university sungah bomb khat puak kik leuleu hi ci-in gen beh hi. A site lakah university professor khat leh a bomb puaksak nihna pen kihel a, liamna tuak mi 15te UMTH [University of Maiduguri Teaching Hospital] ah kipuak hi ci-in gen thuah lai hi..

Hih Maidugiri University a kisuam hangin zing ciangin university laivuanna ding a kigeelna bangin kinei veve ding hi. Boko Haram ten 2009 panin Nigeria leilu lam teng ah Islamic thukham khauh mahmah Shariat Law kici tawh ki-uk ding deih in kiphinna na pan uh a, tu dong mi 20,000 valin sihna tuak khin zo a, 2.6 million in teenna ding kician nei loin om khin ta uh hi. Source: Al Jazeera and news agencies/ Thang Khan Lian