Leitung Khatna – Gam Thumna Zomite ~ Pu Zokhai

Leitung Khatna – Gam Thumna Zomite ~ Pu Zokhai

Gam Thumna gualgen vaangthang USA, AUS, CAN, NZL, Scandinavian Gam tuamtuamte-ah teéng-in nuntaakna thak akipan Zomi sanggamte-in theihding leh zuihding-a akikhung I’ teénna gamte’ thu-omzia, thukhaám leh daanseh (ethic) tuamtuamte naaákpi-in kisam kasa-hi.

Tuakawm mah-in Zomi Pupa’ Ngeina hoihte-tawh kopkhawm lehang naákpi-in etlawm-in piicing ding-a, hongki deihgawh zahdong-in midangte’ lak-ah kilangh dinghi.

Zii leh Pasal Kaalthu Kizopna (Relationship Between Husband and Wife)

Zomite ataangpi-in gam thumna I-tun takciang-in “Numei’ Thuthu Zuihding” sakha uh-a, nupi khenkhat inzong “Kei’ Thuthu, kei’ tung-ah thuneihna nei keiteh” cih lungsim puapah liinleen thei-hi. Numeite’n phulaákna daan-in apasalte-uh a-ut bangbang-a cih guapguapna hong-om takciang-in pasalte’n thuaklah-in khutkhial nangawn dinmun atung tampi omhi.

Khutkhial hiamgamh-a pasal hong-om takciang-in palik sap (dial 999, 911, 000) cihte meekding alawplua bang-in meekpah kankan-in intervention order khawng upmawh lohpi-in ngah ek-ek cihkhawng Zomi sung-ah omta-hi. Hihte-pen alaklawh tak-a thutheihna ziak ahihi.

Nupa kitawng thei-in kam kinial thei-a, ahizong-in hih innkuan maailam nuntaak nading, naupangte a-it penpending na’ pasal-mah, na’ zii-mah ahihlam amasa-a theihding ahihi. Thuneite-in thukhaám-pen thumanglo, hilhlah mite’ ading-a abawl hi-a, ei tua hilhlah mite asuak ding-a vaki pumpiakpiak hihang.

Pupate mo akipii ciang-in behlehphung-tawh kipii uhhi, banghanghiam cihleh nupa nihte akiteenna atheihpih theihpangte (witnesses) ding-a behlehphung-tawh maa akipang khawm ahihi. Tua kimlaai nulehpate nangawn-in hong theihpih selo-a no nupa kitotna, haiivaai kam kinialna, zawlluui vaái cih nengneng te-tawh kitawngsuk, palik sam, kikhen cihte ataktak-in akilawmlo, amulkimhuai nasepna ahihi.

Behlehphung-tawh kiteenna, Pawlpi mite’ maai-ah kiteenna bawl luatluat pongmawk-in no nihgeel kaalthu lemlohna ciang-tawh kikhen cihte-pen Pupa’ ngeina palsat-in Pasian’ Thukhun palsat-hi. YESHUA-in, “Angkawmna longal-tawh azii amaá mi-in angkawm ahihman-in amawh ahihi”.

Zomi nupi khenkhat-pen apasal ukcip akicih ciang-a lungnuam ngaungau ahidiam theihloh: apasal-pen mi’ lak nangawn-ah maaigun sanh guapguap, hap lala, mitsiim damdam cihte thamlo-in apasalte-in kisap khatpeuh neileh thuum ngaungau, ngen khuankhuan cih zawzeen tepawl-pen nupa-nuam hilo-in Pupa’ ngeina leh Pasian’ Ngeina akalh numei gilo cihna ahihi. Pasian-in Paul tungtawn-in, “Pasal-in Numei’ Lutang ahihi….. A’ pasal’ tung-ah kipia-ngiat (submit: thumang ngiat) dinghi….”

Zomi ataangpi nasep thupi anei-meel omlo-in naham sepna lampian vive-ah I-om man-in English te’ lak pan-a lower class te ciangbek-tawh ki-thuahna tamzaw-a, tua lower class te-ah Kimaákna (Divorce) asaangpen hisese mahhi. Tua ziak-in English te’nzong tuaci lel-e cihlam-tawh kilehzawh bilbel cihkhawng Zomi tampi omkhinhi.

English piteek puteek: teek mahmah, pai khiamkhiam, anupa-vua kileen khiamkhiam cihte muh-in nei nawnlo-in akitawng guapguapteng, akikhen suasuateng, aki-maá guatguatteng etteh-in kinei hileh kilawm zahding-in kitotding, kivuakding, kikhenna leh kimaákna (seperation & divorce) olno tak-a hih ziauziau cihkhawng leh tuabang-a theihna leh thukhualna apiicinglo nupi papi khawngte akikhen lamding-a tawsawn-gawp thuthei kisa mawhlote-zong naákpi-in khial-hi.

Gam thuneite’nzong kikhenna leh kimaákna thapia lo-in tawsawn peuhmah lo-hi. 2007 kum-a kipan 2012 ciangdong Domestic Violence Case-tawh intervention order angen nupa kop tampitakte’ court paina-ah kampheen kaseem-a, Magistrate te’ thuhilhnate naákpi-in thupi kasa-hi. Online ahzong ka-khah ngeikhin zo-hi:

“Na’ gam uh-ah haksatna tampi thuak-in hihteng-ah athak nuntaákna bittak-a innkuan lamthakding, haksatnate nopsakna-tawh laih-a kalthak suanding cih kimlaai banghang-a hihbang-a pasal-inlah hiamgamh, numei-inlah palik cipahpah, abangci nahi uhhiam?” ci-a ahap athuhilh om kawmkawm-hi.

Kithutheisak-in, “Amah-zong ethical lo-hi, unprofessional-hi” khawng aci deksuai ki-om khathei ding-a, ahizong-in ataktak-in haii hongsa lua mahmah cihna hilel-hi. Mihaite-in human rights-pen innkuan siat nading peuh-in zangh cihna hilel-hi. Hihzah cipakni! Zomi Pasian’ Thupha! Zokhai