E-card bawltheih hunding ani Deadline kikhinto loding hi: Immigration Director

E-card bawltheih hunding ani Deadline kikhinto loding hi: Immigration Director

Ih zakzaksa ahi E-card bawltheih hunpen Official in June 30 ni in abeita ahihi. Tuazawh akipan Malaysia Immigration Department te makaihna tawh gambup muntuamtuam ah gamdangmi nasem te mat kipanpah ziahziah uhhi.

Hih E-card bawltheihding ahun Deadline tawh kisai in Indonesia kumpi thunei te’n amau gammi te akhualna in, E-card bawltheih hunding ani Deadline hong khintohsak tapeuh un ci’n Malaysia kumpi thunei te tungah ngetsak uhhi.

Ahi zongin Malaysia Immigration Department panin alianpenpa ahi Director-general Datuk Seri Mustafar Ali in hih E-card bawltheih hunding ani Deadline pen kikhinto, ki sotto nawnloding hi ci’n khauhtak in genkhia hi.

Abeisa in tamveipitak kagengensa mahbang in hih E-card bawltheihhun pen kikhinto sawnsawn nawnloding hi. E-card bawlding in gamdangmi nasem te leh nasepnei Employer (Boss) te hunsawtpi akipiakhin ahihi. Tua ahih manin Malaysia kumpi in hih E-card bawlhunding Deadline pen kikhinto nawnloding hi ci’n Immigration Director pan genkhia hi.

Tulaitak ko Immigration Department te sepding pen Operasi (Operation) bawlin gamdangmi phalna kician neilo “illegal foreign workers” tengpen thukhun ombang in manin thu bawlding cih ahihi. Tuapan in akimankha gamdangmi tepen amau hongpaikhiatna gamtek ah ki puakkik in Deportation kibawlding hi ci’n genbeh hi.

Abeisa in Indonesia’s Labour Minister Hanif Dhakiri in amau gammi te akhualna in E-card bawltheih hunding ngetbeh sakding kici hi. Indonesia’s Labour Minister panin Officers honkhatzong Kuala Lumpur ah paisakngiat in, Immigration Department thuneite tawh Meeting neihding geel uh cihi.

News: In spite of Indo gov’t request, E-Card application deadline won’t be extended (11 July)

Immigration Director pa’n hih gamnih kumpi ulian te kimuhna vaitawh kisai in Malaysia Deputy Prime Minister Datuk Seri Dr Ahmad Zahid Hamidi khutsung ah ki ap hi ci’n genkhia hi.

Ahi zongin kimatding apatau te’n 3+1 Programme tawh amauleh amau kumpi thunei te tungah ki ap in, agamah ciahthei laihi ci’n Indonesia kumpi thunei te ngetsakna vaitawh kisai in Immigration Director pa’n genkhia hi. (Indonesia kumpi te’n agammi te uh itmahmah, veimahmah cih kimuthei hi)

Tukum January 01 ni akipan Malaysia gamsung ah gamdangmi Permit neilo in akiman, agamah aki puakkik pen mi 30,000 phakhin hi ci’nzong genkhiatbeh hi.

Related: Malaysia ah Operasi panin akiman gamdangmi 3126 phakhinta

Hih E-card akici Enforcement Card pen Malaysia kumpi in February 15 ni in hong patkhiat uh ahihi. Malaysia gamsung ah Work Permit kician neilo in gamdangmi nasem tamlua ahih manin, tuateng tawmveisung “temporary” naseptheih nadingin avaihawmsak ahihi.

E-card bawltheih hunpen tukum February 15 akipan June 30 niciangbek hi a, E-card aki zattheih hunsung pen 15 February 2018 ciang ahihi. E-card ki bawltheilai acici te’n ngaihsut huai hi. Sawltak #zomidaily