Bahrain kumpi in 2014 in Police thum thatte Fire Squad te kaplumsak

Bahrain kumpi in 2014 in Police thum thatte Fire Squad te kaplumsak

Jan. 16, 2017: Bahrain kumpi in March 2014 in bomb zangin police thum thatte tungah sih dan (death sentence) a piak mi thumte – Abbas al-Samea (kum 27), Sami Mushaima (kum 42) leh Ali al-Singace (kum 21) zan in firing squad-te kaplumsak ta hi ci-in BNA state news agency in pulak hi. March 2014 in police thum kithatte lakah United Arab Emitates gam police ulian (Emirati officer) khat kihel hi ci-in thukhen banga nasem (prosecutors) ten ci uh hi. Abbas al-Samea, Sami Mushaima leh Ali al-Singace tungah sih dan kipia pen thukhenna zum in a maapsak loh (upheld) manin a kikaplum ahi uh hi.

Hih mi thumte pen Gulf Kumpi gam Bahrain ah kum 6 sungin firing squad ten a kaplup masakna hi ci-in London pansan human rights group Reprieve in ci a, a mawhpaihna thu zong pulak hi. Hih mi thumte kikaplupna hangin rights activists-te thangpai mahmah uh a, zan pen dahni – “black day” hi ci uh a, social media tuamtuam ah policete leh lungphona neite kinawkna maante tuangsak uh hi. “Hih pen Bahrain khangthu leh tangthu adingin black day hi a, Bahrain kumpi in a lipkhaphuai thukham palsat hi,” ci-in Bahrain Institute for Rights and Democracy activist Sayed Ahmed Alwadaei in ci hi.

Amnesty International in hih mi thumte tungah thuman tak-a thukhenna kipia lo a, thonginn sungah gawtna leh bawlsiatna (tortured) a thuak khit nungun kumpi in that lai hi ci hi. Ahih hangin Bahrain kumpi in amaute kibawlsia lo hi ci-in Amnesty-te’ ngawhna nial hi.

Bahrain kumpi pen ISte sum tawh a huh bek hi loin Shia Muslim rebels-te tungah galvan pia uh a, tua a galvan piak uh Shia rebels ten galkapte mun tuamtuam ah bomb tawh suam uh ahih manin hih bangin mi thum Bahrain kumpi in a thahna hangin a kipawlpih Saudi Arabia leh Bahrain kumpi langpang Iran tawh a kitanauna nakpi takin siasak ding hi kici hi.

Bahrain gam pen Shia Muslimte tamna hi a, Iran kumpi in Bahrain kumpi nakpi takin a langpang hangin Bahrain gam-a opposition party-te dinna ka thukimpih hangun kizopna nei lo hi ung ci hi. “Bahrain kumpi in buaina pen kilemna tawh thukimna tawh vengsak ding a deih loh zia a gamtatna panin lak khia hi,” ci-in Iran foreign ministry spokesman Bahram Qasemi in ci hi.

2011 March in Bahrain gamah mipi lungphona a om hi. March 2014 in police thumte bomb zangin a kisuamlupna hangin mi 10 in mawhsakna thuak uh a, nung kal Monday in Bahraini high court in Abbas al-Samea, Sami Mushaima leh Ali al-Singace tungah sih dan kipia pen a maapsak nuam loh manin zan in kikaplum uh hi.

A dang sagihte dam sung thong kia dingin Bahraini high court in dan pia hi. Police suamna-a a site lak-a kihel Emirati officer kicipa pen March 2011 in mipi ten lungphona a neih lai un lungphona neite bengdai dingin Saudi makaih Gulf force kici galkap kisawlte lak-a kihel ahi hi. Bahrain gammi ten a kumpi uh pen sepna (jobs), inn leh lo leh gamvai lamsang ah gammite deidantuam hi ci-in ngawh in lungphona a neih uh ahi hi. Source: News agencies/ Thang Khan Lian