Myanmar, Rakhine State sungah gamdangmi 28 gunkuang tawh kiman

Myanmar, Rakhine State sungah gamdangmi 28 gunkuang tawh kiman

Myanmar, Rakhine State gamgidung acing in aom Border Police te’n Sunday ni in gunkuang khatah Kawlgam tuihuangsuang ah lut ahih manin, mankhia uh cih Irrawaddy pan kiza hi. Tua gunkuang sungah mi 28 tuangkhawm uh a, Bangladesh gamsung aom St. Martin akicihna Island panin Kawlgam sungah phalna omlopi in honglut uhhi ci’n Maungdaw Police Station pan thunei Kyaw Aye Hlaing in genkhia hi.

Bangladesh, St. Martin Island leh Rakhine State ii khuapi Sittwe pen 70 kilometer bang aki gamla ahihi. Tua mat athuak mite’n amaupen Sittwe khuapualam aom Thae Chaung leh Baw Du Ba Camp pan IDP (Internally Displaced Person) te kahi uh cihi.

Akiman mite lakpan in pawlkhat pen Bangladesh panin Boat tawh hongkanphei uh hi a, zatui kibawlding in hongpai uh cihi. State Counselor’s Office Information Committee te genkhiatna ah tua mi 28 tepen kimanphot hi cin genkhia hi.

Mi 28 lakah mi 5 pen naupanglai mahmah uh a, akum uhpen kum 13 panin 15 kikal khawngbek hipanding kici hi.

Bangladesh gampan in hongciahkik mipawlkhat hibangdan in kimanthei zelzel hi ci’n Maungdaw Township aom Police Major Kyaw Mya Win inzong genkhia hi.

Hih IDP tepen Muslims vive hi uh a, gamsung ah azintheih nading un Rakhine State sung aom Immigration Department panleh kumpi thunei te tungpan in phalna alakphot uh kisam cihi.

More: Kawlgam Rohingya buaina pen Saudi leh Pakistan tetawh kizom

Ahi zongin tua phalna pen ngah hamsa mahmah ci uh a, kha 3 bang ziakaithei ci’n Muslim Rohingya Community pan U Kyaw Hla Aung acihpa in genkhia hi. ZD Sawltak #zomidaily