Music leh Gamvai ~ Pu Thangboi
Gamvai (politics/ nainganyi) leh music akibatna tam mahmah hi. Tawm khat ih sut ding a, akibat lohna zong ihgen ding hi. Music ukna pen pianken ahi hi. Pilna hauhna tawh kisai peuhmah lo hi. Guihtheih khamtheih zongsang te tualo tawh aom theihlo dan mah bang un music ukte zong tualo tawh om theilo uh hi.
Music tawh ki nahvawh kha peuh leh adang khempeuh mangngilh zo uh hi. Gamvai ukna zong tua bang mah hi. Pianken hi. Kisawl zawh kizol zawh tawh kisailo hi. Zawn leh hauh tawh zong kisailo hi.
Music uk khat aukna aphungvuh thei ding kiim leh paam ah khangkhia leh muibun phadeuh ding hi. Anung pan athapia ding a panpih ahuh ding kisam hi. Music tawh kisai pilna asin zawh leh hoih kan hi. Gamvai zong tua bang mah hi.
Music leh gamvai pen art (anuh pingia/အနုပညာ) nam ahi hi. Talent nam khat mah ahi hi. Mipil khempeuh i septheih hi zenzenlo hi. Pianken talent nei te’n a talent uh hoihtak phungvuh in khangtosak le uh muibunpen ding hi.
Laitan Tawh Kisailo – Music leh gamvai semte laitan tawh kisai masalo hi. Laitan sangpipi akah zawh leh bel akahlote sang ama zang zaw ding hi. Ahizong in laitan sangpi aneihloh uh hang sem thei veve uh hi.
Musician minthang – Kawlgam ah musician minthang laitan sang neilo tam mahmah hi. Gtn: Chit San Maung, Cin Khan Pum
Politician – Kawlgam ah politician mintang buaih (degree) neilo tam mahmah hi. Gtn: Aung San, Min Ko Naing, Phyo Min Thein
Tua hi in laitan sang neilo aih teh gamvai semthei kenteh cih theihna ding om tuanlo hi. Talent tawh kisai hi.
Zomite’ tangthu sungah zong USA khawng pan a master tawh hongciah khat in tan 4 onglo khat gamvai kitelna ah na zolo lel hi.
Pu Mang Tung Nung tekhawng zong pilna sanglua asin hilo a pianken gamvai talent nanei ahih man in nasemzo mahmah lel hi.
Pianken gamvai talent nei khat in laitan sang tawh akop leh hoih sem; akop kei leh zong semthei veve ding hi.
Tuhun diak ah laitan sangpi anei kei zong in mikang lai mikang pau atheih nak a pilna adeih nak leh self study bawl theih ding google leh youtube ah adil aha in om lel hi.
Akibat Lohna – Music leh gamvai bel akibat lohna mahmah khat om hi. Music pen atheilopi asiamlopi khat athei asiam dan in kineih theih omlo hi. Asiamlo atheilote kilangh baih lua hi. Talent neih leh neihloh kilangh baih lel hi.
Gamvai ah bel athei leh atheilo, asiam leh asiamlo, talent aneih leh aneihloh kilangh mengmenglo hi. Music ah behpai, bawngpai, khuapai cihbang omlo hi. Gamvai ah bel kideidanna tam mahmah hi.
Talent Nei Leh Neilo Khen Zia
Music leh gamvai pianken talent nei leh neilo khenbaih mahmah hi. Talent nei te’n aminthan khit, agualzawh khit teh metna azong khaphial zong un akipat cil un bel metna leh hamphatna lunggulhna tawh asep uh hi hetlo hi.
Music uk khat practice ding sawl kul hetlo ding hi. Zan hak liang mah in practice zolel ding hi. Metna hamphatna lunggulhna hang hilo in ukna hang hizaw hi. Gamvai lungno neite zong tuabang mah hi. Gamvai mah ong lunghimawh den lel ding hi.
More: Democracy thupha leh Tedim khantohna ~ Rev. Nang Lyan Kap
Bang cih leng hamphatna ngah ding cih ngaihsun masa hetlo ding uh hi. A uk taktak te’n hauhna, liatna, min leh za khawng zong lunggulh veva hetlo lel uh hi. Gentehna: Mahatma Gandhi, Khun Tun Oo, Min Ko Naing. Genkhialh aom leh ngaidam. Lungdam, Mung Laan Thang (Tonzang, Zogam)
Comment piaknop aomleh...