Gam danga inn nasem dinga a pai numei te

Gam danga inn nasem dinga a pai numei te

I gam leitang leh innkuansung nuntak haksat manin gam tuamtuam ah a kitheh thaang Zosuan tate-in,et niamna leh simmawh bawlsiatna thuak in,nuntakna a bei lawh zong ki om hi.

A zawdeuh in,Singapore gam bangpen (photo)man leh video panin ii muhciangin thupi in,noptuak mahmah hi.Ahi zongin a sungah inn nasem a om,ii sanggam numeite-in,innteek te mai-en in,gilkial dangtakin a-ut bangun ngamta ngam lo leh a duh uh ne ngam loin suakta lo taka a omte adingin haksatna mun,ki ngawtna mun tawh kibang lel hi.

Inn nasem,innteeng ii cihpen cikmah a,a theih ngei loh uh,midang innkuan tawh om khawm uh a,mo thak la hilo,pau thei loin,innkhat sungah teeng khawm uh ahih manin a tuncil lam uh bang lungneu in kapkap uh hi.A tuncil sunguh kha tampi sungbang kua mah tawh ki hosak loin an zong kham ngah lo leh zankim ciangin ihmut panin zingsang phalvak tungphet in,tho khia uh ahih manun ihmut cim ngei lo uh hi.Pawlkhat te kisim mawh lua ahih manin amah leh amah a nuntakna kila in,ki gui-awk, inn tungpan tuakkhia leh a sih donga bawl siatna a thuak zong om uh hi.Gamdang Mi vom Mikangte khuat nuai a,inn nasem numeite thuakna pen genkhit zawh ding hilo hi.

Ahi zongin khua lampan a,inn kuansung nuntakna a haksa khol lo,khan gualte tunna,phakna peuh ci-a,amau ut thu tawh a pai pawlkhat leh omna pi leh pu,a tuak mahmah nuam a sa pawlkhat om thei ding hi.Tua te ahih leh a-ut peuh uh sem in,a pai nopna mun uhah pai in,suakta tak a,a om pawlkhat zong om ding uh hi.

Inn kuansung nuntak haksatna leh mailam nuntakna a nopzawk nading ngaihsutna tawh a paite ahih leh Nu leh Pa,sanggam te a khual manun amau nopsak nading ngaihsun loin zumna daina leh gentheih haksatnate thuak tinten uh hi.Tua ahih manin gilkial in,dangtak zongin a duh,ne ngam loin,nik ten,puansilh zong a deih leh a kisapte lei ngam loin sum khol uhhi.Ama ngak ding leh a luah ding ahi lo,inn leh lo,lamin innsung vanzat neih leh lamh te behlap uh hi.Nu leh Pa,sanggam te a dam loh uh ciangin zatui vaihawm sakin a kul leh a kisam bangin zato paisak uh hi.

Nu nei nawnlo te,Nu dinmun ah dingin Pa nei nawnlo te,Pa dinmun ah ding uh a,sanggam pasal neilo te,ta pasal dinmun ah ding uh hi.Sanggam te sangkahsak in,gamdang pai nuamte paisak in,a ki tangsapnate khempeuh uh ahih theih zah un,vaihawmsak uh hi.Hi zah a,aki piakkhatna uh ii ngaihsut ciangin etniam nading leh gensiat nading om loin zahtak huai mahmah uh hi.

More: Singapore gamsung ah Myanmar innteeng numei khatin piteekkhat thatlum ci’n thukibawl

I mipih ii sisan kizoppih ii laizom gamdang a,inn nasem,numeite thuakna ii ngaihsut ciangin ka sanggam suahpih numeite gamdangpai om kei ci-in,Internet,online panin gamdangpai numeite gensiat ngam ding zong hilo hi. Innkuan nuntakna a nopna ding leh Nu leh Pa sanggam te,khualna tawh,gentheih haksatna tuak dingin a thahat lai,a khangno hun hoih lai,innkuan pihte adingin kipiakhia uh hi.