Democracy thupha leh Tedim khantohna ~ Rev. Nang Lyan Kap

Democracy thupha leh Tedim khantohna ~ Rev. Nang Lyan Kap 

“… na cihtheihna ding uh tuipi gal-a om zong hi lo hi.” (Thuhilhkikna 30:13b)

1. Ka neulai in Tedim ah mihaute bek in Siksakol (bycycle – Saikel) nei uh a, ki-eng mahmah hi. A tate uh bang Sangah kha in dawn zel uh hi. Sen habawl (U Thein Win – Leo Lam Thang sungh pa) te bang a ki-eng mahmah hi. Sen marnzaih pa (U E-Kya) in Supper-cup motorbike khat ong neih ciang kizahtak mahmah hi. A inn (tu-a Tedim Guest House) pan a Video lakna ahi tu-a “MyahMyah Ansai” kikal tuanna in zang hi. Tom gen leng tu-in bel inn khat ah motorcycle 1 val (mi khat in 1) kinei ta mawk in… kinak khantoh mahmah hi.

USA te leh gamkhangtote ka deihgawh leh ka enen Kultal-lampi lak ah AC/Nailon Kattaya Lampi leh concrete lampi te i nei ta a Democracy thupha mu kha ta ka hih manin ka lungdam phadiak hi. Bang hang hiam cih leh tuukciang i khe buan nawnlo, phalbi ciang leivui tawm tuam mahmah ahihna hang hi.

2. Ka neulai-in, “Youh-Ti” limlahna cih omngei a kimu nuam mahmah hi. Kawlgam Kumpi “U San Yuh” ong pai khit teh ama hong paina “Baho Youh-Shin” (limtang thei-Aw suaklo) cih khat kilak in minthang mahmah a kinak muhnop mahmah hi. Tua zawh a sawt loin Sen Manzaih Pa (U E-Kya) mah in Video ong nei in ki-en ziahziah a haulawh liang hi. Kawlgam in Black and White TV i neih ciangin Mizogam, Aizawl ah 1984 kiimin color TV nei uh a na sensan sam ei, kici ziahziah hi.

“Video leh Color TV” ong tam ciang bangin kinak dah mahmah in kilangpan mahmah hun khat om ngei hi. A sawt loin Color TV neih kidem ngeingai vet se in “a mai kuum, amai peek” nei masa kidemin, tun a mai kuak nei bang om ta hi. Tom gen leng tua TV te phungcian dingin zong kideih nawn loin, mi mawk piak leng zong a deih om nawn lo ding hi. Lamdang ei!

3. Ka neulai un thukizaakna pen laikhak (mail) leh siikkhau-to (wireless) hi. Tua zom ah manual phone pen khua sung leh khuasung kithuzaakna hong om a zum (office) teng leh uliante bek in nei uh hi. 1989-90 kim pawh teh R.T (Radio Telecomunication) cih khat ong om teh tu leh tu a thu kizaktheihna ahih manin nuam mahmah ta hi. Dial-phone bel Tedim ah ka theih khialh kei leh kinei lua manlo hi. Kum 2000 kum in Singapore ka pai leh computer monitor tawh lai kikhakna email (electronic mail) cih khat Pu Col. Khup Cin Pau-te’n na nei-in lamdang sa in ka deihgawh mahmah hi.

Tedim ah 2006 kum in auto telephone ong kingah in Kyat 500000.00 man hi. USA ka pai ma deuh in ka nei zo zenzen a USA pan Tedim ka hopih thei a.. lamdang kasa mahmah mai hi. Tun Tedim ah inn bek hilo khuttawi phone (Handphone /smart phone) cihte kinei zihziah ta in, TV leh video etnopte ki-enthei, i khutsung pan email kikhak thei bek tham loin gamdang a omte tawh tu leh tu in melkimu a kiho thei ta ihih manin, a Lamdan khantohna leh nuntakzia khat ong om ta mawk hi.

4. Tulai Khangthak te in lokhawh siangpuak, kel anzon, tuaiki leh anbong zon, ansuk-ansep leh antanghum ten cite thei lo uh hi. Vaihawm ginat zawhlohna hangin bel naupang pawlkhat in tui-tawi lailai uh hi. Zingsang khuavaak ma a tui-bel gual a tui-kot a tuitawi bel atamzaw in kizang nawn samlo hi. Mei (electric) zong kinei in Anhuanna leh puannawtna in a zang ziahziah zo pawlkhat om sam hi. A Khantoh lai ding a ikisap thupi pente lakah systematic a Tuihawm dan leh Mei nai 24 sung ingah zawh nading ahi hi! Gen ding tampi, khantohna maban tampi om lai ding hi. Zom to zel ni. Rev. Nang Lyan Kap

Tutung Guest Editorial hong gelhsak Siapa pen ZYA – Tedim Thudotpi khat hi a, tulaitakin Tedim khuapi bulphuh Timothy Bible School & Seminary President hi-in EBC Pawlpi, Myoma ah Senior Pastor ahih banah International Partnership Ministries tawh nasepkhopna Asia Regional Director zong ahi hi. USA gam a om Bob Jones University ah sang kah nuam mahmah hi ta leh Myanmar gammite VISA haksat hun lai ahih manin Visa a ngah zawh lo teh “Topa aw kei Bob Jones University ah kei hong puak lo ding na hih leh Tedim ah Bob Jones Universsity hong puak in…” ci-in thungenpa ahi hi.

Pasian in thupha pia in Bob Jones Jr te khawng mah tawh kimaingap takin nasem khawmin Tedim hong etlawmsak leh vang hong neisak building hoihnonote lamin Zolai ngiat tawh Pasian’ thu nungta hong pantah Siapa ahi hi. US gam 3 vei a zin sungin Mangkang Pawlpi 134 leh University 3 ah Pasian’ thugen ngei hi. Zolai tawh Pasian’ thu tampi hong bawlakte sung panin “The First Zomi Systematic Theology” pen ZCLS in “BOOK OF THE YEAR 2005” pahtawina pia hi. Sianu Nang Lam Cing tawh tapa 3 nei uh hi. The Tedim Post