Counselling, Mentoring or Coaching koi hi zaw?

Counselling, Mentoring or Coaching koi hi zaw?

Ih ‘Nu’ gilsung pan ih piankhiat aa kipan, ih piicin dong’ hong kipattah kul a hihi. Pahtah loh makaihloh-in mi kisuak khollo hi. Ih sia-masapen nulehpa a kicih mahbang in, a tamzaw nulehpa in a khansuah ki hihi. Tua hi aa, nulehpa pen pahtahnalam-siamna khempeuh a kigawmna ahihi. Tuasiamnate lak ah, Nulehpa khutma zom-in, ih khancing na ding’ midangte zong a kihel thei, counselling, mentoring leh coaching te bangdan hiam? cih a tom in ih gennuam hi. I piicin semsem nading’ ngiimlehtup ih tangtunzawh nading-in a kisam kalsuanziading kihuhna,kilamlahna leh kimakaihna te’ a hihi.

Eimi sung-ah, a taangpi in, Counselling leh Mentoring cih kammalte’ ki zangei phadiak in ka um hi. Coaching bel tuukpeng(football) leh kimawlna (sports) uukte’n kiza phadiak a hi hi. Kalsuan kihuhnazia hoihmahmah a hiteeita zong, ki deihsaklua kisa-in, telkhinlopipi-in, zatna ding’ a munlehtual tek-ah ih zatsiamloh ciang’ buaina, ki telkhialhna leh lehtatna piangzawthei taleuleu hi.

Counselling (Gen’suahpih)

Gentheih haksatna, tuahsiatna, cidamlohna leh dahnate tungtawn-aa piang’ lungsim-natnate a damna ding’ in ih vangik hongkuppih hongpuakpih, khuavakthak hong ihmuh nading-in kihuhna a hihi. Ih nuntaak sung-in, hunkhat teeiteei ah ih kisaptekding khat a hihi. A masapen-in, eilehei huhna ih kisaplam kitheih kul aa, hamsataleh huhna ih nget ding a hihi. Ih tuak hatsatna-te hang’in ih lungsim-ngaihsutna-ngei kemzolo in, ih nuntaak-luheek, lungsim-luanziate kilamdang in, a diakdiak in, thukhat peuh a pianteh, a khawltheipaklo liinna-launa cihbang aom aa leh midanghuhna kisamta cihna a hihi.

Huhna hongpia theidingte pen ih lungsim-natna dungzui in, kiteelthei aa, pawlkhat bel mimawkmawk in hong huhzolo thei hi. Tua hun ciang-in, counsellinglam a sinlehsiam te zuan-in lamdik/maan kilahsak ding a hihi. Tua huhna hongpiate pen, kihonuam, pawlnuam-uh aa, hong lungvaksak, hong tawldamsak, suaktatak aa ih lungsim hong suahkhiasak leh ih thum ih tauna hongngaizo bek hilo, mimuanhuai, hong lungmuangsakmi-te a hi uh hi. Ih suahkhiat thute zong khinkhaisiammi-te a hi uh hi. Gamkhangto-te’ ah bel damna-siampu tawh kikup masak huai ci uh hi.

Hunkhat lai-in, Khamtung-Zogam lam-ah Pasian thugenna- Crusade khawng a omteh, crusade siimte-mimal in, counselling kineihpih cih kiza zeel hi. Lungdambawl ciang, hongpaiding’pa pen ‘wonderful counsellor’ kici aa, ‘a deihte tung, nopna omta hen’ ci-in ih kitaangko mahbang in, Counselling zong a kisam te’n kisaplamtel in, huhna ngettheiding thupi kici hi.

Mentoring(Kipattahna-kimakaihna)

Ih nuntaakna a ki khangkhaizawk nading’ in kihuhna hi-aa, ih muan midang khat in ih nuntaakna hong telpih in, a maatuahkhak-theihna dungzui-in, mailam bangci kalsuan-gamtatding’ cih hong deihsak-gentheihna kizopnakhat a hihi. Mentor in hong genthute zuihloh phamawh hilo zeel hi. Suaktatak in teeltheih a hihi. Ih nunzia dungzui-in eilehei ih kitheihnang lampi’ hong khunsak uh hi. Mentor in thupiang thu-om khat ii a deihna, a cihnopnalian genpahlo aa, ih theihtheihna ding’in, dotna tuamtuam zangkawm in, akisapleh lamlakna, ngaihsutpiakna leh hilhna (advice and suggestion) tawh ei leh ei hong kimukhiasak hi.

Mentor tawh banghun ciangdong kizomding cih pen ciangtan omlo in, a kisam bangbang-in, kikuptohtoh ding a hihi. Lawhcinna pen kiho,kizop leh kimuhtuahna tungah kinga hi. Tua a hih man-in, a langnihtuak in nasepkhop kul hi.

Mentor hoih khat in, kihosiamna, kipiakkhiatna, thungaihzawhna, thutheihnopna(thuduhna-hilo), thutelmuhna, zawhna(vangliatna), a mahlehmah kimuanna, kizopsiamna(a hunhun in mitawh kizopna), muhtheih-baihding’ limlahsiamna, kikholhkhop-nopsakna cihbangte’ a neiding kisam hi.

Coaching (Dinmun-kitelsakna)

Tuplehngiimkhat bangci tunding cih thapiakna leh tuhunlian aa- ihdinmun kitelsakna a hihi. Ih neihsa pilna, siamna eilehei bangci muhkhiat aa, bangci zatding cih a hihi. Siamsinna ah, theihlohlam kitheilo, theihlohlam kithei leh theihlam kitheilo cihbang in adawldawl in om a hihi. Coaching in, liimlangh(mirror) mai-ah ih dinciang, a hibangbang-in hong kimuhsakmah bang-in, ei pilna-siamna-thahatnate’ hong kimusak a hihi. Tua a hih man-in, ih theihna ihsiamnate eilehei bangci kitheihding leh a muibunpen ding in bangci zattheihding cih kihuhna hi aa, sangsia bang in, kihilhna(teaching and advice) hilo hi. Ih tupna ih tang’tun nading’in eilehei mah in, ihneihsa pilna-siamna zang-in kikalsuanthei cih upna a hihi.

A tomin etkaakni cileeng, Counselling pen hatsatna tungtawn-in kingah lungsim-natna te a damna ding’in kibawlna(Therapeutic or Psychological healing) a hihi. Mentoring pen a siamsa ihmuan khat in hong makaih leh eiguaksang’in tuplehsawm kitang’tun baihzaw cihna hi. Coaching bel mentoring sang dawlkhat sangzaw ciding hiam? Pilna-siamna ih neihsa-te’ ih kiteltheih nading’in, kihuhna hi aa, eilehei tha-in, tuplehsawm tungzoding’ deihna a hihi. A thum in, mimuanhuai-thuthaangenlo (Kawlpau-in nohlong) hihding kul hi. A thuleh a muntek telding thupi hi.

A tawpna ah, ei leh ei kithei aa,banghun ciang, bangdan in hong kipanpih, hong kimakaih leh hong kihuhleh cih theihding a thupiit-zahkhat in, a langkhat ah, ih huhte aa ding’in zong, muantaak-suantaak leh noptuamna ih hih ding kisam hi. Ei dinmuntek kitheihding thupi hi. Keimah a theipen, cihziautawh bangmah phattuamna omlua lawmlawmlo a hihi.

Zomite’ a tamzaw koimun-ah omzeel ih hi tam?

Nantal’suan

A kicing zaw in a simbehnuam te’n:

• http://www.coachingandmentoring.com/Articles/mentoring.html
• http://www.counselling-directory.org.uk/counsellor-articles/who-needscounselling
• https://www.bacp.co.uk/student/become.php
• https://www.the-coaching-academy.com/
• https://www.skillsyouneed.com/learn/coaching.html