Muh ciil Melbourne – 8
Kangaroo Mu taktak ta: Ka beach pai uh lamet a bat loh ka ut zah uh sang sawt om kullo in ka dingkhia kik uh a, Kangaroo a kikhawina phual lam ka manawh uh hi. Na tam mahmah a, na vak zaizai in, khut tawh zuut in ut leh ann zong kipia thei na himawk hi….. Zotawi Lianu in bel ann a piak ciang it bawl diak in a khut khawng liaksak dekdek hi!
Kangaroo zong nam tampi a om na hi leltak a, en Sa-ipnei i cih ziau pen a neu nam, a lian nam, a san nam, a vom nam, a kang nam, cih bangin na khen neunau uh a Zomi te hong suun kei si e ka ci hi. Zomi te bel ZOMI mah hikhin pah lel ihih cianga! Saipnei lak ah a tangtat nam om a, a hona kikhawl nam om in, a nupa kop a vak nam na om leuleu hi. A neute pawl bel Zotawi Lianu in it diak ahi tam ka ci mai a ann piak nuamsa in a kidelhdelh mai uh hi. A liante uipi sang lah lianzaw a, sakhi ciacia khawng pha mawk hi. A neute leuleu lah uino ciacia hi in sangak, zawhngeu cia khawng hi a, it huai thei mahmah uh hi. A tamzaw pen a hon in kikhawi a, a huang sungah vak damdam uh hi. A golte pen gilo, mihing khawng phuai gawp thei ahih manin san themtham a, huang sungah kikhumcip a, mihing tawh kisawh theih dingin koihlo uh a, a huang vang pan ann kipia thei bek hi. A lamdang pi hi ka ci hi.
A ip sungah a no pua kawma hong diang phei zeuhzeuh pen ka va naih uh leh ann kipia thei vanglak a, a no khe in hong dawt kha dekdek cih bangin hong nai hi. Khatvei leh lah a khe dok, a nu ip sungah tumcipsak, khatvei leh lah hong khuangkheh gegaw zel… nau puak ciang a ihmut ma a kitomtom tawh kibang kasa a, LAMDANG ka sa takpi hi. Leitung ah hih bang ganhing, awm vun sungah no, ta, naungek te kipua cih peuhmah… a bawlpa, a piangsakpa siam sa ngel ing.
A honpi a omte bel a sungah kilut theilo ahih manin a pua, a huangdai kiu pan ka en uh a, tua ka et sung mah un a vom thilthelte hong tawn zeuhzeuh in ka kiangnai khawng vuah hong pai uh a, zual thei mahmah uh hi. Nisim in mite in veh in en in ann pia den uh ahih manin a khahzaute uh bel a hangsan kei uh hi.
Etcim cih om tuanlo, a mul nel niknekte uh zuut cim cih om tuanlo ding ahih manin a huansung mah a ganhing khawina dangte en dingin ka khualzinna uh ka zomto kik uh hi. Australia a tung taktak ka hi maw cih lungsim ah hong om a, life satisfaction khat hong khang hi.
Emu mu leuleu: Vasa nam lak pan a lian pen zom, Ostrich zom ah a lian mahmah khat leuleu pen Emu ahi hi. Ostrich zah in a lian cih ding himai hi. Emu pen Kg. 70 bang pha a, kum 35 bang nungta in, kum khat in tui 30-50 bang tha uh a, pawlkhat in 100 val bang tha thei uh hi. A tui tangkhat pen Kg 1 phial mah apha himai hi. Ostrich bel sawt nungta zaw a kum 70 bang nungta in kum khat in tui 70 bang tha uh a, tangkhat Kg.2 dektak pha hi. A pumpi bel Kg. 180 ciang dongin gik thei hi. Ostrich pen Africa gam bek ah om a, Emu pen Australia gam bek ah om hi. Gamsungah a tui uh ciang a pa in a no op a, a keuh ciang zong a gol dong ann zonpih in picingsak hi. Thai bawi! Eh, zi it! Oh, hilo; hen-pecked!!
Hih vasa leng theilo Emu pen lei lak ah tai hat mahmah a, feet 6 bang in sang gegaw uh hi. Ann pia leng i khut sunga ann a tuk uh ciang i khut na mahmah, a muk tuk khauh mahmah hi cih ka telna khat uh bel ka lak vua a thahat pen Tg. Mungno zong a khut sung ann a tuksak ciang kidek zolo in ki ip valval hi (koh a dangte bel genna vet om kei). Mihing sanga sangzaw himawk uh ahih manin a ngawn guh khawng uh kidok gekgawk hi. A mul uh ham phiatphuat a, a kheme thum bek pha hi.
Koala: Australia gam bek ah a om dang khat pen Koala hi. Vom tawh kibang hi a, puang philphel hi. A bil gol in a lu lian a, a khe tom in a mul sau hi. A mit gol in a khecin sau a, a mit bing thithe hi. Damdam a gamtang ahih manin thatang tam kisamlo uh a, ihmumu lel uh hi. Eucalyptas kung tungah kah uh a, sun thapai in a teh ne in a hiang ka bom ah ihmu hithiat lel uh hi. Good life! Hopih sawm taleng hong dawnglo, samsamta leng hong awlmawhlo, a tutna singka bom ah ihmu hithiat lel a, hong thusimlo tawh kibang liang hi. Ahi zongin amah a heh leh a lungkia hilo in a lungnuamlua, ama nuntak zia a na hileltak hi.
Wambats: Zusapi ka ci mai hi. Zusa lianlian hi a, a mei tawng in a mul, a muk, a pumpi pen zusa linlian ahi hi. Ahi zongin Vokno tuk thum cia ding khawng hi a, gol mahmah hi. Zusa nam lak ah a lian bel a hi maitam aw ka ci hi. Ka muhcilna ahih manin lamdang, muhnop kasa hi.
Dingoes: GamUi hi a, san om in gamlak a ui namte lak ah hangsan, a gilo hi ci uh hi. Naungek khawng tuah in ne thei hi kici ahih manin a kiang nai ah pai ding hong kiphallo a, a huangdai pua pan bek ki enthei hi. A lamdang pi khat na hi mawk hi.
Echidna: Sakuh nam khat, ahih hang lah sakuh sang neuzaw, Sakek sang zong neu zaw, a kum kiukiau khat hi a, a muk bel khutme cia ding khawng lawk ngekngawk hi. Sa lamdang ka muh khat hi.
Muvanlai, Mupi, tui vatawt, vaki, gul nam tuamtuamte zong kikoih zeizai a, Dingoes uite sim loh zong ann kipia thei khin hi. Ahi zongin Australia pai cih buang Kangaroo muh ding bekbek mah lungsim ah om masa ahih manin ka muhnop pen uh et khit, muhkhit ciang bel a dangte pen tawldam takin ka vak khia hialhial theita uh hi. Kangaroo (Saipnei) muh mateng bel kinak ngamlo, i awm sung khawng dim phetphat hileh kilawm liang hi.
(zop lai ding)
Hau Za Cin
Phuitong Liim
http://www.hauzacin.blogspot.com/
Comment piaknop aomleh...