Ka Ta Aw

Ka Ta Aw

Sing dang gam lei ah vai mang siam sin leh sesum lam bang zong kongit uh ka ta aw na tun leh zuan’ thelnah no tawh tongdam hong lel ung. Ka ta aw na damdam maw?

Mite lak ah mai zumna na tuah khak loh na’ng deihsakna tawh lai tawm hong gelh ung.

Ka Ta Aw

-Pasian numbat khat ah koih den in maw.
-Pasian tuu cingte it-in zah taak siam in maw.
-Pasian a kiphatna munte ah tual bual in maw.
-Pasian tungah na vai teng ap ngiat in maw.
-Pasian deihloh gamtat ziate pel ngiat in maw.
-Pasian hong piak na ngah thuphate simsim inla, lungdam ko den in maw.
-Pasian khut sungah na khempeuh om hi, cih phawk gige in maw.
-Pasian in hong lamto nuam den hi, cih phawk gige in maw.
-Pasian in hong ompih den ahi maw.
-Topa zah taakna in pilna kipatna ahi maw.
-Pilna na ngah nadingin na hihtheih tawp in hanciam in maw.
-Pilna hong hilh na siate zah taak siam in maw.
-Pilna na zon sungin thudangte tawh hong buai ken maw.
-Sum in hong laptoh theih mahbangin hong sia sak thei hi, cih phawk gige in maw.
-Khua-ul luang leh simmawhna thuak a na ngah na sumte zangh siam, zeek siam in maw.
-Gilvah nading ahilo nate lei nadingin na sumte mawk zatzat ken maw.
-Sum pen manpha ahih manin thupi ngaihsut in maw.
-Na sum te 1/10 pello in pia in maw.
-Na sep, na bawlna te ah hong uk makaite thu mang den in maw.
-Na kikholhpihte adingin mi manpha khat hih sawm in maw.
-Leitung gualnop, paktatnate pelh ngiat in maw.
-Thu maan inla, kiniam khiatna tawh nungta in maw.
-Ki niam khiat inla, ahizongin ki niam koih kei in maw.
-Mi lak ah na om ciang mite mit hek telsiam sawm in maw.
-Buaina a piangsak hi kenla, buaina a vengsak hi zaw in maw.
-Mite adingin ‘mi nawngkai’ hi kenla, ‘mi manpha’ hih sawm in maw.
-Na nu-le-pa, na sanggamte, na pawlpi mite leh khuapih, tuipihte in thu hong ngetsak den hi ung cih phawk gige in maw.

**A tawpna ah ka ta aw na tun leh na zua, na ciin leh na tuai, na vang khua leh Zogam lei-in hai bang hong ngak in hong lamen den hi ung.
** Topa’n thupha hong pia tahen… Hong it mahmah na tun leh na zua

Dong Mung