Leitung Mihing ~ Dal Sian Hung

Leitung Mihing ~ Dal Sian Hung

Leitung ah mipil mahmah a minthang pawlkhat hai mahmah kasakna mun om a, mihai mahmah a kigen khat zong pil kasak mahmah hun om hi. Hau mahmah a minthang khat zong, zawng kasak mahmah hun om a, zawng mahmah a kigen khat zong hau kasak mahmah hun om hi.

Kheltat mahmah a kigen mi khat dik kasak mahmah hun om a, midik a kigen khat zong, kheltat kasak hun om hi. Huaiham mahmah a kigen khatzong cingh kasak mahmah hun om a, cingh mahmah a kigen khatzong ciil kasak mahmah hun om hi.

Thukhual mahmah a kigen khatzong ngongtat kasak mahmah hun om a, ngongtat mahmah a kigen khatzong thukhual kasak mahmah hun om hi. Nehno mahmah a kigen khatzong hangsan kasak mahmah hun om a, hangsan mahmah a kigen khatzong meidawi kasa hun omlua hi.

Minam vei mahmah a kigen khatzong minam zuak khat in kamuh hun om a, minam dongdai sak a kigen khatzong minamte sihpih ngam kasak pawlkhat om hi. Vei mahmah a kigen mi khatzong phatmawh sak nei mello mi tawh kibang kasak hunpeuh om thei mawkmawk mai hi.

Lim mahmah a kigen khatzong lim kasak het loh pawlkhat om a, lim hetlo a kigen khatzong lim mahmah kasak pawlkhat om hi. Hoih mahmah a kigen pawlkhat zong hoih kasak hetloh om a, hoih hetlo a kigen khatzong hoih kasak mahmah pawlkhat om thei zel hi.

Deih huai mahmah a kigen pawlkhat zong, kephuai hetlo kasak om a,iplah huai mahmah a kigen pawlkhat zong lauhuai kasak mahmah pawlkhat om thei hi. Muhnop huai mahmah a kigen pawlkhat zong muhtak kasak peuhmah loh pawlkhat om thei hi.

Hanciam huai mahmah a kigen pawlkhat zong, hunbei sak lel a kangaih sut pawlkhat om a, hun beisak a kingaih sun pawlkhat sungah hunpia a hanciam taak mahmah kasak pawlkhat om hi. Sum tampi tawh kibawl pawi pawlkhat sum beitaak kasak loh tamlua hi.

Kawi mahmah a kigen khatzong tang mahmah kasak pawlkhat om a, tang mahmah a kigen pawlkhat zong, kawi kasak mahmah pawlkhat om hi. A min ngak huai kisa pawlkhat, amin ding lauhuai kasak pawlkhat om hi.

A cim a kihuan pawlkhat zong, asih in kihuan hileh kacih hun om a, asih a kihuan pawlkhat zong, angan in kihuan leh kacih pawlkhat om hi. Ahul a kihuan pawlkhat, nawi pian leh kacih hun om a, nawitak a kihuan pawlkhat hulpian leh kacih hun om hi.

Gilo a kigen pawlkhat, migi kasak giugiau om a, migi mahmah a kigen pawlkhat gilo kasak mahmah omthei hi. Siangtho mahmah a kigen pawlkhat nin kasak mahmah om a, nin mahmah a kigen pawlkhat siangtho kasak mahmah omthei hi.

Lungsim neu mahmah pawlkhat, picing mahmah kasak omthei a, mite’ zahtak mahmah pawlkhat pen kisap khat neilai kasak omthei hi. Thuman mahmah a kigen pawlkhat zuau bubak tawh kidim kasak om veve a, mi zawngkhal khat a kigen pawlkhat picing kasak omthei hi.

Gim mahmah akisa pawlkhat asepna ka hawmthawh om thei a,sem aki salo pawlkhat nasem mahmah a kamuh omthei hi. Piakhia akisa mahmah pawlkhat huhna ngah kasa mahmah zaw thei a, khut dawhngen banga lungneu pawlkhat sungah veina nei na omthei zaw hi.

Thutang kisa mi pawlkhat zuauthu tawh kinahvawh thei zaw a, mikhial a kingaih sun den pawlkhat thudik mahmah theizaw uhhi. A mai enkawmsa a pai pawlkhat kipal kha thei zaw uh a,khuakha kawmsa a pai pawlkhat lamzang zaw thei mawkmawk zaw uhhi.

Kamsiam akisa pawlkhat lungsim takpi hilo thei a, awtol balhbalh pawlkhat alungsim niim thei zaw in, nisat mahmah hun ciangin bukna dingin muanhuai thei zawsop hi. Leiba hau a kigen pawlkhat huhna piapia te hithei zaw a, leiba neilo pawlkhat in engzaw hi.

A laulau den pawlkhat, lungmuan huai thei zaw uh a, apatau hetlo pawlkhat lungkham huaithei zaw uhhi. Dinsa a thugen pawlkhat tutsa hileh kacih hun om a, tutsa a thugen pawlkhat dingzaw leh kacih hun omthei hi.

A nuinui pawlkhat, kapkap leh kacih om thei a, akapkap pawlkhat lungdam leh kacih omthei zaw hi. Alungham den pawlkhat kingiam khat leh kilawm om a, aki ngiamkhiat pawlkhat awsang zawdeuh leh kacih hun omthei hi.

A sem nuam pawlkhat, om hithiat leh kacih nop om a, asem ngamlo pawlkhat hong kisat suah leh kacih om thei hi. Zing thobaih pawlkhat lumlai leh kacih omthei a, alol zolo pawlkhat thobaih leh kacih omthei hi.dalsianhung

A khasia pawlkhat lungdam leh kacih nop om a, a lungdam den pawlkhat khasiat huai kasak omthei hi. Avui lua pawlkhat hamzaw deih leh kacih om a, ahamlua pawlkhat maat zawdeuh leh kacih om in, Apalua pawlkhat sah zawdeuh leh kacih om hi.

A awlmawh pawlkhat om hithiat leh kacih om a, a kihen pawlkhat kisuak tasak leh kacih om hi. Zumkong mangkong ah akikhia pawlkhat zumhuai kasak mahmah om a, mawhna kimaisak ngeu pawlkhat zumkong mangkong tuthuai kasak pawlkhat om hi.

Pak khempeuh in ling nei kimlo a, ling khempeuh zong pak kimlo hi. A uih khempeuh asia hilo a, asia khempeuh uih khinlo hi. Anui khempeuh alungdam hikhin lo uh a, akap khempeuh adah hikhin lo hi. Thunei khempeuh lauhuai khinlo hi. Dal Sian Hung