Minam Puan pen Galhiam hoih khat hi ~ Suum Do Thang

Minam Puan pen Galhiam hoih khat hi ~ Suum Do Thang

Sisan hang a kongit Zomi pih te aw,
Minam khat hing aki cih peuhmah ten,a mau minam puan nei kim uh hi.A mau minam puan tek mah hoih sa-in nopna dahna,pawi thupi,vai thupi,lungpho na leh zum nasep nate ah silh uh hi.Ko namkhat,pawl khat hi ung , ka ngim ka tup uh ki uniform hi ci-a kam agen kul lo a ,a silh puan ten a na taangko ko a hi hi.

Galkap te,Sangnaupang te,bawlung team te,Kumpi na sem te,leh Company a nasem ten zong , a mau deihtel uniform puan nei uh hi.Ih puansilh a ki bat man-in,ih lungsim pai zia zong ki Uniform sak hi.Puan hoih tuamtuam tawh ki zem a, kidem, ki el nop na lungsim bei sak hi.Mi ki pum khatsak a,sih leh si khawm hin leh hing khawm, nek leh ne khawm, ngawl leh ngawl khawm ni cih lung sim guan in no leh ko cih om nawn lo in” ei “cih kammal zang khawm sak hi.Ki it na, ki lainat na lungsim khang sak hi.Luang kipham ngam sak hi.Lungsim galdo na ,galhiam khat a hi hi.Ei zong minam puan ih nei a,Kawlgam India gam a teng Zomi te minampuan zong ki bang a hih man in mi nam khat ih hih na ih puan ten, ei gen kul lo in a gen gen ahi hi.

Zomi te minam puan pen pasal puan numei puan cin na ki khen hi.Pasal puan pen,ni dang in dialkaih,puanak tualpi ( Pheituamtawh aki mang pah) Dial,Puan laisan,Tangcing,kawnggak cih te a hi hi.Numei puan pen mawngkhak, niksing, kawnggak, puanak, puandum,puangial leh lukhum cih te ahi hi.Tu hun ciangin ih Zopuan tepen ih siam tawpin tu hun tawh ki tuak dingin,ihgan, ihkhui, ihsilh a ih ki zem hi.Nungak tangval te bang Zopuan a silh uh teh kilawm mah mah in et lawm mah mah hi.USA White House sung dong ah ih Zonik ih Zopuan te kiteng ki silh ta in kei Zomi ka hi hi cin ki taang ko ko ta hi.Ni dang a ih Zonik sing te bang hunkhat lai in sing lua sa in nungak ten teng ngam lo uh hi.Zo niktual teng uh hi.Tu hun leu leu ciangin nungak ten aten uh Zonik te sing lua ki sa in a sin khop zo ding ciang in khui in ki teng hi.Nungak ten design tuam tuam tawhkhui a hong ki zep peuh mah pen lei tungah Zomi nungak te val a nungak hoih om lo ding hi cin ka na pak ta mah mah hi.A hi zong in numei /pasal a ding lukhu/ dial hoih tak ki nei zo nai lo a ,laidal peuh bawlin ih khuk mawk pen hong et lawm nawn pha lo ahih man vaipi a nei a ih ngaihsut ding ahi hi.

Zopuan silhdan tawh ki sai-in Pasal puan te pasal mah in silh in numei puan te numei mah in silh leh hoih ka sa hi.Zomi te thudang ah ih ngaihsut na a ki bang lo om thei kha mah ding a,a hi zongin minam puan vai ah ih lungsimki gawmkhawm thei ding cih ka lamen hi.Tua ahih man in ih minam puan te a hoih, a tawmman, tampi khui in Topa Pasian tung ah ap a, Zomi khempeuh te tungah,zuak khia, hawm khia leng hoih kasa hi.Pasian in Zomi te lungtang sung ah Zopuan te tung tawn in na hong sem ding hi.Sawl in Ammon mite a zawh na thu :-Samuel masa 11: 7 na “A mah in bawng leengkai kap khat la a,tua te go-in sem nenin kamtai te sawlin Israel gam khempeuh ah khak in,” Sawl leh Samuel’ nungzui in a kuankhia lo peuhmah a bawngtal te’ tung ah hih bangin ki hih ding hi,”ci-in a gen hi. Tua ciangin mite tungah Topa kihtak na hong tunga,mi hing khat bang in a mau te hong kuan khia uh hi.” acih mah bang in minam khat lungsim khat ih neih theih ding thupi ka sa hi.Zo puan pen ih gam sung a om Zomi te sang in gam dang a tung Zomi ten thupi ngaih sut zaw in lim silh zaw hi.Mi namdang ten zong hong deihpih hong silhpih theih na dingin hawmkhiat piakkhiat ih sawm ding zong thupi ka sa hi. Design hoih no no, a puan mel, a puan than hoih, a sa hoih ih zat zawh ding ,siamgan te leh a vai hawm ding khangno te muan huai ka sa a asawt lo in hong piang ding cih ih lam en hi.Zopuan pen thauvui thautang sang a,a hat zaw minam huai siam galhiam khat hong suak ding hi.

A hi zongin ih Zonik, ih Zopuan kigan tawm te pen sah thei lua ahih man-in,silh in teng leng lum lua hi. A silh a teng ten kuama theihpih khawl loh in,thuakhak sa a, mun khempeuh ,hun khempeuhah silhngam meng meng lo uh hi.Tua ahih teh khauzang a hoih nam zong in,gan ahi zong in,puanthan hoih zongin Pateih zaih bangin zaih leng pa ding ,vot ding a,hoih zawlai ding hi.Pasal/numei puan-ak te bang agial ki neusak lai deuh hen la a background pena kaang bek hi lo-in,color a tuamtuam zang leng,mun khempeuh ah a ki silh koikoi thei ding design thak ngaih sut huai ka sa hi.A khui dan zong design tuamtuam ngaih sun in mi tam pi hoihsak ding in khui leng cihhoih ka sa a, ken zong manzaih te silh a ban nei lo ip hau mah mah design silh nih ka khui pen a zat nuam ka sa hi.Zo puan ak te pen a khau hoih lo ahih man in sawp leng tonin ih taih hang hoih zo tuan lo , mat dikdek zo tuan lo hi.Sawt leh luisuah in santhelthal mawk hi.Zopuan hoih lo hi lo in a khau hoih loh man a hi hi.

“Zomi te ih ki pumkhat theih na dingin,Zopuan te tungtawn in,ih biak Topa Pasian in na hong sem ta hen”.

(Ka sepkhak leh ka vei khat a hih man in lai hong at kha ka hi hi. Ka khialhna a om te na puahsak un cih hong thum ing)

Suum Do Thang