Zawngtah zuakzia tawh kisai

Zawngtah zuakzia tawh kisai

Zogam sungah Zawngtah tampi piangta hi. Kumsim in summetbawlte hong pai in zawngtah a kung in hong lei hi. A kung liankhin te kung khat teng 3 (300,000) bangin ki khawngthei hi. Summet bawlte in gap khat 100 in hong leileh a zuakkikna ah 150-200 bang ngah uh hi. Tua a metpen a zuakte lampan cihtheihna ding omlo hi. A hidingmah a hihi. Ahizongin i zuakzia i siam ding kisam hi.

A zuakte (zawngtah neite) lampan ngaihsuthuai thu pawlkhat om hi. Tuapen zawngtah a kungin zuakloh ding a hihi. Zawngtah a kungbup in i zuakziau ciangin a hoihna ah: 1. ei lawh kullo 2. Khotloh ding lungkham huailo 3. Sum ki ngahpah hih thu 3 hoih hi.

A hoihlohna ah: 1. Ei deih hun in hong lo lo uh hi. Singgah pen lo baihleng a kung cidam hi. A gah i lawhhak ciangin a kungin thuaklah mahmah a hihmanin maikum ciangin a gah kiamthei hi. Kum masa pal/gahbaih mahmah, a kum kikciang pal zo nawnhetlo cihte pawl…

2. Ki nek ngahlo hi. A kungbup in zuakkhin i hihmanin i nektawm ding nangawn ki lo ngamlo hi. I it i meltheihte hong hawh nangawn gapkhat gapnih ki pia theilo hi. A gap tumtawngte nangawn puakhia siat uh hi. Ei neihsa a hihhangin thu ki nei hiaulo hi.

3. Ki enkhol khial den phial hi. Gtn; zawngtah kungkhat tungah gap 400 a gah dingin i ngaihsut pen hong lawh taktak uh ciang gap 700 bang pahthei mawk hi. Hihpen Zogam ah a tuakkha ngei mitampi omkhin hi. Tuaciangin kiciamsa a hihmanin sum ki ngahbehlo hi. Ngah ding a kilawmzah a ki ngahlo suak hiau hi.

4. A manh ki dekthei nawnlo hi. A kungbup in zuakkhin i hihmanin zawngtah a manpha mahmah zongin sum tam hong piakbeh nawnlo uh hi. I ki thukimna zahbek mah ki ngah aa, a gapzuak te ki engkik thei mahmah hi.

Tua ahihmanin hitheileh ei ma neihsa eima deih hun in i zuaksiam ding, zuakdan i siam ding thupi hi. Hithei hileh kungzuak lo in, a hunhun in gapzuak ciatciatmah ki sumhlo pen ding hi ci in a gen nuam i hihi. Maikum zawngtah zuak ding te’n hihlai na thupi ngaihsutsak un. Midangte zong na gen sawn un ci in deihsakna tawh i ki hanthawn nuam hi. Lungdam, Siamsin Library