Minam, Kipawlna leh Party ~ Pu Zokhai

Minam, Kipawlna leh Party ~ Pu Zokhai

Sanggam Ngaihteng, Pilna siamna kicing neilo-in, minam koici itding cih nangawn theilo-in pum-it -in ahaipih khat ka’ hihman-in lungdeih sinthu-mah suutkiik zeel-ing.

Minam Gii-Khunna

Kei’ muhna-bek ahilo, leitung thupaizia-ah, minam-pen phungnei zungnei minam khat bih-a huamna leh suutna tung-ah geelna leh kalsuanna ahihi. Minam akigen ciang-in phunglehzung (origin) tungtawn-a suutna ahihi. Lahpakding (lpd)-in, tulaaitak-in kei Melbourne-ah teeng-in, ka’ tate Melbourne pan-a asuak ahihziak-in Laaitui-mi ahihna-uh bei lo-hi. Laaitui nangawn Dim Khua pan-a inntuan ahihman-in tuni dongmah Dimmi ka’hihna-uh bei lo-hi. Deihna-ah, tulehtate’ phunglehzung-pen apu-apa’ pianna khualehtui leh behlehphung-tawh kisuut-hi.

Suut toto-ni cilehang, Zomite’ phunglehzung-pen Mongolian hihang aci-tawh Chinese hihang aci-tawh, atuabang vet-in suut zomto lehang Khazihmi upna bangngial-ah Noah’ suante hi-in leitung-a minam khempeuh Beh Khat ahihi. Ahitazong-in, Pasian mahmah-in Noah’ suante khempeuh beh khat ding-in deihna nei hileh Hebrews minam tuambawl-in Philistines, Mobites, Caananites, Hittites cbt., ado ding-in sawl loding cih kilangh mahmah-hi.

Minam cihthu leh leitung mihingte’ taangthu (Khazihmi upna-tawh) akisuut ciang-in ahuamciang khat, ciangtan khat neihkuul/bawlkuul hamtang cihna kilangh-hi. Lpd; Zomite-pen Mongo minam ahihkeileh Seen minam cih tepawl hizong hikha-mah taleh tua hihna-in tuhun-a Zomite’ ading-in bangmah lawhtaak peuhmah lo-hi.

Minam khat cihciang-in ngeina, sahkhua tawndaan leh paukam azanghkhawm, ataangpi ahuamkhawm mipawl khat ahihi. Lpd; akibang liinlian ahihloh hang-in ataangpi akinahvawh Tual Biakna paizia, Sihna-ah ki-uapzia, sihguuina, haanken, molaakna/mopiina leh mokhaakna, Ton leh laamna, zununna-a kipan ngeina guipite ataangpi azanghkhawm, kampau kisaangthei (akibanglian keizong-in) miteng-pen minam khat’ huam sung-ah a-om ahihi.

Tua ahihman-in minam adiak-in Zomi I’ suutkhiat (identify) ciang-in azaiilua kisam lo-hi. Ngeina guipite’ lak-ah atamzaw ataangpi I-puakkhawmpih, I-zuihkhawmpih ahilo namdangte huam tuanse peuhmahding hilo-hi, banghanghiam cihleh amaute-zong uut tuan loding uhhi. Minam huamgii ciangtanna-ah akhon khenloh hamtangding thupi-hi.

Alangkhat-ah, minam aki phungvuh nading-in minam nuai-a a-om mite’ omna munlehmual zuui-a awsuah kidanna nengcik-tawh khenthuahsuk leuleu tepawl ahihleh minamgii ciangtanna’ ading-in toiilua ahihman-in minam dingkip theilo sak-hi. Lpd; Dimmi, Saaizaangmi cbt.,-pen munlehmual zil-a awsuah kidang hilel ahihziak-in tua minamgii toiicik-tawh gii akikhun ciang-in minam kisiatna bulpi khat hong suak-hi.

Awsuah kidangsak munlehmual zil-in gii-khunna sang-a aniam zawtham-pen behlehphung zil-a gii-khunna ahihi. Gentehna-in, keipen Gualnam ka’ hihna bulphuh-in lawm ka’ zotleh minam nasepna masuan khatpeuh-ah mapang ding-a tawicinglo kahi dinghi, banghanghiam cihleh minam-pen beh tampi akigawmna phungpi ahihman-in beh veiina-tawh ka’ kalsuan laaiteng tuhun-a leitung gamliante-in ado-uh “Racial Discrimination” asepsuahmi ka’ suak dinghi. Pasian’ thuzuihna ahzong hih thu-mah adaalkholhna-in Topa-in, “.. ama’ nulehpate, unau sanggamte….., nusia-a hong zuuimi…” ci-in hilhkhol-hi.

Hih thu-nihte’ kikaal-ah dintheih nading naakpi-in thupi-hi. Minamgii Khunna-ah zaiiluatna-in phattuamna aneihloh mahbangteek-in toiiluatna-in phattuamna neilo thamlo-in siattuamna lawhtaak den-hi. Tua ahihman-in Zomi minam suutna-ah leitung paizia leh Pasian’ paizia-tawh akihawizawng theipen ding-a huamsiam, gii-khunsiam ciatding kisam mahmah-hi, banghanghiam cihleh tuni mahmah ciangdong “Zomi kuateng ahihiam?” cih dotna ginglaai-a, dawnna akip leh akician leh akhamuanhuai khatbeek om naailo-hi.

Kipawlna Paizia:

Kipawlna cihciang-in, sepding bawlding nakhat aseemnuam abawlnuam miteng-in khatbek mapanna sang-in pangkhawm-a masuanpi khat nawtkhawm ding-a athukim mipawl ahihi. Kipawlna ataangpi-pen khatbek ahihkeileh mimal’ sep zawhloh masuanlian namte phuutkhopna ataangpi ahihi. Tua ahihman-in biakna bulphuh taleh, minam bulphuh taleh mimal tampi kipawlkhawm-a mapanna ahihi. Hihbang kipawlna sung pan-in minam bulphuh leh Pasian’ thu abulphuh kipawlna khempeuh sung-ah, atung-a I-gensa mahbang-in beh veina leh khuami veituamna cihte hong kihel peuhmahleh lamkhial hipah-a, kitukalhna-in suulzuih den-hi.

Tua ahihman-in kipawlna khat akibawl naakleh “Bang kipawlna-hiam, beh-hiam, khua-hiam, khawk/kual-hiam, (biakna ahihleh, RC, Baptist, AG cbt,.’ kipawlna-hiam) cihte akiciat mahmah kuul-hi. Deihna-ah, hih kipawlna-in bangteng huam-hiam cihthu kiciatsak mahmahding ahihi. Kipawlna khat phut-in, geelna tupna ngiimna lianpipi neikhin phialmah lehang I’ kipawlna-in koiciang huam-a, bangciang huam-hiam cihthu I-kimin dikdek loh-in kipawlna hi naailo-hi.

Tua mahbang-in kipawlna-in bangciang huam cih I-pulaakna, I-taangkona mahtawh kizuui-a sepsin pahding ahihi. Gentehna-in, Laaitui Khuami Kipawlna ci-in amakaai upate-tawh akitawng ahihkeileh aki-el ahihkeileh aki meeltheihlo akiu khat-a Laaitui Khuami nihlehthum zawnlo, pawlbawllo thamlo-in paampaih, khentuam, deiidan, tuambawl cihbang a-omleh tua kipawlna-in ama’ paizia-tawh akilehbulh-in kalsuan cihna ahihi. Tua ahihman-in hih kipawlna-in bangciang huam cihthu akiciat mahmahding akuul mahbang-in ahuamna zahmah-a sepsinding kisam ahihi.

Party:

Adiak-in Political Party cihpen gamlian khat sung-a gamminam tanzil (natioanl level)-a kiukna lamsang kidemna-ah akihel kimawl team khat ahihi. Tua party-in mipi’ tung-ah, “Kiteelna-ah ko ka’zawh uhleh hih khua’ ading hihteng hihteng….., seemding….” ci-in pawl azotte  ahbang-in adang party te-inzong tuabangmah kamciamte bawl ziahziah ding-in kidem-in thugen siampen leh amuut siampente-in pawlngah-in vote tampen ngahding ahihman-in tua vote tam ngahpen party’ makaaipi pen-in Member of Parliament (MP) tutphah khat ngahding cihna ahihi.

Party makaai kiciante-in atung-a gensa mahbang-in kamciam apiak ziahziah-tawh kizuui-in angsung nusia-in seem takpi uh-a, mipi-in it-in muang ahihman-in maai kiteelna ahzong teelcinding lamet om-hi. Party makaai ginalote ahihleh kamciamte pia-ziahziah teei napi-in seemlo ahihman-in mipi-in maai kiteelna hunding ngaaklah mahmah-hi, banghanghiam cihleh tua party peuhmah vote piaksawm nawnlo cihna ahihi.

Hihbang political party paizia encian lehang minam min-zong puak leulau akuul masa hilo-in, gammite’ tung-ah thumaan cihtakna leh ciamkhona, itna leh deihsakna neihding thumasa ahihi. Gentehna-in, Laaitui-ah kiteelna om cipakni; “Laaitui Vontawi Party” ka’cih leulau hang-in kuamah-in vote hongpia tuanlo dinghi, banghanghiam cihleh amaute-in ka’ minam itna, thumaanna, cihtakna leh khua’ ading ka’ laainatna, deihsakna-tawh mimal suplawh-a ka’ seplehbawlte en-in vote hongpia zawding uhhi.

Tua mahbang-in mi khat-in atate’ kiang-ahzong,”Laaitui Vontawi ci ahihteh vote piakloh phamawh” ci-in sawl loding uhhi, banghanghiam cihleh kumpi kituh hilo-in, hun ciangtan khatsung tualkhangkhaanna lawhsum (development fund) zeekding kituhna ahihi. Thumaanna leh itna aneite-in tua sum zeekleh gammite-in phattuamna ngahlawh ding-a, angsungthei mite-in zeekleh mipi-in atuimawl ciangbek hawp khading cihna ahihi.

Zomi khangthakte-in kiuknalamsang party pianzil (nature of a political party) omzia hihbang ahihlam theihding kilawm-hi.

Khuuituahna:

Zomite’ lak-ah akitukalh thapaai ahihkeileh akitukalh bang-a akisaangkhial thapaai-pen:

• Biakna
• Minam
• Kiukna

Hihteng hi-a, ataktak-in akitukalh khatzong omlo-hi. Akibang-zong hilo-in atuam ciitciat hi-a, atonkhawm ahihi. Hihteng atonkhawm loh-in minam khangto cihbang om ngeilo-hi.

Biakna-in nuntaak khuasakzia, nisim kampau gamtat hongzuun ding-a, amaan itna lampi-ah hongkha den-hi. “Na’ tung-ah hong kibawlding na’ deihbang teek-in midang’ tung-ah bawl” siam nading lampi honglak dinghi.

Minam-in lamkaal mi maimai na’ hihlohna hong phungvuh ding-a, nopna dahna-ah nampi na’hihna hong kilanghsak dinghi. Mihing aphung-azung akisuut ciang-in minam-tawh kisuut-a, mihing na’hihna vaangpha sak-hi.

Kiukna-in tualsung leh tualleenphung khanna leh kiamna’ bulpi ahihman-in ahoih kiukna-in hong laamsaang ding-a, asia kiukna-in hong tualniamsak dinghi. Ahoih Kiukna-in siamsinna leh sumsinna hong phungvuh ding-a, cidamna leh thutanna (justice)-in suulzuih dinghi.

Zomi Pasian’ Thupha!

Zomite Kipawlna lam-ah Siam Naailo

Zomite I-tuntunna munlehmual zil-in I-paukam awsuah kidang thei-a, tua awsuah bulphuh-in kipawlna-hiam, vaaihawmna-hiam khatpeuh I-neih ciang-in minam kikhenthaangna hongsuak theikha-tam cih lunghihmawhna hizaw-hi, banghanghiam cihleh lahthu kician tampi I-nei khinzo uhhi.

Gentehna-in khua khat : (Ciimnuai cipak maini), -ah Dim awsuah kizanghtaang cini, ahizong-in Saaizaang I-cihdeuh Saaizaang, Kaapteel cihte tua Ciimnuai-ah teeng-a, Teiizaang I-cihdeuh Mualbeem cihte tua Ciimnuai-ah teeng-in tua mahbang-in Losau I-cih Tuithangte-zong tua Ciimnuai-ah teeng cini.

Hihsung-ah khuazaang-in “no, tua-awsuah,,,, ko tua-awsuah” kici sese lo-in, nuamtak-in ziingvaai hawmkhawm uh-a, awsuahzong kigawmmang ci-leuleu photni!

Tuabang hunnuam laaitak-in ami-a tam akisasim te-in: gentehna-in, Dimmi Kipawlna cihkhat hong phutkhia hizenzenleh tua Ciimnuai-ah nidang-a ziingvaai hawmkhop liailiaina, kithuhual-a ki-thuahkhopna-te thakhatthu-in akhenkham suakdinghi. Tuabang Kipawlna hong-omleh adangte-in, “Ei, Dimmi hilo, amaubek-in vaaihawm tuamnuam hi’ncia” ci-in kidaang ding-a kidaaikhah dinghi. Tua ahihman-in hihbang kipawlnate minam acidamsak dingtawh akibat hang-in minam’ cinatna lianpite’ lak-ah khat-in ka-sehhi.

Kei’ saanzia hongkhah kahihman-in saandaan akidanleh kitelsiamding hongngen pah-ing.

Hunkhatlaai-a Capt. Maang Tung Nung’ kammal “Chin State-a mihingteng kilungtuak keilehang koilak-ah Union of Burma piangthei peuhpeuhding” ci-a, Vaan Kul te Za Hrelian te’ thugen “Minam Ni cisese keini, kikhenkhap vaai-hi” acih akhaaktanna ka lungngiah ciang-in Beh Kipawlna cihte Minam’ cidam nading ahoihding bang-in kaseh ngei-hi.

Ahizong-in tu-in ka-lungngiatna piicing zawdeuh ding-in kasehtawm-a, “Beh Kipawlna inzong minam leh biakna nangawn cidamsak zawlo-in, cinasak zawsop” cihthu ka-mu thei-hi, banghanghiam cihleh biakna-ah kidaang-in minam-ah hong kidaaikhahsak thute-pen Beh ahihkeileh Bawng, Phung cihte aci velval lungsimte hizaw-hi.

Gentehna adangkhat-ah;

Australia-a Darwin khuapi-ah Zomi innkuan 10 om cipakni. Nuam kisa mahmah uh-a, ziingvaai hawmkhawm-in ki-hawh, kibaang diamdiam uhhi. Tualaaitak-in pil akisasim innkuan khat-in tualaai-a Zomi inn 10 sungpan inn 5 Gualnam ahihna thei ahihman-in Gualnam beh kipawlna hongphut-hi. Adang inn 5 te: Thawmte inn 2, Guite inn 3 cipakni. Tua behdang inn 5 te hongkidaang pah-a, nidang-a bang-in ki-unauna omthei nawnlo-hi. Tua Gualnam inn 5 te’ sungpan tangvaal 5 te-in azii ding-in Thawmte leh Guite teenpih cilaailaai-ni.

Amaute’ behbulpipa-in behtawh hong vaaihawm ciang-in tua mothakte inzong apasal ciat-uh zo ahihman-in tua Darwin khuapi-a Zomite bawng-eekdeen bang-in akithehzaak hong suak-hi, banghanghiam cihleh behkipawlna aphutpa’ tapa mahmah-in behdangte zii-in nei ahihman-in apa’ deihbang-in behbek ci-teeltaal theilo-in alungsim azaisak hongkisam ahihman-in akiphutsa behpawl-zong adaangdalh hongsuak-hi.

Hihteng hileh kician mahmah ding-in ka-ngaihsunhi, bangbang ahizong-in beh kipawlna abawl mite amawhsak kahi hetkei-a, ahizong-in beh, bawng cihte I-toiletcip teitai ciang-in eileh-ei aki- socialize theilo mi-khawng I-suak khaakding I-lunghihmawhman ahihi. Bangbangbangbang ahizong-in kipawlna hi-a, biakna kipawlna ahizong-in I-phuh bangbang Itna tung-ah kiphut henla, mi-el nading, mi-paampaih nading, mi-langbawl nading hisakkei hamtang peuhmah lehang akibawl bangbang ahoih, asaantaak hipahhi, banghanghiam cihleh Itna’ tung-a akiphut inn cikmah hun-in kisia ngeilo ding-a, huihpi nung-in guahpi zu taleh kipden dinghi, ahang-in Itna-pen Suangpi ahihi.

Tuni-in akiphut pawlpi tuamtuamte, minam kipawlna, beh kipawlna, khua kipawlna leh biakna kipawlna avekpi-in kipawlna hi-a, kipawlna ahihmahbang-in hong kihello mite-tawh kikhenna-zong hipahhi. Hikei I-cihcih hang-in vaannuai thumaanthutak ahihi. Beh kipawlna-in beh sung-a mitebek huam-a, khua kipawlna-in khua-mite bekmah ahuam mahbang-in biakna kipawlna inzong Tuithuum ahihleh Tuiphuum Thukhunpite alungkim mite bekmah huamhi. Ahizong-in minam kipawlna-in tua minam khempeuh huam-a, ahizong-in namdangte huamthei tuanlo-hi.

Adang kipawlnate-in ciangtan aneihzia I-telkim ciatding I-hihman-in Minam Kipawlna I-enpak dinghi. Minam ci-in minam-khat I-bulphuh naakleh tua minam ahi mite huamkimhi. Minam kipawlna ci-in upa makaai khatpeuh-in ama’ naaihuaite, ama’ innkuan zawdiakte bekbek munpia-zaw, kinzaw cihbang a-om himhimleh tua minam kipawlna kisai peelmawh dinghi, banghanghiam cihleh upa makaaite-in minam huam zolo-cih kilangh ahihmanhi.

Minam kipawlna cihkhit nungsang-in upa makaai khat-in tua kipawlna ama’ thuthu-in aletnop ciang-in tua kipawlna-in minam huam zolo ahihman-in kisai peelmawh dinghi. Taubaan-ah humtuam paihtuam aneih peuhmahleh tua pawlpi kisai peelmawhding thamlo-in akisai khinzo hizaw-hi.

Mihingte-in eima’ naaihuai, khuapih cihpeuh makaai upa-in omleh midangte’ sang-in ei hong humtuamleh ki-uut sese-hi. Makaai piicing hihenla hong humtuam, hong gumtuam keileh sihzaakdah-in kizadah thei-hi. Tua-thu Honpa ZEISU-in theician ahihman-in, “Amaan Kamsaangpa-in ama’ khua pan-in pahtawina ngahlo-hi” ci-in lamhong hilhkhinhi. Azenzen-in makaai upa seem-a I-khuapih, I-beh, I-naaihuaite-in hong phatphat, hong pahtawitawi khaakleh makaai kicin zolo-khat I-hi khatam cihnop-huai khalaaidinghi.

Tuabaan-ah Mikaangte-in Personal Popularity acih mimal kidawknopna anei mi-khat’ makaih kipawlna kisia peelmawh dinghi, banghanghiam cihleh ama’ minngah nading-in mipi hongzangh ahihman-in mipi-in hunkhat teeiteei ciang-in thuakzolo dinghi. Cihnopna-ah humtuam paihtuam I-neihloh ciang-in humtuamding alunggulh I-naaihuaite’ ading-in apaaituam, anawlkhiintuam zahdong-in hongsaang khazeel-uh ahihna I-phawkthakding thuhoih ahihi.

Minam Kipawlna ahihlimlimleh minam buppi ahuam kuul-a, makaai upate-in ataangzai vaaihawmna leh mapanna aneihding naakpi-in kisamhi, banghanghiam cihleh mihingpen zai kisa mahmah, thukhual kisa mahmah thamlo-in I-hun, I-thatang suplawh-a I-mapan nangawn phunsanna gensiatna nasiatak-in hongpai tawntung veve-hi.

Ahizong-in kipawlna athahaat nading-in makaa upate’ tung-ah atamzaw kinga ahihman-in makaai upa akuamapeuh-in I-vaaihawmna Itna tungbek-ah akinga, Itna-bek abulphuh I-hihzawh mateng kinawksuk kinawktohna huihhual cikmah hun-in daai ngeilo dinghi.

Tua tuihual adaih nading-in mipi’ tung-ah za-ah sawmlii kiimbang omding-a, makaai upate’ tung-ah za-ah sawmguk kiimbang omdinghi. Tua ahihman-in Zomi Minam Kipawlna athahaat nading-in I-phuhphuh kipawlna-te mi-el nading, mi-langbawl nading leh mi-deidan nading ahihloh peelmawhding athupipen leh akisampen ahihi. Zokhai