Amuanhuai mi suahnading nasep ahoih nate ki langsak

Amuanhuai mi suahnading nasep ahoih nate ki langsak

Khantohna kilunggulh tek a, picinna kideih tekhi. Kimuanna kisam in amuanhuai bang in sepna kilang pahpah leh kilungkimhi. Lungkim na aom leh kipawlpih ding lawm kihau hi. Lawmhau bek tawh masuan kitun theituan lo aa, Lawmhoih neih siamna in amuan huai mi hongsuak sak in tuapan in khantoh nasep natangzai theipan ahihi.

Zomi te in ahoihlo pen ih theih Zu leh Sa meh, Zatep tuibuk muan, cih te hi in, Nasep hoih ih theihpen kumpi nasep ahihi. Kumpi nasem te bek mah in zu leh sa meh zo uh ahihi. Tua sungah thunei zote bek mah hisawnsawn ahihi. Banghiamcih leh gamdang te ah ahi leh nek lawh dawn neih lehlamh kibang kim ahih hang in aituam neksim’ simtham guknek aom zeuhzeuh na gam ah iteengkha hi. Ki theikik veve ahih man in nasep hoihna kilang khialo suak ahihi. Tua ahihman in mimuan huai asuaktheilo kitam mahmah hi.

Zu leh Sa meh:

Ei Zomite muhna ah Zu leh Sa meh te asia bekbek in kimu hi. Akitawngtawng akilailai te Zu leh Sa meh te ahi uhhi. Khanglui lai in Ton hun, Gal aih hun, Sa-aih hun, Zu nun hun, Khuado Sialsawm hun ah Zu leh Sa meh in akitawng akithat omlo kizangeilo ahihi. Tuhun teh Zu leh Sa meh te kithat thei uh hi. Tua bang mun ah Amuanhuai mi suahna ding nasep kilang theilo alitkhap huai mahmah mite asuak uhi..

Tua hih man in Zu leh Sa meh hunteh Zomi taanglaihun in alungdam hun akithu tuah hun ah zu leh sa meh uh ahihi.Tuabang dan thu te khingkhai masa lo pi in Zu leh sa meh pah kilaipah leh Zu leh Sa meh te asia lamvive aa muhna in siatna piangsak zaw ahihi.

Hunkhat lai in paltantum Zomite minthang vangvang hi. Paltan tumte in Army Rum sazuk tuang te cisese hun om ngei hi. Gamkuan hongciah uh teh Army Rum leh Sakan keu meh uh hi. Khua lam hong ciah uh teh tua dan zu leh sameh omsam a, alenlai uh a, Army Rum leh Zu leh sameh gengen thei paltan tum te om ngei ahihi.Ka kilailai uhhi cingeilo ahihi.

Kumpi nasem te Zu leh Sameh cihhang in ameh zolo zong honlom tangkhatmah om ahihi. Ameh zozo pen kyianphaam hatte hi aa, Kyianphaam semlo te leh semtheilo mihai dan a, kikoih kingaihsutna gam ah kiteeng kha hihi. Tua mun ah kimah kimuanglo tek ahih mahbang in amuan huai ding kuamah omlo zel ahihi. Tua man in nasep hoihna kilang khia theilo suakhi.

Ahoihlo pen Leh Ahoihpen

Ahoihlo pen leh asia pen in sihtheih nading akibawl nate leh thute ahihi. Nate icih ciang in aphuak kham thei thautangte, zatuihoihlo te ahi aa, ahoihlo thute in ahilolam aa, kipatna na, eithubek, eidanbek, deihna leh namdangte hong helholhna thute pomluat na thute ahihi.

Tuaban ah khaktan nopna, hatzatna, muhdahna, lungsim kielpuak giugiauna’ zawh tawh thutawh kipei phuangna te in ahoihlo pen suak ahihi.

Ahoih pen icih ciang in melhoih na hilozaw aa, ahun leh amunzui, akhua hunluan zia tawh kituak in kalsuan theihna in hoihpen dingtawh kibang zaw diaksak ahihi. Acih mawh mite kihuh, akhangto ding te kipanpih’ adongtuak mite kipanpih na in nasep hoihna kilangsak ahihi.

Hihbang nasep aom na munah ” Keizong ut’ Ken zong deih, Kote zong in hithei ci a, ahonghuh ding lawm hoih tampi kibehlap ahihi. Nasep hoihna mun ah lawmhoih zonkul lo in kibeh lap semsem hi.

Khuata te ah thuluan zia;

Khuata te ah behsung pan thuthei zaw diak, Hausa te, Sangsia te leh Biakna lampan upate Sia te thu mah alutpen ahihi. Tua mitengmah khuata mipite in amuan mahmahte ahihi. Nasep hoih aneih leh akhua kilamsang hi. Nasep hoihlo khuadin mun tawh kituaklo in asep leh miginalo ahihi.

Khua pawl khat ah Sangsia te in tungsiahpan akiciangtan zah sang in atamzaw sum sangnau pangte tungah adongthei ziauziau nagam pen eite pian na gam zong kihel kha thei ding ahihi.Ama nasep tawh kisailualo te ah Sangsia te thunei nuam zong kiom theihna gam ah kipianghi.

Hausa te leh Hausa sem ngei khuata te zong akhuami tawh kilem lo, akhuaveng tawh kilemlo kiom thei hi.Thuneihna tawh khuata te singhalh khamkham na pi Hausa te in khuadang ah zuak simsim, ahih leh paulap zong singadeihdeih ,gamgam adeihdeih na tel cih hausa leh hausa luimi te zong kiom thei na gam ah kiteng kha ahihi. Hihbangte khuata te ah nasep hoih akhuapih te in mu theilo ahihi.

Khuata ah biakna Siate zong sungh leh Mak peuh kithei khelkhel a, kilemlo thei khelkhel ahihi. Biakna sem kimlai khua sung uk nuam Sia peuh om thei zanzan in Hausa te tawh kilem lua leh kilem lolua biakna siate kiom thei ahihi. Tua bang mun khuate ah nasep hoihna kilang lo ahihi.

Khuapi te ah;

Khuapi te ah ahih leh apil asiamzong kitam leuleu in nasep ahoih semlo te daipaam tangmahmah ahihi. Ahoih nasemte ahih leh mikim in lunggulhna nei uh hi. Amah leh mah in nasep zon tawmtawm lo in nasep hoih in amah leh zon kik ahihi. Nasep koi ah omhiam? Nasem nuam ing cih sang in. Hih lai ah tuadan nasep om asem thei te kideih hongpai in cih hizaw ahihi.

Nasep ahoih in asem icih te kumpi nasep bek hilo in Company tuamtuam ah aphin ciltak leh apil nazah, atheihnazah’ asiamnazah in asem khia te bekmah alawh cing ahihi. Khasum kisang theipeuh leh anneektawm ding kingah peuhleh cihciang lungsimnei aa, nasem te bahbaih’ huusam baih ahihi.

Tua ahihmanin nasep hoih akilatkhiat ciang bek in mitampi-in ahoih na mu thei pan aa, lawh cin’hna in nungzuih thei pan ahihi.Mikhempeuh kilawh cing pah hanhan hisamlo leuleu a, lungkhiat theihna inzong hong maimuak masa thei thu tampi om ahihi.

Nasep khat pepeuh ah aol teng bek sem zalzal, ahamsa te lawmte ,mipite koihsiah nekding te lah amasa pen aliimteng nek manlai ,nektheihlai cihbang lungsim nei a nasem zong ki om veve ahihi.

Gamkhat leh, Leitung ah’

Gamkhat din mun te ah minam vai in atawn tung in masa hi. Ka gam mite khuasak zia, nagam mite tua ci hi cih thu luangden ahihi. Gam mi te nasep hoih apia zo kumpi mip te in pak ta hi. Gammite cidamna enkolsiam te, gammi te pilna lam kipatahna hoih gamte ateeng nuam abeel nuam kitam hi.

Gammi te leh anungzui mipi te nasep hoih apia theilo, apiazolo gam kitai san hi. Lungleng dipkuatna kineh niam na mun gam kinusia thei hi. Tuabang mun ah nasep hoih aom ngei kei hi. Siahdon na siah piak tamhi. Baangsak Baangkhang Inn nung innmai khutdawh ngen kipawl cing thei mahmah gam te hiphadiak ahihi.

Mihau’ mipil khat in nasem Engineer te leh adawldawl nian phiat dong in alungkimzah ding khasim in tuuk atunsak zawh leh nasem Engineer, Manager, Suppervisor, General worker dong in nasem kibeh laplap ahihi. Nasep ding ageelsiam mi zong lut thuah thuah ahihi. Aboss ding vive , Engineer, Manager vive ding lah hi khin theilo zel ahihi.

Bangbang hi ta se leh khantohna te ah adiakdiak in Zomi te kizekai hi izawng penpen hi cihcih pen minamdangte deihtheih ding, zattheih ding, aitdiak ding vanhoih nono bawl khiat theihna kisam ahihi.

Kawlte din mun;

Kawlmi te Ngapik icici a, amau naleilei ngapik bawl hau thei uh hi. Zogam ah i bawl thei nasep akilang pen mintuamtuam tawh vaituamtuam neihna tampenpen ah khantohna lampan nam khat hitei ahih hang in ahoihlam nasepna akilang khia ding namdang ten hong theihpih muhpih ding Phimno khat, meigittang khat, sikgialneu no khat zong ih lah khiat theih ding nasep hoih om nailo ahihi.

Zomi dinmun;

Zogam khuapi te ah namdang nasem khatzong omlo ngen loh Sai ngakte kilusu ngeungeu lai gam pan piangkhia te ihhihi. Nasem lo in kiom tam aa, amuatcip theigah haigah abanglai din mun te kihi lai ahihi. Gamnuam ah Innhoih ah khuapi ah om in’ teen zenzen hang in gammite lawhtaak hamphatna leh leitungbup deih theih hamphatna bawl thei nailo kihi aa, nate akilangtang in sep khiatna hanciamna, cihtakna ineih leh mi muan huai hongsuak sak nasep hoih asem minamte kihi ding ahihi. Hau Thang