Pa leh Ta ~ Sia Ngul Za Tung

Pa leh Ta ~ Sia Ngul Za Tung

America gam Brooklyn khua, mawtaw kipaitheh ziahziah na lamkabom khat ah, puteek khat lam a kantan laitak in sibup in tuk hi. Agei apam pan a mu te’n zong delhhuan pah uh a zato ah zasak hi. Zato mawtaw khat hong tungpah lian a, anai penpen King County zato ah puakpah uh hi.

Emergency a nasem siavuan, siamah te’n zong thakhatthu in bawlpah uh hi. Ahizong in putekpa pen alungtang na hi a, nasia mahmah khinzo in, azingciang khua avaknawn tam maw cih ngaihsun uh hi.

Putek pa’n khatveivei khua a phawk ciangin ‘kata hong sapsak un’ ci niloh hi. Siavuan siamah te’n zong putekpa hehpihhuai samahmah uh a, a sihma in ata musak nuamlua uh hi. Putekpa’ puan-ip sung a zon leh laikhak khat mu uh hi. Tua lai a et ciangin ata’ min leh galkap khat ahihlam thei uh hi. Tua laitak in Carolina ah om cih zong thei uh hi.

Siavuan pa in Red Cross zumpi ah athuteng zasak hi. Tua pa’n Carolina ah kizasak leuleu a, atapa a manlang in a paina ding ngenh hi. Carolina pa’n Red Cross officer khat mawtaw tawh galkap len’ ah ki paisakpah vingveng hi. Kamphatna in tua galkappa mupah hi. A bute’ kiangah athuteng gen in, galkappa paipih a, vanleng tawh putekpa’ omna ah ki puakpah hi.

Tua ahih manin galkappa pen khuamial hun in zato hong tung hi. Duty kia siamahnu in galkappa tutphah khat pia in putekpa gei ah tusak hi. Tua khit ciangin siamahnu in damtak in putekpa phawng hi. “Pu aw, hi’ah na tapa hong tungta, en dih aw” Siamahnu in damtak in phawng napi, putekpa pen gimlua ahih manin khuaphawk tuak mello hi.

“Nata hong tungta, pu aw”, siamahnu in a sapsap ciangin putekpa’ mit damtak in hong hak diamdiam hi. Galkappuan silh tangval khat a muh ciangin, putekpa zong akhut langkhat khak hi. Tangvalpa in zong akhut khak a damtak in len hi. Putekpa’ khut alet ciangin tangvalpa i apa a itna ‘dat’te a khuttung tawn in a luang tawh kibang lua hi ci-in saimahnu in ngaihsun a, lungkim mahmah hi.

Ata’ khut alet ciangin lungkim’ tuak mahmah a, putekpa sibup in khuaphawk nawnlo leuleu hi. Tangvalpa in ahih leh putekpa’ khut damtak in len gige veve hi.

Khua zan mahmah ta a, siamahnu in tawmvei pusuak in tawlnga ve a cih hangin, tangvalpa utlo a, putekpa’ geimah ah om niloh in acing’ hi.

Zato ah zan in cina cin’ a theingei te’n bangzah in ki cim’ cih theitek ding hi. Khuazan tektek leh ki cim’ semsem hi. Ahi zongin tangvalpa ahih leh apa, putekpa’ gei pan pialkhia lo in cing’ gige hi.

Za’ duh mahmah khat hi napi, zato atun’ a kipan zialkhat zong tep lo in, putekpa khua aphawksun ciangin a lungnopna ding thu genpih a, a hopih lam’ siamahnu in mu hi. ‘Aw, hi galkappa nak thupi, apa it taktaksam ei’ ci-in a lungsim sungah phat mahmah hi. Tua bangteng tawh hun beibei a, zingsang khuavak milmial hun in putekpa si ta hi.

Tua ciangin galkappa zong apa’ khut alet gige te lupna tungah damtak in koihsuk in, pusuak ding thu siamahnu kiangah ngenh hi. Siamahnu in misi a bawl laitak in tangvalpa in zakhat hal in a tep hi. Siamahnu in misithu telephone tawh a gen khit ciangin, galkappa hehnem in hopih hi. Ahih hangin galkappa’ thu dotkik a zak ciangin siamahnu in lamdangsa lua hi.

“Siamah, hih putekpa kua a hia? Koi pan a?” “Ha! Napa hilo maw?” Siamahnu’ thudotna tangvalpa in a lu peisan hi. “Hi kei, kapa hi kei, zong’ mu ngei het ke’ng” “Tua ahih leh zato nong tun teh bangdia genpah lo?”

“Aw, hong gen leng, hici dan hi. Red Cross officer pa’n hong sap teh, kei zong kapa si dekdek ahih leh ci a, ka zuih hiven, zato ka tun teh kapa ahih lohlam thei. Hong kisam khial cih zong phawk, amah lah si dekdek ta, ata munuam mahmah cih ka ngaihsut ciang hehpih huaisa lua. Gim mahmah ahih teh ata ka hih leh hihloh zong theilo ding a, ata lah a om theilo hikhin ci leng, kei ma’n a cing’ himai ingh. Ka upmawh mah bang in, putekpa’ ata mah hongsa a, a lungnuam pah sa ingh. Tua hang a kei zong a bei a tawp dong a hanciam vet hi’ng”

Lamdangsa lua in siamahnu pau theilo in a om laitak in tangvalpa apualam ah paikhia ta hi. Tua khit ni nih, putekpa a vuilap in ata taktak hong tung hi.

Putekpa’ ta leh zanthapai’ a cing’ tangvalpa, amin uh kibang a, a omna uh zong kibang citciat hi. A galkap nambat bek ki lamdang hi. Red Cross officer pa in nawhsatak in amin a gen ziau ciangin, galkapbu pa in a min kibatpih pa na sapsak kha na hi mawk hi.

Ahizongh in ata takatak ahi lo tangvalpa in putekpa’ laitah dong ata taktak bangin na cing’ na uap hi.
Ki itna, ki hehpihnate bei semsem hi i cih tuhun in, hih galkap tangvalpa banga itna hehpihna a nei mikhat i muhkhak zenzen pen, lungdamhuai mahmah hi ci-in siamahnu leh zato nasemte in gengen uh hi. Sia Ngul Za Tung (RD pan Roy Popkin i ’Night Watch’. NZT)