Mihing bangin kampau in ~ Job Cinpi

Mihing bangin kampau in ~ Job Cinpi

“Ka ta aw, mikang pau na thei hiam”
“Thei keng ei pa, kei sang kah nai lo.

“Kawlpau na thei hia leh”
“Thei nai keng ei pa, ka zak tam nai lo hi.”

“Sen pau na thei hia leh”
“Sin kha ngei nai keng ei pa”

“Kachin pau, Mon pau, Shian pau cihte na siam a om beek hiam”
“Pa aw hihte ka sin ngei loh banah hih pau namte ka theih nadingin kei amau tawh ka kithuah ngei loh pi.”

“Hi mah ei ka ta, pau nam tuamtuamte theih ding hoih mah hi, thupi mah hi. Ahih hangin a thei lo, a thei kha lote adingin zong tua pau nam tuamtuamte sang a thupi zaw khat om hi.”

“Pa aw, bang a hia a thupi na cih”
“Mihing banga kam pau theihna mah thupi pen hi.”
“Pa aw, mihing in mihing bangin kampau kei leh bangci pau ding uh a hia?”

“Ka ta aw, mi pawlkhatte in pau nam tuamtuam thei uh hi. Ahi zongin tua pau nam tuamtuamte a theihna uh kiphatsakpih uh a ama minampihte le a sanggam a u a naute teltheih loh ding kiphatsakna kiliatsakna le ama dinmun sang a sang zaw in om nuam uh hi. Kipilsakna awsuah le kammalte tawh thugen-in kampau uh hi.

Tua bang mite thugen mihingte bil ah lut loin pilna tawh a kop lote’ telsiam lo ding uh hi. Tua mah bangin amau le amau kiliansak uh ahih manin amah sangin a niam zawte’n deihsakna tawh thu a gente uh telsiam lo uh hi.”

“Ka ta aw, mipi lakah thu na gen a, na lawm na gualte lakah thu na gen zongin na thugen a kitel dingin kiniamkhiatna tawh kampau zaw in. Ama dinmun sang a kiliansak zawte in a thugen uh midangte’n a tel loh uh ciangin a thugen uh a thuk lua sa kha uh hi.

A thuk takpi zong hi kha mah ding hi. Ahi zongin a pil a mawl in a theih ding uh mah kisam pen hi. Tua ahih manin kong it ka ta aw, mihing bangin kampau inla mihing bangin thugen in.” “Mihing khat in mihingte tel dingin kampau uh hi.” Job Cinpi (Zomi Laisim Nuamte)