Zangkong Zomi Khuado na pawlkhat

Zangkong Zomi Khuado na pawlkhat

Dear all, Tukum Tedim- Associationte makaih natawh Zangkong Zomi Khuado pen vai tuamtuam hang in ki ziakai hi. Zani 15.11.14 ni in TBC-Y Social Hall ah ki bawl thei pan hi. Hun kipat ma ding in Maj. Kam Cin Lian in Khuado pawi tangko khiatna hong nei in Pa On Za Suan makaih na tawh kipat na Zolapi te ki awi hi. Kipat hun ap thu ngetna pen Rev. Khoi Lam Thang in hong neih sak hi.

Vai muakna T-A President Prof.Dr.C. Thang Za Tuan in hong nei in tua zawh ciang in Zomi lasiam Nu Toih leh Maj. Kam Cin Lian in la hong sa hi. Khuado thugenna T-A Vice President Pa Kap Khen Pau in hong neih sak zawh ciang in Zongeina lam Zangkong Zomi R.C Khangno te in hong zom suak in tha ki ngah mahmah hi.

Leitungbup gam 36 aa om Zomi ta dingin siampi thu ngetna Kawlgambup AG ki pawlna ah General Secretary asem Rev.Dr. Suan Za Pau in hong neih sak hi. No nong phawk khol kei uh zongh ko Zomi na mipih te un hong ki phawk hi. Tuazawh ciang in Zopawlpi pan in Zongeina lam hong nei leuleu in tha ki ngah mahmah hi. Tua khit ciangin Zomi Lasiam Dr. Mangsan (Zogam Lalpu tapa) in a la dawng 1 tawh mipi te tha hong pia hi.

Tua zawh ciang in Zangkong aa aom Zomi Designer te makaih na tawh lady Fashion Show hong nei uh in mupnop mahmah leh ih ngeina puan hoih nono te Zomi nungak te in hong lak ziahziah in mipi hong lawp sak mahmah hi.

Pahtawi piakna T-A Secretary Steven Cin Za Khai in hong makaih in Zomi ULian pawl khat, Ph. D ngah thak 4 leh tukum tan 10 ah gual tung tuanna(D) ngah te pah tawina ki pia hi. Tua khit ciang in All D ngah Zolia khat leh Ph.D ngah teng in lungdamna leh mipi tha piakna tomkimcing hong nei uh hi. Tua zawh ciang in Zomi Siamsin te in zongh Zongeina khat mah ahi guatah lam hong nei in muhnopsa in tha ki ngah mahmah hi.

Fashion Show anihvei na hong hi leuleu in Pasal te in ih Zopuan hoih nono te tawh hong ki leh zialzial uh hi. Tua zawh phet in nungak te in zongh puan design khat mah tawh hong nei leuleu uh hi. Tua zawh ciang in Zomi lasian Pa Dalpi leh Tg. T.S. Khaipi in la tawh tha hong pia ziahziah uh hi.

An kuang aa ding in GZA AGS Rev.Dr. Go Cin Zam in hong neih sak khit ciang in hun man na ding in GZA President Rev.Dr. Simon Pau Khan En in hong neih sak in hun te nitak nai 5 lian in ki zial pawl in inn nuai ah an neek kawm in ki lawmtakna ki nei ciat hi.

Tutung Khuado ah M.C pen Tg. Cin Suan Kap, Lia Niang Theih Kim leh Lia Ngai Tawi Lun Cing te in hong sepsak uh hi. Tutung khuado pen kum dang tawh kibang lo in mipi kicim man lo in nuam kisa hi. A hi zongh in Zangkong om Zomi inn 1500 ai tang ding in mipi 300 khawng ahih man in ki tawm hi. Ahi zongh in amun tawh kituak in Biakinn kidim hi.

Mailam ah hi thei hi leh Zangkong Zomi bup hoih tak in thu kiza in Hlaing Hall khawng ah bawl zawh ding ki lung ngulh mahmah hi. Khuado ei aa ahih buang in maw? Hi teng pen kei theihpak teng kong at pak hi in akisam aom aa leh hong telsiam un la, at dan ahoih lo aom khak aa leh ngaihdam bawm ah maw! Khangno pawl khat makaih natawh mite hih dan in marn ki zaih na ding in kibawl in tua mun ah Zomi nasep nei te in amau logo suang in tua tawh kizaih in et lawm mahmah hi. Lungdam, Thawngmang (Zangkong)